នៅ​កម្ពុជា​ការ​លើក​កម្ពស់​កម្រិត​ជីវភាព​ពលរដ្ឋ​ធ្វើ​ការងារ​ផ្នែក​អនាម័យ​មិន​មាន​ទាន់​ការ​យក​ចិត្ត​ទុក​ដាក់នៅ​ឡើយ​ទេ​និយាយ​ជា​រួម និង​និយាយ​ដោយ​ឡែក​សម្រាប់​កម្មករ​ថែ​ទាំ​លូ។ កម្មករ​ថែ​ទាំលូ​ត្រូវ​បាន​គេមើល​ឃើញ​ដូច​គ្នា​ថា ជា​ក្រុម​ងាយ​គ្រោះ​បំផុត​ពី​សកម្មភាព​ការងារ​របស់​ខ្លួន និង​ការ​រើស​អើង​ពី​មនុស្សនៅ​ក្នុង​សង្គម​មួយ​ចំនួន។ កម្មករ​ថែ​ទាំ​លូ​ម្នាក់​និយាយ​ថា ពួកគេ​មិន​សុំ​អ្វី​ច្រើន​ទេ សុំ​តែ​ម្យ៉ាង​គត់​បញ្ឈប់ការ​មើល​ងាយ​ដោយ​ពាក្យ​សម្ដី និង​បង្ហាញ​ការ​រើសអើង​ដោយ​កាយ​វិកា។  នៅ​ចំពោះ​មុខ​ស្ថានភាព​បែបនេះ ភាគី​ពាក់ព័ន្ធ​ទាំង​រដ្ឋាភិបាល និង​អង្គការ​ក្រៅ​រដ្ឋាភិបាល​បាន​ពួត​ដៃ​គ្នា​ផ្សព្វផ្សាយ​ការ​លើក​កម្ពស់​កម្មករថែ​ទាំ​លូ​ទាំង​ផ្នែក​សុខ​ភាព និង​បញ្ឈប់​ការ​រើស​អើង​ជា​ដើម។