En stiva da Beat Manetsch savura da terpentin. Dapi sia pensiun sa deditgescha l'um da televisiun a la pictura. E returna uschia tar sias ragischs – la scola d'art ch'el ha frequentà a Basilea.

Quella scolaziun saja stada la meglra preparaziun per far televisiun – quai è numnadamain quai che Beat Manetsch ha fatg durant bunamain 40 onns.

Cun sia fatscha innocenta, ha el fatg ir si per las paraids ils politichers grischuns durant ses temp tar l'emissiun satirica «Muschkito», durant ils onns 90. Tar la partiziun da la cultura populara a Turitg tar SRF, ha el bainbaud purtà titels sco «Mister Fanacht» e «Mister Tattoo» ed era responsabel per las «grondas chistas».

In culp dal tscharvè ha finì la carriera tar la televisiun pli baud che pensà – ma Beat Manetsch ha plans da la creaziun d'ina applicaziun fin tar in viadi senza destinaziun. En quest profil recapitulain nus a chaschun da sia pensiun sias aventuras tar la televisiun e discutain davart sia passiun per dronas, colur d'ieli e la garda americana.