
Sign up to save your podcasts
Or


പ്രിയ സുഹൃത്തേ ,
Whatsapp മായി ബന്ധപ്പെട്ട് ഉയർന്നുവരുന്ന ചോദ്യങ്ങൾക്ക് Public Interest Technologist ആയ അനിവർ അരവിന്ദ് ദില്ലി ദാലിയോട് വിശദമായി സംസാരിക്കുകയാണ് ഈ സംഭാഷണത്തിൽ
ഒന്ന് : Facebook ന്റെ എന്ത് ബിസിനസ് താൽപര്യങ്ങളാണ് ഈ പുതിയ നീക്കം വഴി നടക്കുന്നത് ?
രണ്ട് : ഈ വിശ്വാസനഷ്ടത്തിന്റെ അനന്തരഫലങ്ങൾ എന്തൊക്കെ ?
മൂന്ന് : Whatsapp ൽ ഒരാളുടെ social graph എങ്ങനെ രേഖപ്പെടുത്തിയിരിക്കുന്നു ?
നാല് : ഇന്ത്യയിലെ സവിശേഷസാഹചര്യവും പരിമിതികളും ?
അഞ്ച് : ഫേസ്ബുക്ക് എന്തിനാണ് Instagram വാങ്ങിയത് ?
ആറ് : സ്വകാര്യതാനഷ്ടം മാത്രമാണോ പ്രശ്നം അതോ അതിലുമുപരിയോ ?
ഏഴ് : digital ഇന്ത്യയുടെ digital governance പ്രശ്നങ്ങൾ എന്തൊക്കെ ?
എട്ട് : Whatsapp Encryption ന് അടുത്തകാലത്ത് വന്ന വീഴ്ചകൾ എന്തൊക്കെ ?
ഒൻപത് : Signal Foundation ഉണ്ടായ സാഹചര്യം ഏത് ?
പത്ത് : Whatsapp നാം ഉപേക്ഷിക്കേണ്ടതുണ്ടോ ?
അനിവർ അരവിന്ദ് സ്വതന്ത്ര മലയാള കമ്പ്യൂട്ടിങ്ങിൽ സജീവമാണ് . അദ്ദേഹം Software Free Law Center- India യുടെ ഉപദേശകസമിതി അംഗമാണ് .
പോഡ്കാസ്റ്റിലേക്ക് സ്വാഗതം .
ദൈർഘ്യം 25 മിനിറ്റ് .
സ്നേഹപൂർവ്വം
എസ് . ഗോപാലകൃഷ്ണൻ
dillidalipodcast.com
ഡൽഹി ,
14 ജനുവരി 2021
'കൊല്ലാനറിയാവുന്നവനേ അഹിംസ പാലിക്കാൻ കഴിയൂ' എന്ന് ഗാന്ധി പറഞ്ഞിട്ടുണ്ട് ...'കൊലയുടെ കൊറിയോഗ്രഫി' എന്ന ലേഖനസമാഹാരത്തിന് സനിൽ വി നൽകിയിരിക്കുന്ന സമർപ്പണവാക്യമിതാണ് .
ഈ ലേഖനസമാഹാരം മൗലികചിന്തയാൽ അനന്യമാണ് . കഴിഞ്ഞ ഇരുപതുവർഷങ്ങളിൽ സനിൽ എഴുതിയ ലേഖനങ്ങളാണ് പുസ്തകരൂപത്തിൽ ഇറങ്ങിയിരിക്കുന്നത് . പുസ്തകത്തെക്കുറിച്ച് പ്രൊഫസ്സർ ഉദയ കുമാറുമായുള്ള ഒരു സംഭാഷണമാണ് ഈ ലക്കം ദില്ലി -ദാലി .
കൊല , അതുമായി ബന്ധപ്പെട്ട ധാർമികചിന്തനങ്ങൾ , ഫാസിസത്തെ നേരിടുമ്പോഴുള്ള ദാർശനിക സമസ്യകൾ തുടങ്ങിയ വിഷയങ്ങൾ സാഹിത്യത്തിന്റെ മൊഴിവഴക്കങ്ങളിൽ നിന്നും വിടുതൽ പ്രാപിച്ച സാധാരണ ഭാഷയിൽ സനിൽ പ്രതിപാദിക്കുന്നു എന്ന് ഉദയ കുമാർ പറയുന്നു .
പ്രൊഫസ്സർ സനിൽ. വി ഡൽഹി ഐ ഐ ടി യിൽ ദർശനാദ്ധ്യാപകനാണ്. പ്രൊഫസ്സർ ഉദയ കുമാർ ജവഹർലാൽ നെഹ്റു സർവകലാശാലയിലെ അദ്ധ്യാപകനാണ്, ഇപ്പോൾ ഫ്രാൻസിലെ Nantes Institute for Advance Study യിൽ fellow ആണ് .
ഇരുപതുമിനിറ്റ് ദൈർഘ്യമുള്ള ഈ പോഡ്കാസ്റ്റിലേക്ക് സ്വാഗതം .
സ്നേഹത്തോടെ
എസ് . ഗോപാലകൃഷ്ണൻ
ഡൽഹി , 12 ജനുവരി 2021
('കൊലയുടെ കോറിയോഗ്രഫി' പ്രസാധനം ചെയ്തിരിക്കുന്നത് ഉരു ആർട് ഹാർബറും പ്രസക്തി പ്രസാധകരുമാണ് )
ജനുവരി പന്ത്രണ്ടാം തീയതി ലിസ മോണ്ട്ഗോമെറി എന്ന അൻപത്തിരണ്ടുകാരി അമേരിക്കയിൽ വധശിക്ഷയ്ക്ക് വിധിക്കപ്പെടാം .മൂന്നാം വയസ്സിൽ തുടങ്ങിയതാണ് ഈ ലോകം അവളുടെ ജീവിതം ദുഃസ്സഹമാകാൻ . അവളുടെ തലച്ചോറിനേയും മനസ്സിനേയും തകർത്ത ലോകത്തിന് എന്തധികാരം അവളെ തൂക്കിലേറ്റുവാൻ ?
സോക്രട്ടീസ് വിഷം കുടിച്ചു മരിച്ചിട്ടും ലോകം നന്നാകാത്തതെന്തുകൊണ്ട് ?
ലിസയുടെ ജീവിതത്തെക്കുറിച്ച് ഒരു പോഡ്കാസ്റ്റ്.
എസ് . ഗോപാലകൃഷ്ണൻ
10 ജനുവരി 2021
(Please use headphones to listen to this podcast )
പ്രിയ സുഹൃത്തേ ,
ചാരുകസേരയിൽ കിടന്നു കേൾക്കാവുന്ന ഒരു പോഡ്കാസ്റ്റ് അല്ല ഇത് .
നിങ്ങൾ ഭക്ഷണം കഴിക്കുന്നവരാണെങ്കിൽ സമരം ചെയ്യുന്ന കർഷകർ കടന്നുപോകുന്ന ദുരിതം നിങ്ങളുടെ മന:സ്സാക്ഷിയെ ഉലയ്ക്കാതെ നിവൃത്തിയില്ല .
പതിനെട്ടുകിലോമീറ്റർ നീളത്തിലാണ് ഡൽഹി -ഹരിയാന അതിർത്തിയിലെ സമരരംഗം .
ഈ കടും ശൈത്യത്തിൽ , മഴയിൽ , സമരം ചെയ്യുന്ന പതിനായിരങ്ങളിൽ 40 ശതമാനം സ്ത്രീകളാണ്. ഉറങ്ങാൻ , ടോയ്ലെറ്റിൽ പോകാൻ , സൗകര്യങ്ങളിലല്ല ....ട്രാക്ടർ ആണ് ഭവനം . വരും ദിവസങ്ങളിൽ തണുപ്പ് വർദ്ധിക്കാൻ പോകുന്നു ..
അൻപതുപേർ ഇതിനോടകം മരിച്ചുകഴിഞ്ഞു . അതിർത്തിയിൽ 24 ബാരിക്കേഡുകൾ ....ആംബുലൻസുകൾക്ക് പോകാൻപോലും വഴി തുറക്കില്ല ...
സ്വതന്ത്രഭാരതം കണ്ട ഏറ്റവും വലിയ സമരം.
ജൻ സ്വാസ്ഥ്യ അഭിയാൻ സമരഭൂമിയിൽ നടത്തിയ സർവ്വേയുടെ കണ്ടെത്തലുകൾ പൊതുജനാരോഗ്യ പ്രവർത്തകനായ വി ആർ രാമൻ വിശദീകരിക്കുന്നു .
ഓരോ ഇന്ത്യാക്കാരനും കേൾക്കേണ്ട ഒരു പോഡ്കാസ്റ്റ്
സ്നേഹപൂർവ്വം
എസ് . ഗോപാലകൃഷ്ണൻ
ഡൽഹി , 08 ജനുവരി 2021
പ്രിയ സുഹൃത്തേ ,
എഴുപത്തെട്ടുകാരിയായ , കോട്ടയംകാരിയായ , മലയാളി , ശാന്ത രണ്ടായിരത്തോളം തമിഴ് സിനിമകൾ കണ്ടയാളാണ് . അവരുടെ ജീവിതത്തിലെ സന്തോഷവേളകളിലും സന്താപവേളകളിലും അവരുടെ കൂട്ടിനെത്തുന്നത് ഒരു ശിവാജിഗണേശൻ സംഭാഷണമോ നാഗേശ്വര റാവു സംഭാഷണമോ , 1950 -1960 കാലങ്ങളിലെ തമിഴ് ഗാനസാഹിത്യമോ ആണ്. ഞാൻ ആകസ്മികമായിട്ടാണ് ശാന്തയെ കണ്ടത് . അമ്പരന്നുപോയി അവർ ജീവിതത്തെ തമിഴ് സിനിമയുമായി ഇടകലർത്തുന്ന രീതിയും അവരുടെ ഓർമ്മയും കണ്ടപ്പോൾ . സംഭാഷണത്തിന്റെ കുറച്ചു ഭാഗങ്ങൾ record ചെയ്യാൻ കഴിഞ്ഞു . അതാണ് ഈ പോഡ്കാസ്റ്റ് . കൂടെ അവർ പറയുന്ന ഗാനങ്ങളും സംഭാഷണങ്ങളും , ശിവാജിഗണേശന്റെ ഏറ്റവും ദൈർഘ്യമേറിയ സംഭാഷണശകലവും ഉൾപ്പെടുത്തിയിരിക്കുന്നു .
"തമിഴ് തിരൈപ്പട നിനൈവുകൾ "
സ്നേഹത്തോടെ
എസ് . ഗോപാലകൃഷ്ണൻ
ഡൽഹി , 07 ജനുവരി 2021
www.dillidalipodcast.com
പ്രീയ സുഹൃത്തേ,
ബാലചന്ദ്രൻ ചുള്ളിക്കാടിൻ്റെ 'പതിനെട്ടു കവിതകൾ' പ്രസിദ്ധീകൃതമായിട്ട് 2020ൽ നാൽപതാണ്ടുകൾ തികഞ്ഞു.
ആ കവിതകൾ തൻ്റെ കൗമാര- യൗവ്വനങ്ങളിൽ ചെലുത്തിയ സ്വാധീനത്തെ കുറിച്ച് മലയാളത്തിലെ പ്രമുഖ എഴുത്തുകാരി കെ ആർ മീര സംസാരിക്കുന്നു.
ഒന്ന്: മീരയുടെ ആമുഖം
രണ്ട്: മീരയുമായി സുദീർഘമായ അഭിമുഖ സംഭാഷണം
സ്നേഹത്തോടെ
എസ്. ഗോപാലകൃഷ്ണൻ
27 ഡിസമ്പർ 2020
ദില്ലി -ദാലിയുടെ പ്രിയ ശ്രോതാവേ ,
മരണമില്ലാത്ത കവിതകൾ ഭാഷയ്ക്കു നൽകി സുഗതകുമാരി യാത്രയായി .
ദില്ലി -ദാലി നൽകുന്ന അശ്രുപൂജ മൂന്നു കവികൾ സുഗതകുമാരിയുടെ കവിതകളെ കുറിച്ചെഴുതിയ മൂന്ന് മഹത്തായ ഗദ്യങ്ങളാണ്.
മൂന്ന് അവതാരികകളും ഒരു കവിതയും
1 . ബാലാമണിയമ്മ -1961 (നിരാശാകലുഷമല്ല സുഗതകുമാരിയുടെ വിഷാദം . ജീവിതത്തിന് ഒഴിച്ചുകൂടാത്തൊരു തളിർകൊള്ളലാണല്ലോ ദുഃഖം )
2 . ജി . ശങ്കരക്കുറുപ്പ് -1965 (പ്രീയപ്പെട്ട സുഗതേ , ഉഷസ്സ് ആരുടേയും അവതാരികയുമായിട്ടല്ലല്ലോ പ്രപഞ്ചത്തിലേക്കു കടന്നുവരുന്നത് ! ഈ സ്വപ്നഭൂമിയ്ക്കെന്തിനാണ് ഒരാമുഖം ?
3 . ബാലചന്ദ്രൻ ചുള്ളിക്കാട് -2016 (ഉന്മാദിനിയായ ഈ വിപിനദുർഗ്ഗയാണ് എന്റെ കാവ്യദേവത . അവളുടെ മുൻപിൽ ശിരസ്സു ഛേദിച്ച് നിവേദിച്ച് ഞാൻ അടങ്ങട്ടെ )
4 . സുഗതകുമാരിയുടെ 'കടൽ പോലൊരു രാത്രി ' കവി അൻവർ അലി ചൊല്ലുന്നു .
സ്നേഹത്തോടെ
എസ് . ഗോപാലകൃഷ്ണൻ
ഡൽഹി , 23 ഡിസംബർ 2020
പക്ഷിയാണ് ഗുരുത്വാകർഷണത്തിൻ്റെ ആജന്മശത്രു, പ്രാചീനശത്രു.
ഒരു ശരീരത്തിന് എന്തൊക്കെ ചെയ്യാൻ സാധിക്കും, പ്രത്യേകിച്ച് മരിക്കും എന്നുറപ്പായ ഒരു നിമിഷത്തിൽ?
വൈലോപ്പിള്ളി 1939 ൽ എഴുതിയ കവിതയിൽ പറയാൻ ശ്രമിക്കുന്നത് മരിക്കുമെന്നുറപ്പായ നിമിഷം നർത്തകി എല്ലാം മറന്ന് നൃത്തം ചെയ്യുമെന്നാണ്.
ഗുരുത്വാകർഷണബലത്തിനെതിരേ പക്ഷി നടത്തുന്ന കലാപം പോലൊന്ന് വൈലോപ്പിള്ളിയുടെ നർത്തകി അന്ത്യനർത്തനം കൊണ്ട് ചെയ്യുന്നു... ശവകുടീരഗഭീരശാന്തിയിലും ചിറകു മുളയ്ക്കുന്ന ജീവിതപ്രണയത്തിൻ്റെ അനശ്വര കവിതയെക്കുറിച്ച് ഒരു പോഡ്കാകാസ്റ്റ്.
കേട്ടാലും...
ഹെഡ് ഫോൺ ഉപയോഗിച്ചാൽ കൂടുതൽ നല്ല ശ്രവ്യാനുഭവം കിട്ടും.
ദൈർഘ്യം : പതിനഞ്ചു മിനിറ്റ്
സ്നേഹത്തോടെ
എസ്. ഗോപാലകൃഷ്ണൻ
ഡൽഹി, 21 ഡിസമ്പർ 2020
സി എൻ ശ്രീകണ്ഠൻ നായരെ മകൻ സി എൻ ഉണ്ണിക്കൃഷ്ണൻ അനുസ്മരിക്കുന്നു
1976 ഡിസമ്പർ പതിനേഴാം തീയതിയാണ് നാൽപ്പത്തിയെട്ടാം വയസ്സിൽ സി എൻ അന്തരിച്ചത് .
വാത്മീകിയുടെ ഒരു വാക്യത്തിന് , സീതയുടെ ഒരു വാക്കിനു വേണ്ടി എത്രയോ യാമങ്ങൾ അലഞ്ഞു, നാടകത്രയം എഴുതിയ കാലത്തെക്കുറിച്ച് സി എൻ ശ്രീകണ്ഠൻ നായർ പറഞ്ഞതിനെ കുറിച്ച് മകൻ പറയുന്നു ...ഇരുളിൽ തപ്പിത്തടഞ്ഞ അനുഭവങ്ങൾ ...
മുപ്പതാമത്തെ വയസ്സിൽ കാഞ്ചനസീത എഴുതിയ പ്രതിഭ ! കൗമാരത്തിലെ സ്വാതന്ത്ര്യ സമരകാല രാഷ്ട്രീയപ്രവർത്തനം ...ഒളിവുകാലം ...ഡോക്ടർ പി എ വേലായുധൻ പിള്ളയും കാഞ്ചനസീതയും ....'രാവണൻ എന്ന വിശ്വരൂപത്തെ ലങ്കാലക്ഷ്മി എന്ന എന്റെ കമുകിൻ പാളക്കീറിൽ വരഞ്ഞുവെച്ചതിന് മാപ്പ് ' എന്ന് സി എൻ പറഞ്ഞ കാലങ്ങൾ. സാകേതം എഴുതിയ കോട്ടയം കാലങ്ങൾ . നടരാജഗുരു,കെ . ബാലകൃഷ്ണൻ, പുളിമാന പരമേശ്വരൻ പിള്ള , എം . ഗോവിന്ദൻ, അയ്യപ്പപ്പണിക്കർ ,അരവിന്ദൻ , അടൂർ ഗോപാലകൃഷ്ണൻ , എം വി ദേവൻ ,നിത്യചൈതന്യയതി , എൻ എൻ പിള്ള , പി കെ വേണുക്കുട്ടൻ നായർ, അടൂർ ഭാസി , മധു , കെ പി ഉമ്മർ, എം കെ കെ നായർ തുടങ്ങിയവർ വീട്ടിൽ വരുന്ന കാലങ്ങൾ ..തേജോമയിയായ സ്ത്രീരൂപം ഹിന്ദി നടി വഹീദ റഹ്മാൻ ഒരു ദിവസം അച്ഛനെ കാണാൻ വന്നത്. ജി അരവിന്ദൻ വീട്ടിൽ ആസ്ഥാനഗായകനായി എത്തുന്ന സായാഹ്നങ്ങൾ . എറണാകുളത്ത് കേരള കലാപീഠം തുടങ്ങുന്ന കാലങ്ങൾ...നാൽപ്പത്തിയാറാം വയസ്സിൽ ലങ്കാലക്ഷ്മി എഴുതി തളരുന്നത് , തന്ത്രവിദ്യ പഠിക്കുന്നത്, എഴുതാതെ പോയ ഒരു നാടകം, മലമ്പുഴയിലെ യക്ഷിയ്ക്ക് ആ പേരിട്ടത് , തനതുനാടകവേദിയുടെ ബീജം, ...എന്തെല്ലാം ഓർമ്മകളാണ് തെളിമയോടെ ഈ മകൻ പറയുന്നത് !
നന്ദി , പ്രീയപ്പെട്ട ഉണ്ണി , വലിയ മലയാളികളിൽ ഒരാളായ അച്ഛനെ കുറിച്ച് ഇങ്ങനെ ഓർത്തതിന് .
പോഡ്കാസ്റ്റിലേക്ക് സ്വാഗതം
സ്നേഹത്തോടെ
എസ് . ഗോപാലകൃഷ്ണൻ
ഡൽഹി , 18 ഡിസംബർ 2020
Dear friends,
Dilli Dali is a podcast initiative from Delhi, India on our life and times.
This episode is looking at certain recent developments in India from a music lover's sociological point of view.
With warm regards,
S. Gopalakrishnan
Delhi, 17 December 2020
From the publisher's feed

0 Listeners

2 Listeners

2,413 Listeners

3 Listeners

2 Listeners