Il Jauer da 54 onns sa legra perquai dad esser cun-organisatur da la Festa da chant districtuala en Val Müstair ch'ha lieu dals 16 fin ils 18 da zercladur 2023 a Müstair. 

Gervas Rodigari è dirigent dal Cor Viril Alpina Val Müstair. Ils chantadurs – ensemen cun radund 120 voluntarias e voluntaris – organiseschan l'emprima festa da chant dapi la pandemia. L'ultima festa è stada avant set onns a Poschiavo.

Cumenzà ad organisar la festa da chant han ils commembers dal Cor Viril Alpina Val Müstair gia avant sis onns. La pandemia e collisiuns da termins han la finala sfurzà els da spustar l'eveniment regiunal sin questa stad.

Durant il temp da corona han ils chantadurs dal Cor Viril Alpina Val Müstair fatg lur meglier ed er exercità vinavant – almain cun mascrinas.

«Nus avain gì gronda fortuna che noss chor è restà en vita durant la pandemia ed er suenter n'hai betg dà sortidas da commembers.»

En ses mintgadi professiunal è il bab da dus mats creschids adina en viadi cun ses camiun. Sco impressari furnescha el carburants en tut il Grischun.

«Causa in'allergia da farina da seghel, hai jau stuì dar si mia professiun da furner e midar sin chauffeur da camiun.»

En viadi è Gervas Rodigari dentant er en ses temp liber. Saja quai faschond excursiuns en muntogna, spassegiadas cun ils skis da passlung u cun giudair er be singulas fins d'emna cun sia partenaria en lur «camper».