De Döschkassen

De Döschkassen

Bummeli 3,6 Millioon Lüüd bi uns in’t Land sünd in Momang Arbeidslos. Liekers gifft dat keen Brangsche, de ni över Personolmangel klogt. Dat passt vöör un achter ni tosom.

Dat is so, as wenn man vör ’n vulled Köhlschapp sitt un verhungert.

Dat mangelt jüst so an Dokters as an Handwarkers. De eenzige Brangsche, in de dat jümmers genog Lüüd gifft, is de Politik. Na jo, dor bruukt man ook keen Utbillung för un dat Gehalt kann man sülms höger moken.

Veellicht schull man dat Prinzip ook bi Handwarkers, Dokters un all de annern inföhrn. Kunn klappen.

Wat sünst passeert, dat lött sick in ümmer mehr Hotels un Restaurants bekieken. So ook op Gut Kaden in’t Hotel Breitenburg, wo ick an Dingsdag op’n Bustour mit ’n Brunsbütteler Börgervereen weer.

Ick sülms heff dat ni sehn, overs as de Lüüd vun Kaffedrinken weller to’n Bus keem‘ hebbt se ganz begeistert dorvun snackt, wat dor ’n Roboter Töllers un Tassen wechbröcht hett. Dat weer sogor ’n Roboter-Deern, wenn man’t genau nehm‘ deiht.

„Bella“ heet se, hett ’n Fruu ut ’n Bus to mi seggt.

Dat de Lüüd överhaupt dor henkom‘ sünd, üm sick Bella to bekieken, is blangbi gor ni sülmsverstännli, denn Busfohrers gifft dat ook veels to weni. Pass man op: Een, twee, dree sitt ’n Bella-Roboter an’t Stüüer. Un wenn de Bus mol ni vull ward, denn ward de leerigen Plätze ook noch mit Roboters besett.

An’t Enn fohrt ’n Busfohrer-Roboter ’n Driff vull Roboters no Gut Kaden, wo de Roboters vun annere Roboters ’n Kännchen Smeeröl serviert kriegt.

Na jo, ganz so wiet is dat noch ni. Liekers: Dree’nhalf Millioon Lüüd hebbt nix to dohn, overs överall fehlt dat an Personol.

Dat liggt natüürli ook doran, dat wi ganz scheun verwöhnt worrn sünd.

To mien Schooltied harr ni jedeneen ’n Auto, dree Fernsehers un fief Compjuters to Huus. Overs dat weer normol. Hüüt is dat anners. De Ansprüche sünd steegen, overs de Tofreedenheit is sunken.

Un dat dat so is, dat nehmt wi hen un lot‘ uns vun ’n drulligen Roboter den Kaffe bringen. Mi dücht de Minsch is würkli ’n dösiged Tier…

In düssen Sinn

Wenn dat üm’t Fernsehn geiht, gifft veele Sennung‘, de ick noch nie sehn heff. Dat güllt ganz besünners för Seepen-Opern, de nu je „Daily Soaps“ heet‘. Ick segg dor liekers Seepen-Opern to, ook wenn ick mi dor ni sünnerli för interesseer.

Wenn mi to’n Bispeel een‘ froogt, wo de Wichtigsten Lüüd bi „Sturm der Liebe“ heeten doht, denn mutt ick passen. Vun de Serie heff ick bet hüüt ganz genau null Sekunnen sehn.

Jüst so verhölt sick dat mit „Rote Rosen“. De kinn ick blots ut‘ Bloom-Geschäft. Overs dat is noch lang ni allns. Man mutt sick wunnern, wo veele vun düsse Serien dat intwüschen gifft. „Alles was zählt“ heet ’n wiedere dorvun. Dat heff ick jüst lehrt. Hüüt kümmt dor de Folge „Hält Charlie dicht?“ Hmm… Is Charlie ’n Hund? Man weet dat ni.

Bi „Unter uns“ heet de Folge de morns halvi teihn kümmt, „Benedikt tappt in Patrizias Falle“. Oha. Dor geiht dat hoch her. Ünner uns kümmt hüüt Obend overs nochmol, un twor mit dat Kapitel „Stella verrät ihre Prinzipien“. Ick weet ni, wat man dorvun holn mutt. Ick kinn Stella ni.

Vun de Serie „Gute Zeiten, schlechte Zeiten“ gifft dat intwüschen al över 8000 Folgen. Ick heff overs keen eenzige dorvun sehn. Hüüt geiht dat dor jedenfalls üm „blinden Hass“. Dat’s je fürchterli.

Bi Sturm der Liebe froogt sick Ana hüüt, wat se sick dormit övernohm‘ hett, as se dat Gestüt op Gut Thalbach övernohm‘ hett. Ick weet dat ook ni. Veellicht weet Charlie dat.

Dat is meist gor ni to glööven, wo veele vun de Serien jeden Dag över de Mattschiev‘ flimmert. Un ick heff noch gor ni all optellt. Dor kümmt je ook noch all de Gerichts-Serien to. De Richters Barbara Salesch un Ulrich Wetzel sünd beide sogor tweemol an Dag in TV-Gerichtssool. Dorvun, sick all den Krom antokieken, kunn man ’n Vulltied-Job moken.

De Serie Charité is je so’n Mischung ut Seepen-Oper un Speelfilm-Reeg – opwänniger produzeert. Dor gifft dat nu ook ’n niede Staffel vun.

De speelt 25 Johr in de Tokunft. De annern Staffeln hebbt in de Vergangenheit speelt. Tscha, veellicht kümmt ni mol mehr de TV-Dokters mit de Gegenwoart trech…

In düssen Sinn

Mien Levdag weer ick noch ni in de Schweiz. So richti veel weet ick ook gor över den Alpenstoot.

Ut mien Kinnertied weet ick, dat Heidi, de Alm-Öhi un Ziegenpeter in de Schweizer Bargen levt, dormols hebbt se dor tominst levt. Ick weet, dat man in de Schweiz över veel mehr afstimmen kann, as bi uns. Dat heet, de Börgers hebbt mehr influss op de Politik. Ick weet, dat Fohrrad dor Velo heet un Melkkanne heet Milchmaschterli. Denn gifft dat dor ook noch Klocken un Schokolod.

Dat weer’t denn overs ook so tehmli. Dat eenzige, wat ick sünst noch weet, is, dat de Schweiz „neutral“ is. Wenn twee Stooten sick strieden doht, hölt de Schweiz sick dor rut. Sogor de Banken in de Schweiz sünd neutral. De is dat annerlei, wonehm dat Geld, wat dor liggt, herkümmt.

Wat in anner Länners Stüüern op de dorste Moneten fälli sünd oder wat dat Geld ut düstere Geschäfte kümmt, dat is de Banklüüd dor egol. 

Se sünd neutral. Un so harr ick mi gor ni dinken kunnt, dat de Schweiz Kummer mit dat Klima harr. Ick heff dacht, de sünd sogor CO2-neutral. Harr mi een seggt, dat blots frische Luft entsteiht, wenn man in de Schweiz Briketts opbrennt – ick glööv, ick harr dat glöövt.

Dat stimmt overs gor ni. Dorüm hebbt nu ’n Schwung öllere Fruunslüüd ut de Schweiz ehr Land verklogt, weil dat to weni gegen den Klimawannel deiht. Un dat Europäische Gericht för Minschnrechte in Straßburg hett de Seniorinnen Recht geeven. Dat Gericht hett seggt: „Leeve Lüüd, de Schweiz deiht to weni gegen den Klimawannel.“ Jo, un wat passeert nu? Wat för Folgen hett dat Urdeel? Ni würkli veel. Dat „kunn“ angohn, seggt Experten, dat de Schweiz nu mehr gegen den Klimawannel dohn mutt. Wo genau dat uttosehn hett un wo dat nowiest warrn schall, dat weet in Oogenblick ni mol de Alm-Öhi.

Annere Klogen in düsse Richtung sünd denn ook afwiest worrn. To „abstrakt“ hett dat Gericht seggt.

Wenn man dat also mol allns tosomfoten deiht, denn ist dat ünnern Streek datsülbige, as wenn een seggt: In Köller brennt noch Licht. Ick heff dat overs al utmokt…

In düssen Sinn

An un för sick harr de Gretchenfroog – „wo hölst du dat mit de Regioon“ – je beter in de vörige Week, in de Osterweek passt. Denn ook all de Lüüd, de mit den Glooven nix an de Frisuur hebbt, nehmt de frie’n Fierdoog doch gern mit.

Liekers will ick mi düsse Week mol mit Goethe sien Faust befoten, in den je de Greetenfroog un veele annere Snacks vörkümmt, de Intog in unsen Sprookgebruuk holn hebbt. Un ick befot mi dormit so’n beten in eegene Sook, as man seggen kann.

Jens Rusch ut Brunsbüttel hett mi nömli froogt, wat ick Lust harr mit em den Faust op Platt to leesen. Den Hulsteenschen Faust ut de Feller vun Frie’ch Hans Schaefer. Vör Publikum. In’t Marner Stotklubmuseum, wo jüst Jens sien Faust-Radeerungen un Gemälde to sehn sünd. 

Na jo, ick harr ni blots Lust, ick heff mi düchti ehrt föhlt, dat so’n grooten Moler und Bildhauer an mi dacht hett. 

Nu weet ick je, wo dull Jens üm de Eck dinken kann. Dat doh ick sülms je ook gern. Dor weer mi klor: Dat ward ’n Spoß. 

Besünners, weil Goethe een vun de allergröttsten Üm-de-Eck-Dinkers weer. He kunn uns Minschen düchti op de Fingers un noch mehr achter de Oogen kieken: Sogor denn, wenn wi meist allns hebben künnt, interesseert uns bilütten jüst dat, wat even ni op de Spieskoart steiht. 

Un allto oft dinkt wi in‘ entscheedenden Oogenblick ni mit’n Kopp sünnern mit dat, wat wi mang de Been hebbt.

Dat weer to Goethe sien Tied al so un dat is jümmers noch ni anners. Dösig ne? Overs so is dat nu mol. 

Geiht dat op’t Letzt‘ mit’n Düüvel to? Ook denn, wenn een gor ni an em glöövt? Wokeen den Faust mol leest hett – annerlei, wat dat ’n Plichtlektüre in de School weer oder wat man dat lütte Book ut echted Interesse leest hett – de weet tominst, wo Goethe dat sehn hett. 

Wat Jens un ick dorvun mit veel Humor un üm de Eck dinken mokt hebbt, dat kann man sick morn Nomeddag klock dree in’t Marner Skotklubmuseum bekieken. Mit Peter Neuber snackt uns sogor ’n echten Lehrer un Plattkinner dat Vörwoord. Wi freut uns al as lütte Düüvels…

In düssen Sinn