Koɗo men hannde

Fitinaaji liddu rewɓe ɓen no ɓeydii e dow alhaali hulɓiniiɗo. E battane ngal ñallal hertinanaangal riiwugol fitina e hoore rewɓe ɓen.En kaalane dow ndee toɓɓere. Kabaaru rewɓe 60 saasɓe pittaali maɓɓe e nder galleeji maɓɓe. Bone sakkitiiɗo waɗude on ko ñannde 25 lewru 11ɓuru ndee hitaande. Gorgo wari debbo jogiiɗo ɓiɓɓe mum nayo. Fii kala  kaɓanɗe e cippirooji no waɗeede e baŋŋe pelle renndo, kono haa jooni musiibaaji ɗin no jokki, no duumii e kadi no jaali. Ko waɗi ɗum no ɓeydii e nder Kamerun, e nder aduna on? Ko pehe holɗe walla dabareeji holɗi haanaa ɓameede ngam faddagol ɗii fitinaaji? Ko Jayli Aamadu Amal debbo Pullo, kamerunaajo, winndiyankeejo lolluɗo jaabotoo ɗee lamnde. Himo e faandu haala Rufaa'u Baaba Ashwariya, gooto e nultondiraaɗo amen Kamerun.

Dental Adunaaru  jertinii ko faati e yeeyugol kaŋŋe ngol ɗoftaaki sariya e nder diiwal Sahel. Salndu ONU toppitiindu kala ko yowitii e haɓugol doroogu e boneeji goɗɗi, feññinii e cimtol wonnde yeeygol kaŋŋe ngol ɗoftaaki sariya wonii huunde aaninde e nder yoga e leyɗe hono Burkina Faso , Caad, Niijeer e  Moritani, sabu ɗum ko huunde nde ɗee pelle joggiiɗe kaɓɓirɗe kutortoo e nder ngal diiwal. "François Patuel", wiɗtotooɗo ONUDC, tawaaɗo e ɓayyinɓe ngol cimtol, ina artana en e maggol e hoore e hoore yaajinagaol. Himo e faandu haala Muusa Umar Bari.

Ko Aliiwu BAH dawroyankeejo Gine woni koɗo men hannde. Oo hooreejo fedde politik "MoDel" hino ari Dakar ngam hollugol deftere makko nde o inniri “Agir pour la Guinée” Daranagol Gine. E nder nguu njillu makko men jaɓɓike mo e suudu yottirnirdu kaabaaruuji rfi Fulfulde. Men yewtidii e makko ko faati e alhaali dawro Gine. Hiɗon anndi, ɓurii duuɓi ɗiɗi gila laamu faddewu ardii ndii leydi. Ko haldaa kon, ko yo nguu laamu faddewu joofu e hitaande 2024, kono e yi’aango Aliwu Bah oo happu ko hoore karhan o teddinirtee. Himo jaaboo lamnde Ibrahiima Timmbi Bah.

Hare hakkunde Hamas e Israayel dartoto e nder balɗe nayi. Israayelinaaɓe 50 accitee, lomto palestinaaɓe 150. Guuree kadi waawan naatude e nder tuɗɗere Gaza. Ko ngal kawral ɗoo heɓaa hakkunde Hamas e Israayel, e dow ballal Dawlaaji Ndentuɗe Amerik wonndude e Qatar e Ejipt (Misra). Ngal kawral laatoto welo-welo koreeji ɓee yimɓe siwlaaɓe e yimɓe ɓiliiɓe e ndee hawre saabiinde maaygol ko ɓuri palestinaaɓe 14 000 e Israayelinaaɓe 1 400. Holno ngal kawral heɓori? Mbele hingal waawi dartinnde ndee hawre ko ɓooyi? Ko Dr Abdu Ba jooma ganndal taariika Israayel e Palestin, woni koɗo men hannde. Himo jaaboo lamnde Ibrahiima Timmbi Bah

« CDC hayrii (perdii) ɗii suɓngooji kono Liberiya kañum foolii », ko ɗii konnguɗi ɗoo, Georges Weah holliri wonnde o jaɓii  poolgu "Joseph Boakai" e ɗee woote waɗuɗe ñannde 14 lewru 11ɓuru, Liberiya. Ko daaɗe 20 000 Joseph Boakai fooliri Georges Weah. Caggal John Dramani Mahama hooreejo kiɗɗo Ghana, Goodluck Jonathan mo Niijeriya, George Weah tawaama e hooreeɓe Afrik jaɓuɓe folleede e laamu caggal ardagol leydi maɓɓe happu gooto. Holko saabii George Weah folleede ? Ko e alhaali hommbo o acci e ndii leydi makko ? Ko holɗum George Weah waawi waɗannde leydi makko e lebbi walla duuɓi arooji ? Ko Usmaan Jallo waajotooɗo walla diiseteeɗo George Weah woni koɗo men hannde. Himo Jaaboo lamnde Ibrahiima Timmbi Bah.

Go’o e nder teemederewel (1%) yimɓe ɓurɓe e alɗude e nder aduna oo, no wona sabu guleeki weeyo laabi nayi ɓuri ko duunde Afrik ndee fow battinta koo. Ko ɗum, holli fedde OXFAM haɓoore heege (yolbere) e nder nduu adunaaru. E nder ciimtol yaltugol hanki, OXFAM nantinii wonnde hooreeɓe leyɗe wonndude e alɗuɓe hino haani ustude gollirgol masinji wonɗi e saabaade nguleeki weeyo. OXFAM yaltinii ngol ciimtol jonte seeɗa ado  ndee jonnde cop 28 fuɗɗaade "Dubaï". Hiɗon anndi jonnde Cop ko hiwirnde taariindi men. Ko Usman Jallo golloowo e fedde OXFAM woni koɗo men hannde. Himo jaaboo lamnde Ibrahiima Timmbi Bah.

Ko holno haɓirten ɗee bone booto (mbuusu) poore ? Leyɗe 175 tummbondirii e ndee yontere faltiinde Nayrobi laamorgo Keniya ngam yewtugol e hoore ndee toɓɓere aaninnde. Dental Adunaaru (ONU) hino okki leyɗe ɗee duuɓi ɗiɗi ngam dañugal kawral dartinayngal ɗee bone bootooji poore. Ko faamondiral e leyɗe jogiiɗe petrol walla kuɓɓan saattini oo alhaali. Ko holno ngal kawral heɓorta ? Ko holɗun haani wonude mbaadi leyɗe Afrik ? Ko Musokoro Sidibe, daaraniiɗo kiwal taariindi woni koɗo men hannde. E bi’ol makko, neɗɗo kala no woodi ko waawi waɗude ngam dartinngol gollirgol bootu poore. Himo jaaboo lamnde Ibrahiima Timmbi Bah.

E talaata faltiiɗo, konu Mali heɓtii Kidal, saare nde murtuɓe CSP joginoo ɓurii duuɓi sappo. Ko kolonel Asimi Goyta yaltini ngol hollitol nantinngol wonnde Kidal wontii e juuɗe ardiiɓe Mali . Kono ko ballal mersenerɓe Wagner neweni ngol heɓtugol ndee saare. Ɓee mersenerɓe yi’aama e nate ɗe yimɓe Kidal ɓami. Huunde nde woowaaka yi’eede. Sabu hari yimɓe Wagner ko suuɗiiɓe. Holko saabii e ngol laawol ɗoo ɓe jaɓii yaltude e nate walla e mbooji? Ko holno jokkondiral maɓɓe e konu Mali saatii wa’ude ? Ko Saajo Morel Kante wiɗtotooɗo, woni koɗo men hannde. Himo jaaboo lamande Sori Ibrahiim. Ko Ummu Bah e Timmbi Bah, firi ɗii konnguɗi.

Konu Mali hollii hanki wonnde ngu yottike Kidal, diiwal hittungal wonunoongal e juuɗe pelle murtuɓe CSP-PSD, waɗii duuɓi. Heɓtugol Kidal waɗii caggal hare saɗtuɗe. Hay so tawii ɗum ɗoo wonanii konu Mali poolgu, e bi’ol, Mammadu Omar LI wiɗtotooɗo e alhaali kuliyankaaku e nder leyɗe sahel, yottaade Kidal e Jooɗaade Kidal, wonaa gootum, ɗum hino serti. E yi’annde makko konu Mali waawa tabinnde jam e deenaagu e nder ngal diiwal. Mammadu Omar Lii no jaaboo lamnde Ibrahiima Timmbi Bah.

Guillaume Soro hollii e alat falitiiɗo o dartinan fattagol makko leyɗe goɗɗe. Oo hooreejo jaagorɓe kiɗɗo Koddiwaar hino eggi e leydi makko gila e hitaande 2019, caggal lurral makko e Alasaabe Waatara, hooreejo Koddiwaar. Hanki Guillaume Soro yiidii e hooreeɓe Niijeer to laamorgo Ñaamey, leydi ŋakkundi kawral hakkunde mayri e Koddiwaae. Mbele ko e ndin leydi o jooɗotoo ? Holko saabi yo o hollu faandaare makko artugol Afrik ? Koɗo men on ko Abdurahman Bari hertorɗo renndo. Himo jaabo lamnde Ibrahiima Timmbi Bah.