Suenter ses studi d’economia da manaschi a Cuira è Fabian Collenberg vegnì elegì sco chanzlist communal a Sumvitg, quai cun be 23 onns. Uss, 10 onns pli tard, è el sa decidì per ina nova via, ina nova sfida. La stad mida el tar l’interpresa Curia sco cussegliader da vischnancas.

Dasperas fa Fabian Collenberg anc politica e fa part da la partida Il Center. Dapi il 2022 è el era deputà en il Cussegl grond a Cuira. «Cun 23 onns n’aveva jau anc betg gronda experientscha e sco nov chanzlist è quai stà ina pulita sfida. Jau hai però gì grond sustegn, uschia che quai è ì detg pulit.» Cumenzà a s’interessar per la politica ha Fabian Collenberg gia baud. Il 2014, suenter ses studi, è el lura daventà suppleant tar la partida Il Center, da lezzas uras la PCD Cadi. Pli tard ha Collenberg era presidià durant sis onns la partida giuvna. Il 2022 suonda il pass en il Cussegl grond. In’influenza d’entrar en quest mund politic haja gì era Martin Candinas, di Fabian Collenberg. Mo el n’haja atgnamain nagins siemis politics, i fissi dentant bel d’anc vegnir elegì l’onn proxim per in’ulteriura perioda en il Cussegl grond. Ina gronda muntada en la vita da Fabian Collenberg ha er il Club da ballape Trun/Rabius. Dasper esser giugader da la segunda equipa ha el anc surpiglià il post da cassier da l’uniun. Fabian Collenberg appreziescha cunzunt era la collegialitad cun ils congiugaders ed ils fans. Esser ina part da quest club saja insatge fitg bel. «Il sport dat a mai l’equiliber en la vita», uschia Fabian Collenberg.