I saja dentant per part simplamain l'unica soluziun ch'ins haja anc, agiunta il pur e manader regiunal da la pli gronda assicuranza en il Grischun. Per Domenic Toutsch da Zernez ha cumenzà questa stad ina nova fasa da vita. El è sa retratg sco deputà dal Cussegl grond da la politica. Senza caricas ed uffizis, n'è l'um da 51 onns dentant betg bun da restar ditg. Il bab da dus uffants creschids ha perquai surpiglià dacurt il presidi dal Club da hockey Engiadina. Da promover la collavuraziun tranter ils differents clubs en Engiadina è ina da sias finamiras.

En il «Profil» raquinta l'anteriur president communal da Zernez e fervent defensur dals idioms rumantschs dapli da sia vita davos las culissas, ma er pertge ch'el tschertga adina puspè sfidas che mainan puspè el sin il palc.