Dilli Dali

പ്രീയപ്പെട്ട സുഹൃത്തേ ,  

യുദ്ധം ആരേയും സനാഥരാക്കുന്നില്ല , എന്നാൽ നിരവധി മനുഷ്യരേയും സമൂഹങ്ങളേയും അത്  അനാഥമാക്കുന്നുണ്ടുതാനും . യുദ്ധം കഷ്ടപ്പാടിനേയും വേർപാടിനേയും ഉൽപാദിപ്പിക്കുന്ന ഫാക്ടറിയാണ് , അത് വ്യവസായം തന്നെയാണ് . എന്നാൽ ആസിയ സെർപിൻസ്ക എന്ന ഉക്രൈൻകാരി എഴുപത്തേഴാം വയസ്സിലും അനുപമഭംഗിയുള്ള ജീവിതം ജീവിക്കുന്നു. ഭൂമിയിലെ സർവ്വജീവജാലങ്ങളേയും സ്നേഹിക്കുമ്പോൾ യുദ്ധത്തിനെതിരേ അവർ നൽകുന്ന പരമോദാര ദർശനത്തിൽ നിന്നും ഈ ലക്കം ദില്ലി -ദാലി ജനിക്കുന്നു.     എഴുത്തച്ഛൻ യുദ്ധകാണ്ഡം തുറക്കുമ്പോൾ അവിടെ വാനരർ മാത്രമല്ല കുതിരകളും ആനകളും ഉണ്ടായിരുന്നു . വ്യാസൻ്റെ കുരുക്ഷേത്രത്തിലും ഹോമറിന്റെ ഇലിയഡിലും അവയുണ്ടായിരുന്നു .  1990 -91 കാലത്തുനടന്ന കുവൈത്ത് യുദ്ധത്തിൽ അവിടുത്തെ അന്താരാഷ്‌ട്ര മൃഗശാലയിൽ ബോംബുവീണ് 85 ശതമാനം മൃഗങ്ങളും കൊല്ലപ്പെട്ടു . ആധുനിക സമൂഹത്തിൽ കാലാനുഗതമായി പരിണമിച്ചുണ്ടായ എല്ലാ മൃഗാവകാശനിയമങ്ങളും കാറ്റിൽ പറക്കുന്ന കാലമാണ് മനുഷ്യനും മനുഷ്യനും , ഗോത്രവും ഗോത്രവും , രാഷ്ട്രവും രാഷ്ട്രവും രാഷ്ട്രങ്ങളും രാഷ്ട്രങ്ങളും തമ്മിൽ ആയുധമെടുത്ത് പോരടിക്കുമ്പോൾ പിറക്കുന്നത് . മൃഗാവകാശപ്രവർത്തകർ പുറത്തുവിട്ട ഒരു അമേരിക്കൻ സൈനിക പരിശീലനവീഡിയോയിൽ ഉദ്യാനങ്ങൾ കലാപരമായി രൂപകൽപന ചെയ്യുന്ന കത്രിക കൊണ്ട് ആടുകളുടെ കാലുകൾ മുറിച്ച് അതുകണ്ട് ആസ്വദിക്കുന്ന സൈനികരെ കാണാം . ഇക്കാര്യത്തിൽ യുദ്ധനിയമങ്ങൾ എന്താണ് പറയുന്നത് ?  മനുഷ്യൻ ചെയ്യുന്ന യുദ്ധങ്ങളിൽ ഇരകളാകുന്ന മൃഗങ്ങൾക്കുവേണ്ടി ഒരു പോഡ്‌കാസ്റ്റ്.  അവസാനം ഒരു ഗാനം ചേർത്തിരിക്കുന്നു . പുല്ലിൽ , പൂവിൽ , പുഴുവിൽ , കിളിയിൽ , വന്യജീവിയിൽ , വനചരനിൽ ജീവബിന്ദുവിൻ്റെ അമൃതം തൂകിയ ലോകനായകനോടുള്ള പ്രാർത്ഥന . മലയാളത്തിലെ എക്കാലത്തേയും നല്ല പ്രാർത്ഥനകളിൽ ഒന്ന് . ഭാസ്കരൻ മാഷിൻ്റെ സ്നേഹദീപം മിഴിതുറക്കുന്ന ഗാനം .  പോഡ്‌കാസ്റ്റ് headphones ഉപയോഗിച്ച് കേൾക്കണമെന്ന് അഭ്യർത്ഥിക്കുന്നു .  

സ്നേഹപൂർവ്വം   

എസ് . ഗോപാലകൃഷ്ണൻ  

09 മെയ് 2022

https://www.dillidalipodcast.com/

പ്രിയ സുഹൃത്തേ, 

'ഹിന്ദു -മുസ്‌ലീം വിഭജനം ഉണ്ടാക്കിയാൽ ഇന്ത്യൻ സമൂഹത്തിലെ വൈജാത്യങ്ങളെല്ലാം ഇല്ലാതായി വിശാല ഹിന്ദു ഐക്യത്തിന് വഴിയൊരുക്കുമെന്ന ചിന്ത തെറ്റാണ്', ഇന്ത്യയുടെ മുൻ വിദേശകാര്യ സെക്രട്ടറിയും മുതിർന്ന സ്വതന്ത്ര ചിന്തകനുമായ ശ്യാം സരൺ പറയുന്നു .  സമീപകാലത്ത് രാജ്യത്തുനടന്ന സംഭവ വികാസങ്ങളുടെ വെളിച്ചത്തിൽ അദ്ദേഹം എഴുതിയ ആഴമുള്ള ലേഖനത്തിൻ്റെ  മലയാള പരിഭാഷയാണിത്. ഇത് ദില്ലി -ദാലിയിൽ അവതരിപ്പിക്കുവാൻ പ്രത്യേക അനുമതി നൽകിയ ശ്യാം സരണിന് നന്ദി രേഖപ്പെടുത്തുന്നു .  ഏതെങ്കിലും ഒരു വിഭജനരേഖയെ ആഴത്തിൽ കുഴിക്കുവാൻ തീരുമാനിച്ചാൽ മറ്റനേകം വ്യത്യസ്ത വിഭജനരേഖകൾ ഇന്ത്യയിൽ പ്രത്യക്ഷപ്പെടും , അരാജകത്വമാകും ഫലം , അദ്ദേഹം പറയുന്നു .  ഹമാരെ റാം , റഹീം , കരീം , കേശവ് എന്ന പ്രശസ്ത കബീർ ദാസ് ഭജൻ ശുഭ മുദ്‌ഗൽ പാടിയതും ഉൾപ്പെടുത്തിയിരിക്കുന്നു .  ദയവായി headphones ഉപയോഗിച്ചുകേട്ടാലും .  

സ്നേഹപൂർവ്വം   

എസ് . ഗോപാലകൃഷ്ണൻ  

23 ഏപ്രിൽ 2022

ഉയിർപ്പിൻ്റെ  സിംഫണി എന്ന പോഡ്‌കാസ്റ്റിലേക്ക് സ്വാഗതം .  1897 ൽ ഗുസ്താവ് മഹ് ലർ സംഗീത നിരൂപകനായ ആർതർ സെയ്‌ദിയ്ക്ക് എഴുതി , 'ഈ സിംഫണിയോടെ ഞാൻ വിശ്വസാഹിത്യത്തെ മുഴുവൻ കൊള്ളയടിച്ചിരിക്കുന്നു, ബൈബിൾ അടക്കം എല്ലാത്തിനെയും . ഒരു വിമോചിതലോകത്തെ അറിയാൻ മറ്റു മാർഗങ്ങൾ എനിക്കില്ലായിരുന്നു'  യേശുവേ , നീയെന്തിന് ജീവിച്ചു , എന്തിന് ഈ പീഡനങ്ങളെല്ലാം സഹിച്ചു ? ഇതൊക്കെ ഒരു വലിയ തമാശ മാത്രമോ ? കുരിശാരോഹണവും ഉയിർപ്പും ലളിതമല്ല , നമ്മുടെ ഓരോരുത്തരുടേയും ജീവിതം പോലെ അത് സങ്കീർണ്ണമാണ് എന്ന് മഹാസംഗീതകാരൻ  ഗുസ്താവ് മഹ് ലർ ഒരു അനശ്വര സംഗീതശിൽപത്തിലൂടെ പറയുന്നു . ഈ ലക്കം ദില്ലി -ദാലി 'ഉയിർപ്പ് ' എന്ന ആ സിംഫണിയെക്കുറിച്ചാണ് .  ദയവായി ഹെഡ്‍ഫോൺസ് ഉപയോഗിക്കുക , അത് നല്ല ശ്രവ്യാനുഭവം ഉറപ്പാക്കും .  

സ്നേഹത്തോടെ   

എസ് . ഗോപാലകൃഷ്ണൻ  

ഈസ്റ്റർ ദിനം , 2022

www.dillidalipodcast.com

പ്രിയ സുഹൃത്തേ ,  

ശ്രീലങ്കയെ അടിമുടി ഉലച്ചുകൊണ്ടിരിക്കുന്ന സാമ്പത്തികപ്രതിസന്ധിയെക്കുറിച്ച്  രാഷ്ട്രാന്തരബന്ധങ്ങളിൽ വിദഗ്ദ്ധനായ പ്രൊഫസ്സർ മാത്യു ജോസഫ് . സി സംസാരിക്കുകയാണ് ഈ ലക്കം ദില്ലി -ദാലിയിൽ.  അദ്ദേഹം ഡൽഹിയിലെ ജാമിയ മിലിയ ഇസ്‌ലാമിയ സർവകലാശാലയിൽ International Relations ൽ അദ്ധ്യാപകനാണ് .  അഭൂതപൂർവ്വമായ വിദേശകടം എങ്ങനെയാണ് ഒരു ഉപഭോഗസമൂഹത്തിൻ്റെ നിലനിൽപ്പിനെ തന്നെ ചോദ്യം ചെയ്യുന്നത് ? , ചൈനയുടെ ശാക്തികസ്വപ്നങ്ങൾ അവരുടെ പുതിയ കോളനികളെ എങ്ങനെ തളർത്തുന്നു ?,  രാജ്യത്തെ ബാധിച്ച ദുരന്തത്തെ നേരത്തേ തിരിച്ചറിയാൻ  രാജപക്‌സ സഹോദരന്മാർക്ക് എന്തുകൊണ്ട് കഴിഞ്ഞില്ല?,  ഒരാഴ്ചക്കകം ഒരുകിലോ അരിയ്ക്ക് 500 രൂപാ കൊടുക്കേണ്ടിവരുന്ന ശ്രീലങ്കൻ ജനത എങ്ങനെ ഈ ദുരവസ്ഥയെ അതിജീവിക്കും?, എന്തുകൊണ്ട് ശ്രീലങ്കയിലെ തമിഴ്‌വംശജർ ഏറ്റവും ദുർബലരായി?,  തമിഴ് വംശജരിലുണ്ടായിരിക്കുന്ന വൈജാത്യങ്ങൾ എന്തൊക്കെ ? സിംഹളവംശീയതയിൽ ഊന്നുന്ന രാഷ്ട്രീയത്തിനെതിരേ ശ്രീലങ്കയിൽ ശക്തമായ ഒരു നവപൊതുബോധം ഉണ്ടാകുവാൻ ഈ പ്രതിസന്ധി കാരണമാകുമോ ? കേരളം ശ്രീലങ്കയിൽ നിന്നും എന്തെങ്കിലും പാഠം പഠിക്കേണ്ടതുണ്ടോ?  പോഡ്‌കാസ്റ്റിലേക്ക് സ്വാഗതം .  

സ്നേഹപൂർവ്വം   എസ് . ഗോപാലകൃഷ്ണൻ

പ്രിയ സുഹൃത്തേ ,  

'പട്ടവും നൂലും ഞാൻ തന്നെ' എന്ന പോഡ്‌കാസ്റ്റിലേക്ക് സ്വാഗതം . സംഗീതസംബന്ധിയാണിത് . പതിനേഴാം നൂറ്റാണ്ടിലെ സൂഫി കവി ബുല്ലേ ഷായുടെ കവിത हाजी लोक मक्के नूं जांदे സൂഫി മിസ്റ്റിസിസവും  ആദ്ധ്യാത്മികവും അതേസമയം പ്രണയാർദ്രവുമാണ്.   തീർത്ഥാടകർ മെക്കയ്ക്കു പോകുന്നു . എന്നാൽ എൻ്റെ മെക്ക എൻ്റെ പ്രണയി രൺജാ ആണ് . നിങ്ങൾ പറയും എനിക്കു ഭ്രാന്താണെന്ന് . അതേ , ഞാൻ പ്രണയത്താൽ ഉന്മാദത്തിലാണ് . എൻ്റെ കഅ്ബ   രൺജാ താമസിക്കുന്ന ഗ്രാമമാണ് .   ചിഷ്തി സൂഫി പരമ്പരയിലെ കവി വാറിസ് ഷാ എഴുതിയ പ്രണയദുരന്തകഥ ഹീർ -രൺജയുമായി ബന്ധമുണ്ട് ഈ ഗാനത്തിന്. ഈ ഗാനം നൂറ്റാണ്ടുകളായി സൂഫി ഗായകർ പലതരത്തിൽ പാടി അനശ്വരമാക്കി . ഈ ലക്കം പോഡ്‌കാസ്റ്റിൽ ഗാനത്തിൻ്റെ  ചരിത്രവും , മൂന്ന് അതിമനോഹര ആലാപനങ്ങളും പാട്ടിൻ്റെ വരികളുടെ മലയാളം  തർജ്ജുമയും ഉൾപ്പെടുത്തിയിരിക്കുന്നു . നല്ല ശ്രവ്യാനുഭവത്തിന്  ദയവുചെയ്ത് headphones ഉപയോഗിച്ചു കേൾക്കണേ .  

സ്നേഹപൂർവ്വം   

എസ് . ഗോപാലകൃഷ്ണൻ  

23  മാർച്ച് 2022

പ്രിയ സുഹൃത്തേ , 

എടത്തട്ട നാരായണൻ : പത്രപ്രവർത്തനവും കാലവും എന്ന പുതിയ  പുസ്തകത്തെക്കുറിച്ച് ഗ്രന്ഥകർത്താവ് സംസാരിക്കുകയാണ് ഈ ലക്കം ദില്ലി -ദാലിയിൽ . 

ഇന്ത്യൻ ഇംഗ്ളീഷ് പത്രപ്രവർത്തനത്തിലെ എക്കാലത്തേയും വലിയ പേരുകളിലൊന്നായ എടത്തട്ട നാരായണൻ്റെ  ജീവിതം അദ്ദേഹമോ മറ്റുള്ളവരോ രേഖപ്പെടുത്താതെ പോയി . ഇതാ ഇപ്പോൾ മലയാളത്തിൽ ആ വലിയ മലയാളിയെക്കുറിച്ച് ഒരു പുസ്തകം വന്നിരിക്കുന്നു .  Hindustan Times , Patriot , Pioneer , Indian News Chronicle, Shankar 's Weekly , Link തുടങ്ങിയ ഇന്ത്യൻ പത്രലോകത്തിലെ തരംഗസൃഷ്ടികളായ പ്രസിദ്ധീകരണങ്ങൾക്ക് അനുപമമായ നേതൃത്വം കൊടുത്ത വ്യക്തി . ക്വിറ്റ് ഇന്ത്യാ സമരകാലത്ത് ജയിൽ വാസം . ഇന്ത്യൻ ഇടതുപക്ഷത്തിൻ്റെ നിതാന്ത സഖാവ് , എന്നാൽ ഒറ്റയാൻ . പണ്ഡിറ്റ് നെഹ്രുവും റാം മനോഹർ ലോഹ്യയും എസ് എ ഡാങ്കേയും ഇ എം എസ് നമ്പൂതിരിപ്പാടും കാതോർത്തിരുന്ന ശബ്ദം . വിപ്ലവ നായിക അരുണാ അസഫ് അലിയുടെ ഉത്തമ സുഹൃത്ത്, എല്ലാത്തിനുമുപരി നിത്യനിഷേധി . ഒരിക്കലും ഓർമ്മക്കുറിപ്പുകളോ ആത്മകഥയോ എഴുതിയില്ല . ഒരു നല്ല ഫോട്ടോയ്ക്കുപോലും ഒരിക്കൽ പോലും പോസ് ചെയ്തില്ല .  ഗ്രന്ഥകാരൻ പി . രാം കുമാറിന് പാടുപെടേണ്ടിവന്നു എടത്തട്ടയുടെ ജീവിതത്തെ പകർത്തുവാൻ . പോഡ്‌കാസ്റ്റിലേക്ക് സ്വാഗതം . 

ദയവുചെയ്ത് headphones ഉപയോഗിച്ച് കേൾക്കണേ .  

സ്നേഹപൂർവ്വം   

എസ് . ഗോപാലകൃഷ്ണൻ  

19 മാർച്ച് 2022  ഡൽഹി

ലാറി ബേക്കറിനെക്കുറിച്ച് സമഗ്രമായ ഒരു ജീവചരിത്രം മലയാളത്തിൽ വന്നിരിക്കുന്നു. പുസ്തകം എഴുതിയ ഗീതാഞ്ജലി കൃഷ്ണനുമായുള്ള സുദീർഘസംഭാഷണമാണ് ഈ ലക്കം ദില്ലി -ദാലിയിൽ.

കേരളത്തിൽ എത്തുന്നതിനുമുൻപ് ഈ വാസ്തുശില്പിയുടെ സംഭവബഹുലമായിരുന്ന ജീവിതം നമ്മെ വിസ്മയിപ്പിക്കും ...ഇംഗ്ലണ്ടിലെ ബാല്യ-കൗമാരങ്ങളിൽ അദ്ദേഹത്തിനുമേലുണ്ടായ നീണ്ട സ്വാധീനങ്ങൾ , യൗവനത്തിൽ യുദ്ധകാലത്ത് ചൈനയിലേക്കുള്ള അപകടകരമായ കപ്പൽ യാത്ര, വഴിയിൽ ദക്ഷിണാഫ്രിക്കയിലെ വർണ്ണവിവേചനവും കൊൽക്കത്തയിലെ ദാരിദ്ര്യവും കാണുന്നത് , ചൈനയിൽ കുഷ്ഠരോഗികളെ പരിചരിച്ച് ജീവിച്ചത്, സ്വന്തം ഭക്ഷണം കൃഷിചെയ്തുണ്ടാക്കിയത്, സ്വന്തം ശരീരത്തെ കുഷ്ഠരോഗം ബാധിക്കുന്നതും , മലയാളിയായ ഡോക്ടർ എലിസബത്ത് അക്കാലത്ത്  അദ്ദേഹത്തെ ജീവിതത്തിൽ സ്വീകരിക്കുന്നത്, ഹിമാലയത്തിൽ വൈദ്യുതി ഇല്ലാത്തിടത്ത് കൃഷിചെയ്ത് ജീവിച്ചത്....1944 ൽ ഗാന്ധിയെ കാണുന്നത് ,1962 ൽ കേരളത്തിലേക്ക് താമസം മാറ്റുന്നത് , കടപ്പുറത്ത് അച്യുതമേനോനോടൊപ്പം ഇരുന്ന് സ്വപ്നം കണ്ടത് , അച്യുതമേനോൻ മരിച്ചപ്പോൾ പൊട്ടിക്കരഞ്ഞത് ....

ആദരപൂർവം മാത്രം നമുക്ക് സമീപിക്കാൻ കഴിയുന്ന ആ ജീവിതത്തെക്കുറിച്ച്, പുസ്തകത്തെക്കുറിച്ച്, ഇഷ്ടികയും ഇടവും കൊണ്ട് അദ്ദേഹം എഴുതിയ കവിതകളെക്കുറിച്ച്  ഗീതാഞ്ജലി സംസാരിക്കുന്ന പോഡ്‌കാസ്റ്റിലേക്ക് സ്വാഗതം . 

ദയവുചെയ്ത് headphones ഉപയോഗിച്ച് കേട്ടാലും .

സ്നേഹപൂർവ്വം 

എസ് . ഗോപാലകൃഷ്ണൻ 

18 മാർച്ച് 2022  

https://www.dillidalipodcast.com/  

പ്രിയ സുഹൃത്തേ ,  

ഹിന്ദുസ്താനി സംഗീതത്തിലെ ഒരു ആധുനിക മുഹൂർത്തമായിരുന്നു പണ്ഡിറ്റ് കുമാർ ഗന്ധർവയുടെ സംഗീതപ്രപഞ്ചം . ഈ ലക്കം ദില്ലി -ദാലി ആ സംഗീതത്തെകുറിച്ചാണ് . ഒരിക്കൽ അദ്ദേഹം പറഞ്ഞു , ഞാനെന്തോ അതെൻ്റെ പാട്ടിൽ കേൾക്കാൻ കഴിയും .  ക്ലാസ്സിക്കൽ സംഗീതത്തിലെ ആധുനികതയെ നാം എങ്ങനെ നിർവചിക്കും ? ഈ പോഡ്‌കാസ്റ്റിൽ അദ്ദേഹം പാടി അനശ്വരമാക്കിയ കബീർ ഭജനുകളും , ശ്രീ , ശങ്കര, ഭൂപാലി , ഹമീർ , മാൽകോൺസ് തുടങ്ങിയ രാഗങ്ങളും ഉൾപ്പെടുത്തിക്കൊണ്ട് ആ സർഗ്ഗജീവിതത്തിലെ വേലിയേറ്റങ്ങളേയും വേലിയിറക്കങ്ങളേയും എന്തിനേയും അതിജീവിച്ച ആ ഏകശ്വാസകോശപ്രതിഭയേയും സമീപിക്കുന്ന പോഡ്‌കാസ്റ്റിലേക്ക് സ്വാഗതം .  

ദയവുചെയ്ത് headphones ഉപയോഗിച്ച് കേൾക്കാൻ ശ്രമിക്കണേ .  

സ്നേഹം മാത്രം   

എസ് . ഗോപാലകൃഷ്ണൻ  

15 മാർച്ച് 2022  ഡൽഹി 

പ്രീയപ്പെട്ട സുഹൃത്തേ , 

ഉക്രൈനിലെ ഒരമ്മയ്ക്കും കുഞ്ഞിനുമായി ഒരു ഭുപൻ ഹസാരിക ഗാനമാണ് ഈ ലക്കം ദില്ലി -ദാലിയിൽ . കഴിഞ്ഞ ദിവസം മോസ്‌കോയിലെ തെരുവിൽ ഒരു യുവാവ് ഉക്രൈനിലായിപ്പോയ ഭാര്യയ്ക്കും മകൾക്കുമായി ഒരു ടീവി ചാനലിലൂടെ ഒരു ചുംബനം അയക്കുന്നതു കണ്ടു .  1975 ൽ ഭുപൻ ഹസാരിക എഴുതി , സംഗീതം നൽകി പാടിയ ഗാനമാണ് 'ഓ , വിദേശിബന്ധു, എനിക്ക് നിൻ്റെ കരച്ചിലിന്റെ പ്രതിധ്വനി കേൾക്കാം ....നിൻ്റെ കപ്പൽ ഒരു ചുഴലിയിൽ പെട്ടിരിക്കുന്നു , നങ്കൂരവും നഷ്ടപ്പെട്ടിരിക്കുന്നു ...  അതിമനോഹരമായ ഈ ഗാനത്തിന് ഡോക്ടർ നിർമ്മൽകാന്തി ഭട്ടാചാര്യ നൽകിയ ഇംഗ്ലീഷ് വിവർത്തനമാണ് ഞാൻ മലയാളത്തിലാക്കിയിരിക്കുന്നത് . ഗാനത്തിൻ്റെ ചരിത്രവും , ഗാനവും ഉൾപ്പെടുത്തിയിരിക്കുന്നു .  

സ്നേഹത്തോടെ   എസ് . ഗോപാലകൃഷ്ണൻ  04 മാർച്ച് 2022  ഡൽഹി

The Indian EXPRESS ൻ്റെ തമിഴ് നാട് രാഷ്ട്രീയലേഖകൻ അരുൺ ജനാർദ്ദനൻ എം കെ സ്റ്റാലിൻ പ്രഭാവത്തെ വിശദമായി വിലയിരുത്തുന്നു ഈ ലക്കം ദില്ലി -ദാലിയിൽ .  

ഒന്ന് . അടുത്ത കാലത്തുനടന്ന തദ്ദേശഭരണ തെരഞ്ഞെടുപ്പിൽ ഡിഎംകെ മുന്നണി കൈവരിച്ച അഭൂതപൂർവ്വമായ വിജയത്തെ എങ്ങനെ കാണുന്നു ?  

രണ്ട് . ദേശീയരാഷ്ട്രീയത്തിൽ നിത്യശത്രുക്കളോ , നിത്യബന്ധുക്കളോ ഇല്ലാത്ത ദ്രാവിഡ പാർട്ടികളുടെ ചരിത്രപശ്ചാത്തലത്തിൽ എം കെ സ്റ്റാലിൻ്റെ  ദേശീയകാഴ്ചപ്പാടിനെ എങ്ങനെ കാണുന്നു ?  

മൂന്ന് : തമിഴകത്തെ ഉദ്യോഗസ്ഥവൃന്ദത്തിൻ്റെ  കാര്യക്ഷമതയോടെ പ്രത്യേകതകൾ എന്തൊക്കെയാണ് ?  

നാല് . തമിഴ് നാട് രാഷ്ട്രീയത്തിലെ ജാതിസമവാക്യങ്ങൾ സ്റ്റാലിൻ എങ്ങനെ ഉപയോഗിക്കുന്നു ?  

അഞ്ച് . പ്രാദേശികമായി വലിയ ജനസ്വാധീനമുള്ള  രാഷ്ട്രീയനേതാക്കളുടെ നിര തന്നെ ഇന്ന് ഇന്ത്യയിൽ പ്രതിപക്ഷത്തിനുണ്ട് . സ്റ്റാലിൻ , അരവിന്ദ് കേജരിവാൾ , മമത ബാനർജി , ശരദ് പവാർ , ഉദ്ധവ് താക്കറേ , അഖിലേഷ് യാദവ് , ചന്ദ്രശേഖര റാവു , പിണറായി വിജയൻ എന്നിങ്ങനെ ...പക്ഷേ എല്ലാവരേയും ഒന്നിപ്പിച്ചുനിർത്താനുള്ള ശേഷി കാണിക്കുന്ന ഒരു ദേശീയ നേതാവുണ്ടോ എന്ന് സംശയമാണ്. സ്റ്റാലിൻ ഈ സാഹചര്യത്തെ രാഷ്ട്രീയമായി എങ്ങനെയാണ് കാണുന്നത് ?  

ആറ് . രാഹുൽ ഗാന്ധി, പിണറായി വിജയൻ എന്നിവരുമായി എം .കെ സ്റ്റാലിൻ്റെ  ബന്ധമെങ്ങനെയാണ് ?  

ഏഴ് . സ്റ്റാലിൻ തമിഴ് നാട് രാഷ്ട്രീയത്തിൽ നേരിടുന്ന വെല്ലുവിളികൾ എന്തൊക്കെയാണ് ?  

അഭിമുഖത്തിലേക്ക് സ്വാഗതം .  

സ്നേഹപൂർവ്വം   

എസ് . ഗോപാലകൃഷ്ണൻ  

02 മാർച്ച് 2022 , ഡെൽഹി