La Viafier retica è per uschè dir gia en la ADN da la famiglia. Gia ses tat e ses bab han lavurà per la Retica e per il nair dad in'ungla fiss el schizunt naschì sin la lingia da l'Alvra. Gian Brüngger (72) è creschì si sper staziun a Samedan. Gia sco mat e giuvenil era el mintga minuta libra sper ils binaris. Pli tard ha el lura lavurà sin differentas staziuns en Grischun. Da l'entschatta davent ha el era ramassà documents, material e fotografias che han da far cun l'istorgia da la viafier en Grischun. El ha oz in archiv persunal cun passa 20'000 fotografias ed ha scrit cudeschs davart la lingia da l'Alvra e dal Bernina sco er davart vaguns e locomotivas istoricas.

Gian Brüngger vala perquai sco enciclopedia sin duas chommas, sch'i va per l'istorgia da la Retica. La fin da sia carriera era el il responsabel per la planisaziun da la Viafier retica a Cuira ed ha uschia stuì guardar enavant, dentant di el: «Sche insatgi guarda mo enavant surves'ins ils sbagls ch'èn gia vegnids fatgs!»