Sco directur dad RTR ha Bernard Cathomas schlargià radio RTR da 14 sin 24 uras, construì la chasa da medias rumantscha avant 20 onns ed implementà la purschida online. Sco secretari da la Lia Rumantscha è el s’engaschà politicamain per il rumantsch ed el è il «bab» dal rumantsch grischun.

Tut ils engaschis professiunals da Bernard Cathomas han gì l’idea dad unir Rumantschas e Rumantschs. Quai vala per las Scuntradas rumantschas, per il svilup dad ina gasetta quotidiana, per la lescha da linguas che dat al rumantsch in statuts ferm ed era per la creaziun dal rumantsch grischun.

«Jau sun stà quel ch’ha in zic inizià, in zic stuschà, in zic fatg las discussiuns e guardà che las cundiziuns sajan dadas», di Bernard Cathomas en il «Profil». El n’haja betg fatg tut sulet.

RTR

Avant 20 onns ha RTR pudì inaugurar la chasa da medias rumantscha. Quels da la televisiun na sajan betg vegnids gugent en chasa nova, sa regorda l’anteriur directur dad RTR. Els avevan sviluppà in’autra cultura da manaschi che quella dal radio rumantsch. «Dentant sch’ins è pitschen, na ston ins betg anc sa sparter», manegia Bernard Cathomas. «Ins na sto betg anc sa far pli pitschen che quai ch’ins è. Ils pitschens ston empruvar da sa far pli ferms, da mussar lur fermezza cun concentrar las forzas. E quai ha duvrà bleras discussiuns, blera motivaziun, bler insister.»

Lia Rumantscha

Il 1980 è Bernard Cathomas vegnì elegì sco secretari da la Lia Rumantscha. El ha inizià il rumantsch grischun. Il cumenzament ha questa lavur pudì vegnir fatga senza grondas dispitas e resistenza. Ma enturn ils onns 1990 hai cumenzà a dar attatgas massivas envers Bernard Cathomas.

I fetschia impressiun da survegnir smanatschas da mort. «Ed jau hai era gì tema», conceda l’anteriur secretari da la Lia Rumantscha. Questas agressiuns sajan dentant mo vegnidas da paucas persunas.