Quai ha ella resenti l'onn passà cur ch'il vegl bus da la Posta da Schluein è charrà tras Son Gagl durant il cortegi da l'exposiziun Olma. Ella na sentia betg savens melanconia per la patria, quest mument haja dentant commuventà ella.

Carin Giger Büchler è creschida si a Schluein, en Surselva. Dapi prest 24 onns viva ella cun sia famiglia a Mörschwil, in vitg a l'ur da la citad da Son Gagl. L'um da sia vita ha ella vis per l'emprima giada durant ina disco a Surrein. «Quai è stada l'amur sin emprima egliada, ma jau hai stuì gudagnar sia simpatia», sa regorda la dunna da 47 onns.

Oz ha il pèr sursilvan dus figls da 21 e 19 onns. Precis sco la giuvna Carin ha savì da lezzas uras che Manolito Giger saja l'um da sia vita, ha ella era savì gia cun tschintg onns ch'ella veglia daventar mussadra da scolina.

Sper ses pensum da mussadra a Mörschwil e sper la famiglia stat ella savens sin tribuna sco Claudette, Penelope ed autras figuras cun il «Duo Grinsmanöver» (cun Jakob Näf). En il Profil da sonda raquinta Carin Giger Büchler a nus dals tops e flops sin tribuna e pertge che crimis e cuntradas crivas laschan siemiar ella.