പുതിയ മലയാളചലച്ചിത്രങ്ങളിലെ സ്ഥലവും കാലവും : ദില്ലി ദാലി പോഡ്കാസ്റ്റ് 

ചലച്ചിത്രചരിത്രകാരനായ ഡോക്ടർ സി എസ് വെങ്കിടേശ്വരനുമായി എസ് . ഗോപാലകൃഷ്ണൻ നടത്തുന്ന 

സംഭാഷണം .

ജോജി , നായാട്ട് , കള , ആർക്കറിയാം തുടങ്ങിയ സിനിമകളുടെ വെളിച്ചത്തിൽ മലയാളത്തിലെ പരിണമിക്കുന്ന ചലച്ചിത്രഭാഷയെക്കുറിച്ചുള്ള ഒരു വിശകലനമാണിത് . 

മലയാളത്തിൽ സൂപ്പർസ്റ്റാറുകളുടെ കാലം അവസാനിച്ചുവോ ?

അതിശക്തിമാനായ പുരുഷൻ അസ്തമിച്ചോ ? 

മലയാളചലച്ചിത്രഭാഷയിൽ നിന്നും  കാലം പിൻവാങ്ങുകയും സ്ഥലം അനനുപാതികമായി പ്രബലമാകുകയും ചെയ്യുന്നോ ?

WCC നമ്മുടെ  ചലച്ചിത്രപ്രമേയങ്ങളിൽ വരുത്തിയ മാറ്റങ്ങൾ എന്താണ് ?

സമകാലമലയാളത്തിലെ ഗൗരവമേറിയ സമാന്തരപ്രവർത്തനങ്ങൾ മുൻപെന്നത്തേക്കാളേറെ ഇപ്പോൾ   അവഗണിക്കപ്പെടുന്നുവോ ?

സ്നേഹപൂർവ്വം 

എസ് . ഗോപാലകൃഷ്ണൻ 

02 ജൂൺ 2021 

പ്രിയ സുഹൃത്തേ ,

ഞായറാഴ്ചത്തെ ദില്ലി ദാലിയിലേക്ക് സ്വാഗതം.

രണ്ടുപേർ ഒരുമിച്ചിരിക്കുമ്പോൾ ജീവിതത്തിലുണ്ടാകുന്ന മഹാശ്രുതികൾ.

ഡൽഹിയിൽ നടക്കാൻ ഇറങ്ങിയാൽ ഏതോ മ്യൂസിയം കാണാനിറങ്ങുംപോലെയാണ് ....

എന്റെ കൂട്ട് പണ്ഡിറ്റ് രാജൻ , സാജൻ മിശ്രമാരും ഉസ്താദ് സലാമത് -നസാക്കത് അലിമാരും പാടിയ ലളിത് രാഗവും റീനയ്ക്ക് കൂട്ട്  ഹെഡ്‍ഫോണിൽ യുവാൽ നോവ ഹരാരിയും .

ഈ പോഡ്കാസ്റ്റ് ഞങ്ങളുടെ പ്രഭാതസവാരിയെക്കുറിച്ചാണ് ...എന്നാൽ പതിന്നാലാം നൂറ്റാണ്ടിലെ മദ്രസ്സയെക്കുറിച്ചാണ് , മൊഹമ്മദ്പൂരിലെ ഹനുമാൻ ക്യാമ്പ് എന്ന ചേരിയെക്കുറിച്ചാണ് , ഹരാരി പറയുന്ന മനുഷ്യന്റെ നിഷ്ഫലമായ കുരിശുയുദ്ധങ്ങളെക്കുറിച്ചാണ് , കോവിഡ് കാലത്ത് പട്ടിണികിടന്നു മരിക്കുന്ന തെരുവുനായ്ക്കളെ കുറിച്ചാണ് ,  ഗോപികയെ ഉപേക്ഷിച്ച് കണിക്കൊന്ന വസ്ത്രമാക്കി രാവിലെ കടന്നുകളയുന്ന ലളിത് എന്ന കൃഷ്ണരാഗത്തെക്കുറിച്ചാണ്. ഇന്ത്യാവിഭജനത്തിൽ നമുക്ക് നഷ്ടപ്പെട്ട സലാമത് -നസാകത്ത്‌ സഹോദരന്മാരെക്കുറിച്ചാണ്. ആരുമറിയാതെ കുറ്റിക്കാട്ടിൽ അന്ത്യമയക്കത്തിലായ ഒരു ബിജ്‌റി ഖാനെക്കുറിച്ചാണ്.... 

ശിലായുഗം തരുന്ന ഗൃഹാതുരത്വത്തിൽ ലളിത് രാഗം എന്നോടു പറയുന്നതെന്താണ് ..ലളിതചിന്തകൾ.

ദയവായി headphones ഉപയോഗിച്ച് ഈ പോഡ്കാസ്റ്റ് കേട്ടാലും .

സ്നേഹം മാത്രം 

എസ് . ഗോപാലകൃഷ്ണൻ 

30 മെയ് 2021

വലിയ ലക്ഷ്യത്തോടെ ജീവിക്കുന്ന ഒരു മനുഷ്യനാണ് സച്ചിദാനന്ദൻ. താൻ ജീവിക്കുന്ന കാലത്തെ കൂടുതൽ നീതിനിഷ്ഠവും അനുഭൂതിസാന്ദ്രവും ജനാധിപത്യപരവും  ആക്കുവാൻ അദ്ദേഹം അവസാനമില്ലാത്ത ശ്രമിച്ചുപോരുന്നു . ഈ അവിരാമപങ്കാളിത്തത്തിന്റെ അർത്ഥം അന്വേഷിക്കുകയാണ് സച്ചിദാനന്ദന്റെ എഴുപത്തഞ്ചാം പിറന്നാൾ വേളയിൽ പ്രൊഫസ്സർ സുനിൽ പി ഇളയിടം .

മുപ്പതുമിനിറ്റ് ദൈർഘ്യമുള്ള ഈ അവലോകനം വലിയ കവി , നിരൂപകൻ , സാമൂഹ്യയിടപെടലുകാരൻ, വിവർത്തകൻ , സംഘാടകൻ, പുതിയതലമുറയുടെ നിരന്തരസഹചാരി, ലോകാനുഭവസഞ്ചാരി, എന്തിനുമുപരി കന്മഷമില്ലാത്ത സ്നേഹസമ്പന്നൻ   തുടങ്ങിയ നിലകളിൽ വ്യാപരിക്കുന്ന ബഹുരൂപിയായ സച്ചിദാനന്ദന്റെ സർഗ്ഗ -സാമൂഹ്യ ജീവിതങ്ങളെ സ്നേഹവായ്‌പോടെ നോക്കിക്കാണുന്നു .

ഇത് ദില്ലി ദാലി എന്ന മലയാളം പോഡ്കാസ്റ്റ് സച്ചിദാനന്ദന് നൽകുന്ന പിറന്നാൾ ഉപഹാരമാണ് . അദ്ദേഹത്തിൻറെ പിറന്നാൾ മെയ് 28 നാണ്.

സ്നേഹപൂർവ്വം

എസ് . ഗോപാലകൃഷ്ണൻ 

27 മെയ് 2021    

വേമ്പനാട്ടു കായലിനെ രക്ഷിക്കുക 

പരിസ്ഥിതി പ്രവർത്തകനും  പ്രാദേശികചരിത്രകാരനുമായ 

പള്ളിക്കോണം രാജീവ് സംസാരിക്കുന്നു.

കേരളഭൂമിയുടെയും കടലിന്റെയും പരിണാമചരിത്രമാണ് ഈ പോഡ്കാസ്റ്റ് അന്വേഷിക്കുന്നത്. വേമ്പനാട്ടുകായൽ ഒരു വെള്ളക്കെട്ടല്ല ..ഒരു ജില്ലയുടെ വലുപ്പമുള്ള ജലാശയമാണ്. കുട്ടനാടുണ്ടായ കഥയാണ്, കരിനിലങ്ങളുടെ കഥയാണ്. എന്നായിരിക്കണം കുട്ടനാട്ടിൽ കൃഷി തുടങ്ങിയിരിക്കാനിട ? കുന്നോറ കൈമളുടെ ഗ്രന്ഥവരി പറയുന്ന ചരിത്രമെന്താണ് ? തെക്കുംകൂർ പ്രദേശത്തെ ഡച്ച് സ്വാധീനം  എങ്ങനെ കുട്ടനാടൻ പരിണാമങ്ങളെ സ്വാധീനിച്ചിരിക്കാം ? കേരളത്തിൽ പുതിയ മന്ത്രിസഭ അധികാരത്തിൽ വന്നിരിക്കുന്നു . ഏതാണ്ട് നാൽപ്പതിലേറെ  MLA മാർ ഈ കായലിന്റെയും  അതിലേക്കുവരുന്ന നദികളുടെയും പ്രതിനിധികൾ കൂടിയാണ് . എന്താണ് ഈ  കായൽ നേരിടുന്ന വളരെ ഗുരുതരമായ പ്രശ്നങ്ങൾ ? കുട്ടനാടൻ കാർഷിക കലണ്ടറിനെ ആസ്പദമാക്കി തണ്ണീർമുക്കം ബണ്ടിന്റെ പ്രവർത്തനത്തെ എങ്ങനെ പരിഷ്‌ക്കരിക്കാം ? കടൽ എന്തുകൊണ്ട് കായൽ കൊണ്ടുവരുന്ന വെള്ളത്തെ സ്വീകരിക്കുവാൻ മടിക്കുന്നു ? നദികളെ ശ്രദ്ധിക്കാതെ കായലിനെ രക്ഷിക്കാൻ എന്തുകൊണ്ട് കഴിയില്ല ? കേരളാ സർക്കാർ ഉടനടി എന്തു നടപടികൾ സ്വീകരിക്കണം ?

കേരളത്തിലെ നാലുജില്ലകളിലായി താഴ്ന്ന പ്രദേശങ്ങളിൽ താമസിക്കുന്നവരുടെ ഭാവിക്കായി വേമ്പനാട്ടു കായലിനെക്കുറിച്ച് ചർച്ച ചെയ്തേ മതിയാകൂ .

കേരളത്തിന്റെ ഭാവി ആരോഗ്യമുള്ള വേമ്പനാട്ടുകായലുമായി ബന്ധപ്പെട്ടു കിടക്കുന്നു , അതിനാൽ ഈ പോഡ്കാസ്റ്റ് കേൾക്കണമെന്ന് അഭ്യർത്ഥിക്കുന്നു 

ദൈർഘ്യം : 43 മിനിറ്റ്

സ്നേഹത്തോടെ 

എസ് . ഗോപാലകൃഷ്ണൻ 

26 മെയ് 2021 

ഡൽഹി 

1963 ൽ അയാൾക്ക്‌ 22 വയസ്സ് . ലോകത്തോടായി അയാൾ ചോദിച്ചു ....

" എത്ര വഴികൾ ഒരാൾ നടക്കണം , അയാളെ നിങ്ങൾ ഒരു മനുഷ്യനായി കൂട്ടണമെങ്കിൽ ?"

ഇന്ന് 2021 മെയ് 24 . ബോബ് ഡിലന് എൺപതുവയസ്സാകുന്നു . ലോകത്തിലെ നാഗരാർത്തിജീവിതങ്ങൾ വീട്ടിനുള്ളിലെ നാലു ചുവരുകൾക്കുള്ളിൽ വ്യാജലോകമായയിൽ അഭിരമിക്കുമ്പോൾ , ജനാലപ്പാളികൾക്കിടയിലൂടെ ഒരു പാട്ടു വന്നു ചോദിക്കുന്നു ....

പറയൂ , എത്രപേർക്കൂടി മരിക്കണം ഇത്രയുമാളുകൾ മരിച്ചു എന്ന് അയാൾ ഒന്നറിയുവാൻ ?  

ഒരാൾക്ക് എത്ര ചെവികൾ വേണം ഒരു മനുഷ്യൻ കരയുന്നതുകേൾക്കാൻ?

ബോബ് ഡിലന്റെ 'Blowing in the wind' എന്ന ഗാനവും മലയാളപരിഭാഷയും പോഡ്‌കാസ്റ്റിൽ ഉൾപ്പെടുത്തിയിരിക്കുന്നു . 

ഈ പോഡ്കാസ്റ്റ് പ്രിയസഖാവും ജ്യേഷ്ഠതുല്യനുമായ സിനിമാറ്റോഗ്രാഫർ വേണുവിന് സമർപ്പിക്കുന്നു  

സ്നേഹപൂർവ്വം 

എസ് . ഗോപാലകൃഷ്ണൻ 

24 മെയ് 2021 

ഡൽഹി  

പലസ്തീനും ഇസ്രയേലും ഇന്ത്യയും തമ്മിലുള്ള ബന്ധങ്ങളുടെ ചരിത്രപശ്ചാത്തലം അന്വേഷിക്കുകയാണ് ഈ ലക്കം ദില്ലി ദാലി . ഈ വിഷയത്തിൽ ഒരു പാഠപുസ്തകം പോലെ ഒരു സംഭാഷണം . അന്താരാഷ്‌ട്രബന്ധങ്ങളിൽ ഗവേഷകനായ പ്രൊഫസ്സർ കെ എം സീതിയാണ് ഈ ദീർഘസംഭാഷണത്തിൽ തികഞ്ഞ അവഗാഹത്തോടെ സംസാരിക്കുന്നത് . അദ്ദേഹം ഇപ്പോൾ മഹാത്മാഗാന്ധി സർവകലാശാലയിൽ Inter University Centre for Social Science Research and Extension ഡയറക്ടറാണ് . പ്രൊഫസ്സർ സീതി ഇതിനുമുൻപ് മഹാത്മാഗാന്ധി സർവകലാശാലയിൽ  Dean of Social Sciences and Professor and Director of School of International Relations and Politics, Director of Research, and Coordinator KPS Menon Chair for Diplomatic Studies തുടങ്ങിയ പദവികളിൽ ഉണ്ടായിരുന്നു .

പ്രധാനമായും ഇനിപ്പറയുന്ന ചോദ്യങ്ങൾക്കാണ് അദ്ദേഹം മറുപടി പറയുന്നത് 

ഒന്ന് . 2021 ലെ സംഘർഷാന്തരീക്ഷത്തിൽ ഇന്ത്യ എടുത്ത നിലപാടുകൾ 

രണ്ട് . ഐക്യരാഷ്ട്രസഭയുടെ പ്രസക്തി 

മൂന്ന്. പാലസ്തീൻ ജനതയുമായുള്ള ഇന്ത്യൻ ഐക്യദാർഢ്യത്തിന്റെ സംക്ഷിപ്തചരിത്രം. വാഗ്ദത്തഭൂമിയെന്ന സയണിസ്റ്റ് പദ്ധതിയോടുള്ള ഗാന്ധിയുടെ നിലപാടുകൾ എന്തായിരുന്നു ? ഇന്ത്യയുടെ നിലപാടുകളെ എന്തുകൊണ്ട് ലോകം കാതോർത്തുകേട്ടു ? 

നാല് .  ചേരിചേരാനയം neutral ആയിരുന്നോ ? എന്താണ് ബന്തൂങ് spirit

അഞ്ച് . പലസ്തീനിൽ ജനാധിപത്യം വരുന്നതിൽ അറബ് രാജാധിപത്യങ്ങൾ എടുക്കുന്ന നിലപാടുകൾ എന്താണ് ? അതും മതതീവ്രവാദവും തമ്മിൽ ബന്ധമുണ്ടോ ?

ആറ് . ഇന്നത്തെ സാഹചര്യത്തിൽ ഇന്ത്യ എടുക്കേണ്ട നിലപാട് എന്താണ് ?

ഏഴ് . ഇന്ത്യയിലെ നവലിബറൽ ഭരണപരിഷ്കാരങ്ങൾ  നമ്മുടെ മധ്യേഷ്യനയങ്ങളെ സ്വാധീനിച്ചോ ?

എട്ട് . ലോകത്തിലെ ജൂതവംശജർ മുഴുവൻ നെതന്യാഹുവിന് അനുകൂലമാണോ?

ഹെഡ്‍ഫോൺസ് ഉപയോഗിച്ച് പോഡ്കാസ്റ്റ് കേട്ടാൽ കൂടുതൽ നല്ല കേൾവി അനുഭവം ഉണ്ടാകും .

സ്നേഹപൂർവ്വം 

എസ് . ഗോപാലകൃഷ്ണൻ 

മെയ് 23 , 2021    

ഭൂമിയെ സുന്ദരമാക്കിയ ഒരാൾ : സുന്ദർലാൽ ബഹുഗുണ 

പി എൻ ഉണ്ണിക്കൃഷ്ണൻ സംസാരിക്കുന്നു. പരിസ്ഥിതി ചിന്തകനും പ്രവർത്തകനുമായ ഉണ്ണിക്കൃഷ്ണൻ കേരളത്തിന്റെ വനങ്ങളുടെ  ചീഫ് കൺസർവേറ്റർ ആയിരുന്നു.

എന്താണ് ഹിമാലയപ്രദേശങ്ങളിലെ ഗ്രാമീണന്റെ കാടുമായുള്ള മമതാബന്ധം ? മലയാളിക്ക് അതെത്രമാത്രം അന്യമാണ് . എന്തുകൊണ്ട് സൈലന്റ് വാലി സമരം കവികളുടെയും ധൈഷണികരുടേതുമായി നിജപ്പെട്ടപ്പോൾ ചിപ്കോ പ്രസ്ഥാനം ഗ്രാമീണരുടേതായി ? എന്തായിരുന്നു സുന്ദർലാൽ ബഹുഗുണയുടെ സെൻസിറ്റിവിറ്റിയെ വ്യത്യസ്തമാക്കിയത് ? ഗാന്ധിയെ തെഹ്‌രിക്ക് കണ്ടെത്തേണ്ട കാര്യമില്ലായിരുന്നോ ? കൊളോണിയലിസം എങ്ങനെ വനത്തെ വിഭവകേന്ദ്രമാക്കി മാറ്റി ? കാട് ജനങ്ങളുടേതല്ലാതാകുകയും ദേശത്തിന്റേതാകുകയും ചെയ്യുന്നതിനെ ബഹുഗുണ എങ്ങനെ ചോദ്യം ചെയ്തു ? ചിപ്കോ പ്രസ്ഥാനം എങ്ങനെ ദേശീയവനനയത്തെ മാറ്റിത്തീർത്തു ? ഗാന്ധി ചർഖ ഉപയോഗിച്ചതുപോലെയാണോ സുന്ദർലാൽ ബഹുഗുണ മരം എന്ന ബിംബത്തെ ഉപയോഗിച്ചത് ? അല്ലെങ്കിൽ എന്തായിരുന്നു വ്യത്യാസം ? ബഹുഗുണയുടെ ചരമവേളയിൽ വീണ്ടും ആതിരപ്പള്ളി കേരളത്തിൽ ചർച്ചയാകുമ്പോൾ നാം അദ്ദേഹത്തിൻറെ ജീവിതത്തെ റദ്ദാക്കുന്നുണ്ടോ ? ഈ ഹിമാലയൻ ഗ്രാമീണൻ എങ്ങനെ ഇന്ത്യക്കാരുമായി communicate ചെയ്തു ? സുഗതകുമാരിയിൽ നിന്നും സുന്ദർലാൽ ബഹുഗുണ വ്യത്യസ്തനാണോ ? ടീച്ചറിലെ ഏത് ജീനാണ് അവരെ കാടിനോടടുപ്പിച്ചത് ? ലോകത്തിലെ പരിസ്ഥിതിപ്രസ്ഥാനങ്ങളുടെ മുന്നേറ്റം ഇനി ഏതു ദിശയിൽ ?

28 മിനിറ്റുദൈർഘ്യമുള്ള ഈ പോഡ്കാസ്റ്റിലേക്ക് സ്വാഗതം.

സ്നേഹപൂർവ്വം 

എസ് . ഗോപാലകൃഷ്ണൻ 

22 മെയ് 2021 

ഡൽഹി 

ഗാന്ധിയുടെ ലാവണ്യലോകത്തെക്കുറിച്ച് ഒരു പോഡ്കാസ്റ്റ്  

ആശയത്തിലേക്കുള്ള  ആമയുടെ ഉൾവലിയലുകൾ 

ഗാന്ധിജിയിൽ കൃസ്തീയമായ ഒരു പാപബോധം പ്രബലമായിരുന്നു . പാപം ചെയ്യരുതെന്നു ചിന്തിച്ച് സൂര്യോദയത്തിലേയും  അസ്തമയത്തിലേയും പോലും  ഭംഗികൾക്കുനേരെ വിമുഖത പുലർത്തിയ ഗാന്ധിജി എങ്ങനെയാണ് പാട്ടുകേട്ടിരുന്നത് ? ഈ പോഡ്കാസ്റ്റ് അന്വേഷിക്കുന്നത് അതാണ് . ടാഗോർ കൃത്യസമയത്ത് ഒരു തമാശയുമായി ഇടപെട്ടില്ലായിരുന്നെങ്കിൽ ഖജുരാഹോയിലെ നഗ്നശിൽപങ്ങളെ ഗാന്ധിജി ഖദർ ഉടുപ്പിക്കുമായിരുന്നോ? സുബ്ബുലക്ഷ്മിയുടെ സംഗീതമാണോ  അദ്ദേഹം കേട്ടിരിക്കാനിട ? അതോ അതിലെ വൈഷ്ണവജന്മത്തെയോ ? ഹനുമാന് സംഗീതം അറിയാമായിരുന്നെങ്കിലും ശ്രീരാമചന്ദ്രൻ ഹനുമാനെക്കൊണ്ട് മറ്റുകാര്യങ്ങളല്ലേ ചെയ്യിച്ചത് ? വെറുതെയാണോ ഗാന്ധിജി ശാന്തിനികേതനിൽ വെച്ചു പറഞ്ഞത് , ' ഇവിടെമുഴുവൻ സംഗീതമാണ് ...എനിക്കുപ്രിയം സംഗീതമയമായ ജീവിതത്തേക്കാൾ ജീവിതസംഗീതമാണെന്ന്'.

എം എസ്‌ സുബ്ബുലക്ഷ്മിയുടേയും, ഗാന്ധിജി കേട്ട  ഡാഗർ സഹോദരന്മാരുടെ  സംഗീതവും ഈ പോഡ്‌കാസ്റ്റിൽ ഉണ്ട്. കഴിയുമെങ്കിൽ headphones ഉപയോഗിച്ച് പോഡ്കാസ്റ്റ് കേട്ടാലും . 

സ്നേഹത്തോടെ 

എസ് . ഗോപാലകൃഷ്ണൻ 

20 മെയ് 2021   

മെയ് 18 അന്താരാഷ്‌ട്ര മ്യൂസിയം ദിനമാണ് . മ്യൂസിയം മേഖലയിൽ ദീർഘകാലം പ്രവർത്തിച്ച ഡോ . വേണു വാസുദേവനാണ് ഇന്ന് ദില്ലി - ദാലിയിൽ അതിഥി . അദ്ദേഹം ഇപ്പോൾ കേരളാ സർക്കാരിൽ അഡിഷണൽ ചീഫ് സെക്രട്ടറിയാണ് . ഡൽഹിയിലെ നാഷണൽ മ്യൂസിയം ഡയറക്ടർ ജനറൽ ആയിരുന്ന അദ്ദേഹം  കേരളത്തിലെ മ്യൂസിയം മേഖലയിൽ ഗുണപരമായ നിരവധി പരിവർത്തനങ്ങൾ കൊണ്ടുവരുന്നതിൽ വലിയ പങ്കു വഹിച്ചു.

2021 ലെ അന്താരാഷ്‌ട്ര മ്യൂസിയം ദിനത്തിൽ ലോകമാകമാനം ഈ മേഖലയിൽ വന്നുകൊണ്ടിരിക്കുന്ന വലിയ മാറ്റങ്ങളെക്കുറിച്ചും , മ്യൂസിയങ്ങൾ നേരിടുന്ന വെല്ലുവിളികളെക്കുറിച്ചും അദ്ദേഹം വിശദമായി സംസാരിക്കുന്നു.  സാമ്പത്തികഞെരുക്കം വന്നാൽ അതാദ്യം ബാധിക്കുന്നത് സാംസ്കാരികപ്രവർത്തങ്ങളെയാണ് ...മ്യൂസിയങ്ങൾ എന്തുകൊണ്ട് അടഞ്ഞുപോകുന്നു ? ബ്രിട്ടീഷ് മ്യൂസിയം എങ്ങനെ പരിണമിക്കുന്നു ? എങ്ങനെ കാലത്തിനനുസരിച്ച് മാറാം ? മ്യൂസിയങ്ങൾ പ്രധാനപ്പെട്ട സാംസ്കാരികയിടങ്ങൾ ആണെന്ന് കരുതുന്നവർ നിർബന്ധമായും കേട്ടിരിക്കേണ്ട 27 മിനിറ്റ് ദൈർഘ്യമുള്ള  പോഡ്കാസ്റ്റ്.   

ദയവുചെയ്ത് ഹെഡ്‍ഫോൺസ് ഉപയോഗിച്ച് പോഡ്കാസ്റ്റ് കേൾക്കുവാൻ ശ്രമിക്കുക , കൂടുതൽ നല്ല    കേൾവി അനുഭവത്തിനാണത് .

സ്നേഹത്തോടെ 

എസ് . ഗോപാലകൃഷ്ണൻ 

18 മെയ് 

1911 ഡിസംബർ പന്ത്രണ്ടാം തീയതിയാണ് ജോർജ് അഞ്ചാമൻ രാജാവ് ന്യൂ ഡൽഹി എന്ന നഗരത്തിന് തറക്കല്ലിട്ടത്. അതിനും നാലുവർഷങ്ങൾക്കുശേഷമാണ് ഗാന്ധി ദക്ഷിണാഫ്രിക്കയിൽ നിന്നും ഇന്ത്യയിലേക്ക് രാഷ്ട്രീയപ്രവർത്തനത്തിനായി തിരിച്ചെത്തിയത്. ബ്രിട്ടീഷുകാർ വിദൂരസ്വപ്നങ്ങളിൽ പോലും ഇന്ത്യൻ ദേശീയത ബ്രിട്ടീഷ് സാമ്രാജ്യത്വത്തിനെതിരേ ഉയർന്നെഴുന്നേൽക്കും എന്ന് കരുതാത്ത കാലം. അല്ലെങ്കിൽ എന്തിന് ഷാജഹാനാബാദിനുപുറത്ത് വരണ്ടവനങ്ങൾ അറുത്തുമാറ്റി റൈസീന കുന്നിൽ അവർ പുതിയ നഗരം പണിതു ?

മതത്തിന്റെ പേരിൽ ബംഗാളിനെ 1905 ൽ രണ്ടായി വിഭജിച്ചു ഭരിക്കാനുള്ള ബ്രിട്ടീഷ് തീരുമാനത്തിനെതിരെയുള്ള ജനരോഷം കണ്ട ഇന്ത്യയുടെ വൈസ്രോയി ഹാര്ഡിന്ജ് പ്രഭുവിന് മനസ്സിലായിരുന്നു കൽക്കത്ത ഒരു തലസ്ഥാനം എന്ന നിലയിൽ മേലിൽ സുരക്ഷിതമല്ല എന്ന് . അതിനാൽ 1911 ൽ തന്നെ രാജ്യതലസ്ഥാനം മധ്യേന്ത്യയിലേക്ക് മാറ്റണമെന്ന് അദ്ദേഹം ലണ്ടനിലേക്ക് അറിയിച്ചിരുന്നു. 

ലോകത്തിന്റെ തന്നെ തലസ്ഥാനമാകാൻ പോരുന്ന ഒരു തലച്ചോറുപോലെ തോന്നിപ്പിക്കുന്ന , ഭീമൻ തൂണുകളിൽ തല ഉയർത്തി നിൽക്കുന്ന അതിസുന്ദരമായ ആധുനിക വാസ്തുബൃഹദീശ്വരം ! ഇന്ത്യൻ പാർലമെന്റ് മന്ദിരം . അതുണ്ടായപ്പോൾ കൊളോണിയലിസത്തിന്റെ സൂര്യനസ്തമിക്കാത്ത വിജയവൈജയന്തിയുടെ അനശ്വരസ്വപ്നമായിരുന്നെങ്കിൽ , ഇന്ത്യൻ ജനത അത് ആധുനിക ജനാധിപത്യത്തിന്റെ സ്വപ്നമന്ദിരമാക്കിമാറ്റാൻ അതിനെ പിടിച്ചെടുത്തു.

ആറേക്കർ സ്ഥലത്ത് പണി പൂർത്തിയായ കെട്ടിടം കണ്ടിട്ട് Prince Arthur, the Duke of Connaught പറഞ്ഞത് ഏതെൻസിലെ അക്രോപോളിസിനെപ്പോലെ , ഞെട്ടിപ്പിക്കുന്ന എടുപ്പ് എന്നാണ്. വാസ്തുശില്പികളായിരുന്ന ഹെർബെർട് ബേക്കറും എഡ്വിൻ ലറ്റിയൻസും തമ്മിലുള്ള ആരോഗ്യകരമായ സംവാദങ്ങൾ ഭാവിയിലെ ഏതുനഗരനിർമ്മാതാക്കൾക്കുമുള്ള വഴികാട്ടിയാണ്. ബേക്കർ നിർദേശിച്ചിരുന്നത് ത്രികോണാകൃതിയിലുള്ള ഒരു പാർലമെന്റായിരുന്നു , എന്നാൽ ലറ്റിയൻസകാട്ടെ പുതിയ മന്ദിരത്തെ വൃത്താകൃതിയിൽ സങ്കൽപ്പിച്ചു .

ഇന്ത്യ പുതിയ പാർലമെന്റ് മന്ദിരം പണിയുമ്പോൾ നമുക്ക് നിലവിലുള്ള കെട്ടിടത്തിന്റെ നിർമ്മാണത്തിന്റെ രോമാഞ്ചജനകമായ കഥ കേൾക്കാം .

പോഡ്‌കാസ്റ്റിലേക്ക് സ്വാഗതം ! Please use headphones to listen the podcast .

സ്നേഹത്തോടെ 

എസ് . ഗോപാലകൃഷ്ണൻ 

16 May 2021 

ഡൽഹി 

dillidalipodcast.com