«Nus avain lavurà fitg bler, nus avain ris fitg bler ed igl è stà in bel temp, ma ussa m’allegr jau sin la nova fasa da la vita», di Fritz Wyss. Il team da la mazlaria Wyss a Trun va en il spurt final. Ils 31 da december serran Fritz Wyss e sia dunna Andrea la butia e la producziun da spezialitads.

«Igl è bun che nus avain ussa bler da far, uschia n’avain nus betg temp da ponderar tge ch'ans spetga», di Fritz Wyss, spezialist da products da charn. L’istorgia da la mazlaria Wyss a Trun ha cumenzà avant 70 onns cura che Fritz Wyss senior e sia giuvna famiglia han bandunà il chantun da Lucerna per fundar lur interpresa da mazlaria a Trun. La mazlaria Wyss era en cumplaina fluriziun, cura che Fritz junior è naschì. L’uffanza ha Fritz Wyss passentà a Trun. Ils onns d’adolescenza han manà il giuven en il gimnasi a Mustér e lura en Svizra franzosa. L’emprendissadi ha Fritz Wyss fatg a Sursee. Da mattatsch schevia el: «Jau fatsch tut, ma jau na davent mai mazler».

Tge ha midà opiniun dal Fritz da lezza giada da tuttina entrar en la branscha da producziun da charn? Tge svilup, crisas e success ha el fatg tras sco interprendider en la branscha da charn durant ils davos 45 onns e pertge n’èsi betg stà pussaivel da chattar ina successiun per la mazlaria da tradiziun? Dals onns sco interprendider, ma era da sia passiun per sia famiglia e per la musica ans raquinta Fritz Wyss da Trun en l’emissiun «Profil» da sonda, ils 14 da december.