ផ្ទះ​ប្រជាពលរដ្ឋ​ប្រមាណ​ជិត១០០ខ្នង​នៅបណ្ដោយ​ស្ទឹងព្រែក​ថី ​ស្ថិត​ក្នុង​ភូមិព្រែកថី​ សង្កាត់​រកា​ខ្ពស់ ​ក្រុងតាខ្មៅ ​ខេត្តកណ្ដាល ​ត្រូវ​បាន​កម្លាំង​សមត្ថកិច្ច​ ចុះរុះរើ ​វាយកម្ទេច​ ទាញទម្លាក់​ យ៉ាង​បន្ទាន់​ នៅយប់​ថ្ងៃទី១៧ខែមករា​ ក្រោយផ្ទះ​មួយ​ចំនួន​បាន​ស្រុតចុះ​ដោយសារ​ស្ថានភាព​ជំនន់​ខុសរដូវ​។ ​ស្ថានភាព​ទឹកស្ទឹងព្រែកថី​នៅថ្ងៃទី១៨មករា​នេះ ​ហូរ​គួច​ត្របាញ់ ​ដែលហូរ​ធ្លាក់​ពីកំពង់ស្ពឺ​និង​ទំបន់​សណ្តរ​ព្រែកត្នោត​។​ ពលរដ្ឋ​មួយ​ចំនួន​បាន​ថ្លែង​ទាំង​អួលដើមក​ថា ​ការរុះរើវាយ​កម្ទេច​ក្រោមហេតុ​ផល​ធម្មជាតិ​ជារឿង​មួយ​ តែផ្ទះភាគ​ច្រើន​មិនគួរ​ត្រូវ​បាន​វាយកម្ទេច​ទេ​ព្រោះនៅ​មានសភាពមាំទាំ។ ​ប៉ុន្តែ​យ៉ាងណា​ពលរដ្ឋ​ចង់​បាន​ដំណោះស្រាយ​និង​សំណង់​សមរម្យ​ និង​អះអាងថា​ បើគ្មាន​ដំណោះស្រាយ​ទេ​ ពួកគាត់​នឹង​ប្រឈម​វិបត្តិ​គ្មានជម្រក​ និង​គ្មាន​អង្ករ​ច្រកឆ្នាំង។​