De Döschkassen

By Heiko KrollComedy Society & Culture News News Commentary

De Döschkassen episodes

March 14, 2024 Richtige Intelligenz
„Jungedi, wat hest du ’n denn dor för ’n oln Röchel“, hett annerletzt mol ’n Kumpel to mi seggt un dorbi op mien Klappkompiuter wiest. „Wat meenst du mit old“, heff em froogt, „de is doch erst,... de is...“, nu fung ick dat Överleggen an. Wann harr ick dat Dings noch köfft?
Hmm. Dat mutt bilütten 2009 ween hebben. Dat sünd, wenn ick richt tellt heff, bet hüüt bummeli 15 Johr.
Na jo, so dree-, veermol heff ick den Kassen al ut’neen hatt. Mol harr de Stromansluss ’n Wackelkontakt, mol hett de Köhlpropeller huult un ’n beten Towennung bruukt, mol weer de Akku in Dutt.
Overs ünnern Streek löppt de Apparot jümmers noch ganz wunnerbor. Man kann dormit schrieven, man kann dormit in’t Internet gohn, E-Mails verschicken un sogor empfang‘, wenn man dat will.
Fotos un Filme kann man dormit bekieken un verännern, Musik heuern un Tonopnohm‘ bearbeiden. All dat un wiss noch mehr geiht mit dat Dings. Dat heff ick natüüri ook mien Kolleg‘ vertellt. De keek mi nu ganz skeptisch an.
„Aha. Un wat hest du för dat Genöög dormols denn betohlt“, hett he denn froogt. Tscha, dat weern 350 Euro. Gebruukt. Veellicht hett mien treu’n Kammerod also sogor al 16 Johr op’n Puckel. Man weet dat ni.
Mien Kumpel weer dat jedenfalls veels to old. Besünners hüütigendogs, wo man je so veel mit künstliche Intelligenz moken kunn.
Na jo, heff ick meent, wi schüllt doch nohalti wirtschopen. Un wenn man in desülbige Tied, in de anner Lüüd sick fief frische Reekners köfft, mit een utkümmt, denn hett dat no mien Ansehn nix mit künstliche sünnern veel eher mit richtige Intelligenz to dohn. De Reekner löppt je ook ni mit Benzin oder Diesel. Wat will man mehr. Mien Kolleg‘ säh overs, dat he op so’n oln Krom ni rümmaneuvern much, weil man doch mit de Technik schreedholn mutt.
Na jo. Wat schall ick seggen?
Dat mach je ween, dat ick op mien Oart mennige Lüüd jüst so oldmodsch vörmkom as mien Klappreekner.
Overs dat is mi annerlei. Denn: Doh, wat du wullt, de Lüüd snackt doch...
In düssen Sinn
3 min
March 08, 2024 Dat Dorste mit dat Dorste
Dat Dorste mit dat Dorste
Wenn man mol över de eegne Sprook nodinkt, denn kann man sick bilütten düchti wunnerwarken, ne.
Nu heff ick an’t Enn vun de vörige Week Post kreegen. Ut Borg. Un twor vun een Mann, den ick hier eenfach mol „Norbert“ nööm‘ will.
Norbert hett mi schreeven, dat he, jüst so as sien Fruu (ehr nööm ick eenfach mol Norbert sien Fruu), sick friedags jümmers op ’n Döschkassen freut. Nu sünd de beiden ni mit Plattdüütsch opwussen overs se möögt de Sprook un wat se ni direkt verstoht, künnt se sick tomeist ut’n Tosomhang trechklabüstern.
Blots bi een Woord hebbt se ni so recht rutkreegen, wat dat bedüüden schall: Bi dat „Dorste“ nömli. Norbert hett mi beeden, em mol to verkloogfiedeln, wat dat Dorste bedüüden schall.
Tscha, dor heff ick sülms erstmol över nodinken musst. För mi is dat Dorste jümmers al dat Dorste ween. Eenfach so. Norbert un Norbert sien Fruu hebbt sick tosomriemelt, wat dat sowat heeten kunn as „das Vorhandene“. An un för sick ’n goode Idee. Denn dat Dorste kümmt je vun dor, also vun dat, wat dor is.
Overs dat dreept dat ni würkli un ni ganz un gor.
As mol ’n plattdüütsche Fruu ut ’n Dithmarscher Dörp op Hochdüütsch no’n bestimmted Huus froogt worrn is, hett se versöcht de Antwoord op Hochdüütsch to geeven: „Ich mein‘ das ist das ‚daste‘ Haus.“ Dat Dorste kann also dat dor dröven heeten. Bilütten ward dat je overs ook to Slitzohrn seggt: „Bi den Dorsten“ oder „de Dorsten muttst du geheuri oppassen.“ Dat Dorste kann sick ook op ’n dösigen Sachverhalt betrecken.
In‘t Hochdüütsche kann man dat overs ni würkli een to een översetten, denn dat is’n „Superlativ“ vun dor, so as duun, duuner, an duunsten – also dor, dorer an dorsten. Dat gifft dat blots op Platt.
Un eegentli is dat Dorste op Platt je ’n Lokaladverb, as Schoolmasters un all de dorsten kloogen Lüüd so seggt. Dat kann overs ook ’n Präpositschoon ween oder ’n Nomen mit vörgestellten bestimmten Artikel.
Jungedi, mi ward al ganz blümerant.
Dat Dorste mit dat Dorste is gor ni so eenfach, mutt ick seggen…
In düssen Sinn
3 min
March 01, 2024 Jümmers dat richtige Niwoh
Jümmers dat richtige Niwoh
Ole Autos finn ick je good, ne. Wülk also, de so wenig Elektronik an Bord hebbt, as dat blots geiht.
Intwüschen kann ick dor overs ni mehr vör wechloopen. Dat Auto, dat ick in Oogenblick fohr, is mit so veele elekronische Hölpers utrüst‘, wat ick wohrschienli gor ni all dorvun kinn.
Een vun de Hölpers wiest mi to’n Bispeel an, wat ’n Parklücke groot genog is. Dat finn ick je ook würkli nett un opmarksom, overs dat kann ick je ook so sehn, also eenfach mit mien Oogen. Sotoseggen mit dat optische Assistenz-Süsteem, dat ick sülms in Kopp sitten heff. Dorüm bün ick ook al in Lücken rinfohrt, liekers dat dorste Süsteem seggt hett, wat de Platz dorför to knapp weer.
Denn is dor ook noch so’n Assistent, de mi warnt, wenn ick ut de Spoor kom. Fohr ick to wiet links, denn rummelt dat an mien linke Morsback‘. Fohr ick to wiet rechs, rummelt dat an de rechte Morsback‘. Un rummelt dat in de Meern, denn hett dat nochmol ’n ganz annern Grund…
Mitünner rummelt dat overs ook op de een‘ oder anner‘ Sied, wenn gor nix los is. Oder dat rummelt eenfach ni, wenn dat eegentli rummeln schall.
Wat noch? Och jo, de „Energiespoormodus“: Wenn de Motor ut is un ick Radio heuern will, denn geiht de Musik un de restliche Elektrik no bummeli 10 Minuten ut. Besünners drulli is, dat man in mien Auto ook DVDs kieken köön schall. Dat geiht overs blots, wenn de Motor ut is. Hmm. Denn mutt man sick wohrschienli Filme utsööken, de körter as 10 Minuten sünd.
Mennige vun de dorsten Assistenz-Süsteeme harr ick al lang rutsmeeten, wenn dat gung.
Nu will ick je ni jammern, denn dat weer je jammern op’n hoged Niwoh – oder „Niveau“, as de Franzos‘ seggt, un mien Auto kümmt ut Frankriek.
Dat kümmert sick sogor ganz alleent üm dat richtige Niveau, denn dat hett ’n „Niveaureguleerung“.
Wat dat richtige Niwoh angeiht, drückt sick veele Staatsföhrers je al siet ’n ganze Wiel al recht unglückli ut. Veellicht bruukt de ook mol ’n Niveaureguleerung. Oder de ehr Mikrofone mööt eenfach mol in richtigen Oogenblick in‘ Energiespoormodus gohn…
In düssen Sinn
3 min
February 23, 2024 Hochverarbeidt
Man ward je ni jünger, ne. Fröher heff ick mol dacht, wat dat bi mi anners kom‘ wurr. Keem overs ni so.
Un weil ick mi mit de Johrn je al dat een‘ oder annere Mol mit Mediziners ut’neensett heff, bün ick dorop kom‘, dat ick mi gesünner ernährn will.
Nu weet man op dat Gebiet je ni, wat richti un wat verkehrt is. Man kann je ni dat eene Leven lang blots Gemüse eeten, üm datsülbige Leven nochmol vun vöör antofangen, dorbi overs wat ganz anners to eeten.
So harr man twor ’n wunnerborn Vergliek, dat geiht overs leider ni. Also mutt man sick op dat verloten, wat de Dorsten vertellt, de seggt, dat se sick dormit utkinnt.
Also heff ick rescherscheert. Un bi mien Rescherschen bün ick jümmers weller op den Begriff „hochverarbeitet“ stött. Dorbi geiht dat üm hochverarbeidete Levensmiddels. De schüllt blang to veel Zucker un to veel Solt nömli ook ni so gesund ween. So heff ick wieder Reschersche dreeven.
Hochverarbeidt sünd nömli ni blots Deepköhlpizza, also Mafiatorte ut’n Froster oder den mehrsten Knabberkrom. Nä. Hochverarbeidt sünd ook Mettwuss un alle Oarten vun Brot.
Bi so tehmli jede Wuss ward dat Fleesch dör’n Wolf drückt un mit düt un dat in‘ Kutter tosomröhrt un so wieder. Bi Brot ward dat Korn mohln un jüst so mit düt un dat tosommischt, üm no mennige annere Schreed ennli in Backoben to kom‘.
Ünnern Streek kann man seggen: Wenn man keen‘ hochverarbeidete Levenmiddels eeten will, denn mutt man den Kohl direkt vun’t Feld freeten oder ’n Swien op de Koppel in Mors bieten, wenn man mol Schinken hebben will. Hmm. Ganz scheun figeliensch. Annerlei, ick versöch wiederhen gesund to leven.
Nu warr ick je overs nie rutfinnen, wat ick mit mien Idee vun gesunned Eeten richti legen heff. Un an’t Enn ward ook mi de grimme Snitter holn, dormit ick mi de Hunn’bloom vun ünnen bekieken kann.
Wenn ick denn overs in’t Gras beeten heff – dat steiht al fast – denn warr ick mi inäschern loten.
Un dormit warr ook ick sülm toletzt „hochverarbeidt“ ween…
In düssen Sinn
3 min
February 16, 2024 Kampfpiloten un Schinkenbüddels
Leesen vergröttert bilütten je dat Weeten, ne. Wat man achteran Klööger is, dat hangt dorvun af wat man leest. Ick to’n Bispeel weet siet ’n poor Doog dör’t Leesen vun so’n Studie, dat de Mannslüüd in Düütschland in Dörsntitt 19 Ünnerbüxen ehr Eegen nöömt.
Dor heff ick je glieks mol nokieken musst. Also ni bi annere Mannslüüd, sünnern in’t Schapp bi uns to Huus.
So. In’t Schapp weern 22. Dree weern in de Waschköök ünnerwegens un een harr ick jüst över’n Mors. Dat mokt tosom 26 Stück.
Kiek an: Wat de Ünnerbüxen angeiht, ligg ick licht över’n Snitt.
Veel interessanter finn ick overs den Vörgang, dör den de Ünnerbüxen överhaupt erst in’t Schapp rinkümmt. Dat Inkööpen vun Kleedosch meen ick. Dor gifft dat ook ’n Studie över, un no de dorste Studie geiht dat Inkööpen vun Sooken to’n Antrecken uns Mannslüüd geheuri op de Pump.
Wi entwickelt bi’t „Schoppen“ gohn desülbigen Stresswerte as’n Kampfpilot in Insatz.
Un dat Ergeevnis kann ick ganz un gor bestätigen. Mitünner geiht mi de Blootdruck al dör de Deek, wenn ick blots wat to Eeten inkööpen schall. Wenn ick denn ennli mit mien Porree an de Kass stoh, bün ick al so richti rünner mit de Nerven. Ick weet ook ni, worüm dat so is. Fruunslüüd schient dat nix uttomoken. Dösig.
Overs nochmol trüch to de Ünnerbüxen. Bi’t Telln heff ick mi de Schinkenbüddels mol genauer bekeeken. Un ick mutt gestohn, dat de een oder anner dorvun al so’n beten in de Johrn kom is. Blangbi: Ünnerbüxen ward mit ehr Öller ni beter, de mööt ni riepen. De een oder annere warr ick wohrschienli bald mit in de Warksteed nehm‘. Ni to’n heelmoken, sünner üm se in ehr tweeted Leeven as Lappen bi’t Klütern an de Fohrröd oder so intoföhrn. Overs ick glööv, Ünnerbüxen kööpen goh ick erst weller, wenn de Antohl dorvun op’n eenstelligen Beriek togeiht.
Dat is mi eenfach to gefährli för mien Metabolismus. Man ward je ook ni jünger. Dor mutt man ni wegen jeden Snurrkrom op’t Ganze gohn. Un ick glööv, wat dat heuchste Tied ward, dat ick över wat anners nodink…
In düssen Sinn
3 min
February 09, 2024 Wünsch di wat
„Gesundheit“ wünscht man, wenn een niesen deiht. Wenn man fief oder teihn oder foffteihn Johr jung is, denn wünscht man sick Speeltüüch, ’n niedet Fohrrad oder hüütigendoogs wohrschienli ’n Speelekonsole. All sowat wünscht man sick, overs wiss keen Gesundheit.
Twindi, dördi Johr wieder süht de Welt al ganz anners ut. Un wenn erstmol ’n fief oder ’n süss bi’t Öller an de erste Steed steiht, denn wurr man direkt jedet Fohrrad un jede Speelekonsole dorför hergeeven, dat man blots gesund blieven dörft. Tscha, so ännert sick düt un dat.
Dorüm wünscht wi unse Leeven je ook Gesundheit in de Koarten to’n Gebuurtsdag oder to Wiehnachen.
Un even ook, wenn een niesen deiht, seggt wi dat ganz automatisch.
De dorste Mood is je al old. Richti old sogor. De Bruuk kümmt noch ut de Pest-Tied. Dormols hett man overs ni de Lüüd Gesundheit wünscht, de niest hebbt, sünnern sick sülbens, op dat man blots ni krank wurr.
Na jo, an un för sick kann man sick in Gedanken je ook utsööken, wokeen de Gesundheitswunsch güllt. Man seggt je „Gesundheit“ un ni, „ick wünsch ‚Di‘ Gesundheit“.
In Gedanken kann dat also ook heeten, ick wünsch mi oder mien Oma oder mien Katt Gesundheit.
Dorbi schall man al lang ni mehr Gesundheit seggen, wenn een‘ niesen deiht, seggt Knigge. No den sien Regeln heet dat nömli, wat dat kommenteern vun’t Niesen mit „Gesundheit“ ’n unnötige „Dramatiseerung vun‘ körperlichen Verfall“ dorstellt. Jungedi, wat ’n Drama. Dat is allns ni so eenfach.
Ick weet ook gor ni, worüm dat so wichti un richti ween schall, wat de dorste Adolf Freiherr Knigge un sien Nofolgers seggt hebbt.
Un de Sook mit dat wünschen hett je ook noch ’n grooten Hoken: Wenn man ni jüst zaubern kann as Harry Potter un wenn man keen echte Wunderlampe in’t Schapp hett, denn kann man sick krumm un scheev wünschen, dor röhrt sick gor nix vun.
Is so, ick heff dat al mehrmols utprobeert. Na jo, bi uns‘ Wünschen geiht dat je mehr üm’t Hopen. Un dorüm wünsch ick uns all tosom ’n grooten Barg Gesundheit…

In düssen Sinn

3 min
February 01, 2024 Fachkämpfermangel
Fachkämpfermangel
In Oogenblick hebbt wi süss Millioon‘ Arbeidslose in’t Land. Liekers sünd veele Arbeidssteeden unbesett. So mööt Fachkräfte ut‘ Utland her.
Dor sünd veele Lüüd över an schimpen. Oftmols kiekt de dorsten Schimpers overs obends Football in’t Fernsehn. Bunnesliga.
Un bi de Bunnesliga is dat je al lang ’n oln Hoot – Fachkräfte ut anner Länners to rekruteern.
Wenn man dor mol genau henkiekt, denn kümmt ni all to veele Speelers ut de Städte för de se op’n Bolzplatz goht. Dat is de Fans vun de Vereene ook annerlei. Hauptsook se winnt ehr Speele. Blangbi gifft dat ook ’n ganzen Schwung düütsche Speelers, de in utlännische Football-Ligen ehr Geld verdeent.
Jo. Un wat in‘ Football geiht, dat kunn jüst so in annere Berieke gohn. Dor is ook Boris Pistorius, unsen Verteidigungsminister op kom‘, denn de Bunneswehr hett to weni Personol, dor herrscht „Fachkämpfermangel“.
Dorüm kann Pistorius sick good vörstelln Soldoten ohne düütschen Pass in de Kasern‘ to holn. Över Transfersummen is noch nix bekannt, dat Ganze is je noch an wassen.
Overs mi dücht, dor gifft dat so’n ganz lütten Hoken, wenn man sick dat genauer för Oogen föhrt un bi den Vergliek mang Football un Militär blifft: In de Bunnesliga speelt för düütsche Vereene to’n Bispeel US-Amerikoners gegen Argentiniers.
Dorüm weer dat ook keen Probleem, wenn ’n Ünneroffizier ut Kenia för ’n Kaserne in Hessen gegen ’n Feldwebel ut Norwegen för ’n Kaserne in Sachsen in’t Maneuver treckt. So as in de Bunnesliga even.
Bi internatschonale Meisterschopen süht dat in‘ Football overs ganz anners ut. Dor kickt de Ami weller för de USA un de Argentinier för sien Land. Annerlei in wat för Vereene se sünst in de Lannesligen speelt.
Nu will ick wiss ni hopen, wat dat bi’t Militär noch mol Europa- oder Weltmeisterschopen geeven ward. Overs wenn doch – kämpft de Kenianer denn weller för Kenia un de Norweger för sien Land, wenn’t üm’t Ganze geiht? Ick weet dat ni. Overs ick wurr Herrn Pistorius doch an’t Hart leggen, dor weenstern mol in de Halftied-Paus‘ över notodinken…
In düssen Sinn
3 min
January 26, 2024 Wunnersome Vogels
Mitünner mutt man sick je wunnerwarken ne. Wat mi jümmers in Winter wunnert – besünners, wenn dat in Winter ook mol kold bi uns is, dat sünd de Vogels. Je lütter se sünd, je mehr mutt ick mi över ehr wunnern. Över Lüntjes, also Sperlinge, to’n Bispeel. De Piepmätze sünd je würkli ni groot, un se flücht in Winter ook ni no Afrika in Urlaub.
In‘ Füsik-Ünnerricht heff ick mol lehrt, wat dat bi lütte Sooken veel gauer geiht, dat se de Temperatur vun de Ümgevung annehmt, as dat bi groote Sooken de Fall is.
Ick bün je recht wat grötter as ’n Lüntje, ne. Liekers fang ick recht gau dat freern an, wenn dat buten kold is. Un wenn ick mi ni beweg‘, wenn ick bi Frost un Wind eenfach blots so in de Gegend rümstoh, denn heff ick mien Verköhlung al meist seeker.
Nu kiek ick vun dor, wo ick jümmers den Döschkassen schriev, ut‘ Finster op de Kroon‘ vun ’n lütten Beukenboom, op Hochdüütsch seggt man „Buche“ dorto. Wenn man ’t genau nehmt, denn is dat sogor ’n „Blutbuche“, ’n Blootbeukenboom.
Un dor boben in de Twiegen sitt jümmers so mang fief un teihn Lüntjes. De sitt dor mitünner sogor de ganze Nacht to’n sloopen.
Nu stellt sick mol vör, Ju schulln de ganze Nacht buten op ’n Boom sitten un sick borfoot an so’n koln Twieg fastkralln. Alleent vun den Gedanken fangt man je al dat Beevern an.
Dorüm froog ick mi: Wo mokt de lütten Geiers dat? Worüm verwannelt de Lüntjes sick in so’n kole Nacht ni in Iesvogels?
Kunn man vun de Mini-Flattermänner veellicht sogor wat lehrn? De heizt nömli ni mit fossile Brennstoffe. Ook ni elektrisch oder mit ’n Wärmepump.
Veellicht schull man dor mol ’n Papagei no frogen, de good snacken kann. Denn wurr dat Gebäudeenergiegesetz, to dat man ook Heizungsgesetz seggt, veellicht ganz anners utsehn.
Na jo, man weet ni, wat dor för ’n kruden Krom bi rutkom‘ weer. An’t Enn stunn dor noch bin, dat wi uns Fellern implanteern loten schulln.
Annerlei. Wat dor op jeden Fall bi över blifft, is, dat ick mi ook in Tokunft wieder in Winter över de lütten Lüntjes wunnern warr...

In düssen Sinn
3 min
January 18, 2024 Obends weller no Huus
Obends weller no Huus
Jo, ick kann mi noch good dorop besinn‘, wat ick dat erste Mol in de DDR ween bün. Mit’n Bus weer ick dor. Mien Vadder weer de Busfohrer, un man schreev dat Johr 1987.
Wi sünd an Grenzövergang Schlutup bi Lübeck vun een Düütschland in’t annere fohrt. Dat gung denn över Wismar no Rostock un Warnemünde, bet dat obends weller trüch gung.
Un al ’n poor Kilometer no’n Grenzövergang heff ick mien Vadder froogt, worüm de Strooten dor denn so slecht weern. Wi sünd mit ’n ganz modern‘ Reisebus ünnerwegens ween. Overs sogor in dat kommodige Auto hett dat rummelt, dat man sick de Tähn fastholn wull.
Mien Vadder hett mi dormols seggt, dat de Regeerung in de DDR slecht wirtschop hett. Dorüm weern keen Geld un keen Materiol dor, üm de Strooten to repareern.
An düsse Wöörd vun mien Oln mutt ick hüütigendoogs jümmers öfter dinken, wenn ick mit mien Auto dör Dithmarschen pulter, denn so langsom krieg ick weller Angst üm mien Tähn.
1987 wurrn de Strooten bi uns noch saneert, wenn se in Dutt weern. Loter wurr denn jümmers mehr flickschoostert. Denn wurrn de Flicken flickt. Un intwüschen ward geföhlt mehr Schiller opstellt, wo „Schlechte Wegstrecke“ op to leesen steiht, as dat wat repareert ward. Dor dörft man denn blots 30 fohrn. An de dorsten Steeden ward ook gern blitzt. So kann de Fiskus sick de Buuarbeiden spoorn un gliektiedig ook noch Geld verdeen.
Wat dat ni ewig so wiedergeiht, schient mennige Entscheeders in Berlin, wiet achter Schlutup, annerlei to ween. Overs de hebbt je jüst Besöch vun ’n poor Landwirte. Un de Buuern hebbt ook Schiller mitbröcht. Op een Stunn: „Wi künnt gor ni so veel Schiet transporteern, as düsse Regeerung produzeert.“
Un so langsom ward de Regeerung ook so’n beten bang. Denn vun so dicht hett wohrschienli noch ni mol de Landwirtschopsminister Cem Özdemir so veele Treckers sehn.
De eegentliche Hoken is overs, dat wi hüüt Obend ni eenfach weller no Huus fohrn künnt, wo allns in Ordnung is. Wi „sünd“ hier to Huus...
In düssen Sinn
3 min
January 11, 2024 Koarten-Speele
Koarten-Speele
Hebbt Ju al mol tellt wo veele Plastik-Koarten Ju mit sick rümsleept? Ick heff süss dorvun. Twee vun mien Bank, een vun mien Krankenkass‘, een vun Autoclub un denn mien Personolutwies un mien Föhrerschien.
Wo ick all bi’n Föhrerschien bün: Mien Madam mutt ehr Patent nu ook ümtuuschen. Se hett noch de rosa „Pappe“. De harr ick ook mol. Overs no dat ick mol mien Knipp mit all mien Poppiern dorbin verlorn harr, geev dat keen Alternative to’n Scheckkoarten-Format. Mien Vadder harr bet to sien letzten Dag noch sien grau’n „Lappen“. Dor kunn man nix mehr op leesen. Blots dat Foto weer dor noch op to sehn. Un liekers hett de Schien noch golten. Un dat in Düütschland! Dat kann man meist gor ni glööven. Weer overs so.
Bi düssen bürokratischen witten Placken is dat natüürli ni bleeven.
Dorüm mutt ook mien Seute to’n Ümtuusch vun ehrn Föhrerschien. Un düssen Ümtuusch mutt se ook noch sülms betohln.
Overs worüm mutt se dorför betohln? Se funn ehr rosa Pappe je ganz wunnerbor. Un wenn se ehrn frischen Scheckkoarten-Föhrerschien hett, ward se dormit jüst so good Auto fohrn as nu. Ick finn‘, wenn anner Lüüd wüllt, dat mien Madam ’n frischen Föherschien kriegt, dat düsse Lüüd denn ook sülms dorför betohln schulln.
Överhaupt: Wi schüllt doch all tosom den Gebruuk vun Plastik inschränken. Nu stellt sick dat mol vör: bummeli 50 Million‘ Plastik-Föhrerschiens. Wat is dat för’n Huupen? Dor kunn man wohrschienli alle Trabbis ut de DDR vun nobuun. Tscha, dat gifft Sooken, de kann man sülms denn ni verstohn, wenn man sick ganz dull anstrengt.
Ick finn je, wenn al Plastik, denn een Koart för allns: Utwies, Krankenkass, Fitnessklub un so wieder.
Un wenn man ’n Fohrpröövung mokt, ward de Koart op’t Amt in so’n Computer rinsteekt, denn piept dat eenmol un zack dörft man Auto oder so fohrn. Overs ick glööv mit düssen Gedanken is man veels to wiet för unse Verwaltung. Dor brennt alle Seekerung‘ dör, wenn so‘n Idee bekannt ward. Dat wüllt wi je ni.
Denn lot mien Madam man ehrn Koarten-Föhrerschien afholn...
In düssen Sinn
3 min

About De Döschkassen

From the publisher's feed

Seit Jahren hat sie einen festen Platz in den Tageszeitungen von Boyens Medien: die Platt-Kolumne „De Döschkassen“. Mit dem etwas anderen Blick auf die Themen, die die Menschen bewegen, aber auch für…