La famiglia da Guido Luzio ha bandunà sco segund-davosa la vischnanca da Marmorera. Il 1954 aveva el sis onns ed el sa regorda anc fitg bain dal viadi fin a Rona sin la punt averta dal camiun.

En il nov dachasa haja el sco uffant chattà svelt novs amis e tuttina haja el er s'accurschì da temp en temp dad esser l’ester, il fulaster. Sia mamma, ina Taliana, haja gì dapli difficultads da bandunar Marmorera che ses bab. Ma discurrì vi da maisa hajan els darar davart quai.

Guido Luzio ha gia adina acceptà quai ch’è e guardà enavant. Era cun dudesch onns, cura ch’el ha prest pers ses bratsch pervia d’in accident cun in schluppet da chatscha. El ha emprendì dissegnader da construcziun, ha fatg la scola tecnica da la saira ed è daventà inschignier da construcziun. En questa funcziun ha el tranter auter realisà il Lai Barnagn a Savognin.