Lisch da la stanza da scola è serrà, las clavs surdadas ed il satgados da scola svidà e mess da la vart. Cun la fin dal davos onn da scola è il scolast secundar Armon Bearth ì en pensiun. Durant 40 onns ha il Surmiran dà scola a Tinizong, Sumvitg e Trun.

Suenter il studi da scolast secundar a Friburg è Armon Bearth sa chasà cun sia famiglia a Sumvitg. Paucs onns pli tard ha il scolast oriund da Casti bajegià chasa a lur dal vitg, ina chasa che croda en egl, ina chasa in zic autra che las autras. La chasa da Lain en in vestgì da schlondas ha dentant carmalà bain intgins fans da l'architectura a Sumvitg. Bain intgins hajan schizunt sbaglià la chasa cun la chaplutta da l'architect Peter Zumthor a Son Benedetg, di Armon Bearth.

«Il principal dad esser scolast è davair gugent ils uffants ed ils cumbats cun ils giuvenils.»

Il scolast Armon ha vivì quasi sia entira vita per las scolaras ed ils scolars. El è stà in scolast modern, avert, spontan e cun bleras ideas. Gia durant ils emprims onns da scola a Sumvitg ha Armon Bearth tranter auter inizià il project «Tenero», in'emna da sport al Lago Maggiore en il Tessin. Ir cun canu, raiver, dar tennis u ir cun velo, quai be intginas da las activitads durant quell'emna chè daventada per bleras scolaras e scolars in dals puncts culminants durant ils onns en la scola superiura.

«Jau ma legrel sin la pensiun e las proximas aventuras da la vita.»

A cor stat ad Armon Bearth er la musica. A Sumvitg ha el er embellì numerusas festas ecclesiastica cun sunar l'orgla, in instrument che gia ses tat e ses bab sunava. Er a chasa tutga il sunar, il chantar u simplamain il tadlar musica tar il mintgadi, il pli gugent ensemen cun la famiglia.