នៅ​ថ្ងៃទី១នៃពិធី​បុណ្យ​កាន់​បិណ្ឌ​គ្រប់​វត្ត​អារ៉ាម​ នៅ​ទូទាំង​ប្រទេស​កម្ពុជា ​បាន​បើក​ទ្វារ​ទទួល​ពុទ្ធ​បរិស័ទ​ជិត​ឆ្ងាយ​នាំ​យក​តេយ្យទាន​និង​ចង្ហាន់​មក​ប្រគេន​ព្រះសង្ឃ ដើម្បី​ឧទ្ទិស​កុសលដល់ញាតិមិត្តដូនតាដែលបានចែកឋានទៅ។ ដូនចាស់​មួយ​ចំនួន​ដែល​វិទ្យុ​បារាំងអន្តរជាតិបានជួបសម្ភាស បង្ហាញអារម្មណ៍សប្បាយ​រីករាយ​ក្នុងការ​ធ្វើបុណ្យ​នៅ​ពេល​នេះ បន្ទាប់​ពី២ឆ្នាំ​មុន​ការ​ធ្វើ​មានការ​រឹត​ដ្បិត​ដោយសារ​វិធានការ​កូវីដ​១៩​។ ជា​ការ​សម្គាល់ ​ការ​ធ្វើ​បុណ្យ ​ក្នុងបរិបទ​បច្ចុប្បន្ន ​លែង​កំណត់​លើ​មនុស្ស​ចាស់​ទៀត​ហើយ ​ដោយ​យុវជន​ឬ​មនុស្ស​ពេញ​កម្លាំង គេ​បាន​ធ្វើ​បដិវត្តន៍​ផ្នត់​គំនិត​គិត​ថា ធ្វើ​បុណ្យ​បាន​បុណ្យ សាង​បាប​ទទួល​បាន​បាប។