Koɗo men hannde

E nder RD KonNgo, ko Félix Tshisekedi hooreejo leydi ndii fooli e suɓngooji faltiiɗi . O heɓii daaɗe 73%, e bi’ol fedde suudu fewnoore wote e nder ndii leydi. Ko Moïse Katumbi, heɓuɗo ko fawi e daaɗe18 % e Martin Fayulu dañuɗo 5,33 % ari ɗiɗaɓo e tataɓo e ɗee wote. Kono lunndiiɓe laamu woɓɓe, jaɓaali ɗii njaltuɗi. E bi’ol maɓɓe guyaale mawɗe waɗii e nder ɗee wote. Ko holɗun saabi ngal poolal Félix Tshisekedi ? Mbele ndee ŋiñannde ɓee lunndiiɓe no holli laaɓal ndee wote no ŋakki ? Ko Mahmadou Ahmadou jannginoowo e duɗe mawɗe Kamerun woni koɗo men hannde. Himo Jaaboo lamnde Ibrahiima Timmbi Bah.

Kawtital pelle Moritani daraniiɗe hakkeeji neɗɗanke waɗii diiño (jonnde)  e ndee jumaare faltiinde yeeso suudu Dental Adunaaru ONI, Nuwaakshott. Ko saabi ngal kawrital, ko hollude mette e dow warngooji wonaaɗi e waɗeede e hoore siwilɓe e nder leyɗe Sahel. Ɗee pelle ñaagike hooreeɓe leyɗe CEDEAO wonnude e mofte winndere ɓamugol pehe dartinayɗe ɗii warngooji wonaaɗi e waɗeede Mali e Burkina Faso. Demmba Sall tawaaɗo e fewnuɓe (yuɓɓinɓe) ngoo diiño woni koɗo men hannde. Himo jaaboo lamnde Ibrahiima Timmbi Bah.

Najeriya, ko famɗi fuu, yimɓe 160 mbaraama hakkunde aset e altine faltiinde to hakkundeere leydi ndii e diiwal " Plateau". Ko njannguuji ɗi jogiiɓe kaɓirɗe mbaɗi e nder gure Mangu, Bokkos e Barkin-Ladi. Ko wona maayɓe ɓe tan, waɗi-boniyankooɓe ɓee nduppii jawle keewɗe. Ɗum wonaa hikka fuɗɗi. Saaha kala suga ɗii fitinaaji hino waɗa hakkunde leƴƴi. E yi'annde Dr Salim Muusa Umaar, heertorɗo geɗe ndeenaagu ɗii fitinaaji fawiiɗi e diine e leƴƴi, safaara majji hino naamndii golle mawɗe. Ko kanko woni koɗo men hannde. Himo Jaaboo lamnde Ya'u Siuto Gemmbu.

Mali suɓngooji hooreyaaku hino haanunooɗi waɗude e lewru 4ɓuru hitaande 2024 kono ɗi laatotaaka. Gila guwerneman laamu faddewu Mali anndini ɗum, haa hannde ñalaade hay wootere suɓaaka ngam laatingol ɗee woote darnitayɗe nguu laamu faddewu. Ko ɗum saabi yo Aamadu Koyta hooreejo fedde dawro PS Yeelen Kura yo hollu wonnde laamu faddewu haanaa jooɗaade haa abada. Oo ñaagike yimɓe dawro Mali jogondirgol ngam artirgol demokarasi e nder leydi ndii. Heɗoɗen mo e faandu haala Ibrahiima Timbi Bah.

Gine, cumu marirde kuɓɓam walla carburant saabike mayde yimɓe 23. Ko ɓe 285 barmi, ɓurɓe 1000 eggii. Oo fitina hino mawni, sabu ndee marirde kuɓɓam ko kaloum woni, nokkuure nde yimɓe hoɗi sera mum. Hannde, hay si tawii sabu nguu cumu anndaaka, lamnde ɗuuɗuɗe hino woodii. Holko saabi yimɓe no hoɗi sera ndee marirde ? Mbele hinde waawaa eggineede ? Ko Ceerno Ibrahima BALDE, arshitekjo, ko ɗum woni hertorɗo koɗanteeri, woni koɗo men hannde. Himo jaaboo lamnde Ibrahiima Timmbi Bah.

Faransi, sariya keso jowitiiɗo gonal woɓɓe walla jananɓe e nder leydi ndin  wotaama talaata  ñannde 20 lewru 12ɓuru 2023. Ndee eɓɓoore sariya ko ngam rewnuude lawol yimɓe iwruuɓe leyɗe janane wonɓe e nder Faransi. Ko faati e heɓugol kaytaaji, sariya wonnde e nder leydi ndii, e heɓugol ɗeri newnooji golle no jeyaa e  toɓɓe mawɗe e ndee eɓɓoore sariya. Wootugol oo sariya ko ngoƴo mawɗo wonande pelle daraniiɗe hakkeeji ɗaniyankooɓe wonnɓe e nder Faransi. Mohamed Juulde Bah no arta e ndee eɓɓoore sariya e caɗeele gonnɗe e mum. Ko e faandu haala Muusa Umaar Bari o yewti.

Senegal, ngam dartingol hare hakkunnde remooɓe e durooɓe guwerneman on ɓamii sariya, noddiraaɗo e faransiire "Code Pastoral", e ndee atenenre faltiinde. Oo sariya newinan balle ɗe laamu haani waɗannde aynooɓe. Ko faatii e nguyka daabaaji, alhaali tampinɗo ɓee aynooɓe sabu hakkunde hitaande 2020 e 2021, hino timmi kolce  21 000 daabaaji wujjaaɗi e nderSenegaal, aynooɓe ɓee hino ɗaminii wonnde oo sariya ustan oo musiiba. Ko Aliiwu Demmburu Soh woni koɗo men hannde. Himo jaaboo lamnde Ibrahiima Timmbi Bah.

RD.Konngo, ko hannde suɓngooji hooreeyaaku waɗata e nder ndii leydi. Ko wotooɓe miliyonji 43 woni ko suɓotoo hakkunde kandidaaɓe 19yo. No tawaa e maɓɓe, hooreejo leydi ndin Felix Tshisekedi wonndude e lunndiiɓe mo, no jeyaa e ɓen ko "Moise Katummbi", "Martin Fayulu" e Dr Denis Mukwege. Ko RD Konngo woni leydi ɗiɗaɓiri ɓurndi mawnude e nder Akrik. Waawugol naɓude aalaaji wootirɗi e nder mayri fow wonaa ko weeɓani guwerneman on. Ko holno ɗii suɓngooji laatorta no laaɓiri e nder leydi ndii fof ? Ngam taskagol ɗee wote, Ibrahiima Timmbi Bah no jaɓɓii Usmanu Magaji ballifotooɗo defte, taskotooɗo kabaaruuji. Heɗoɗen.

Koddiwaar, mooɓondiral fedde dawro PDC no wi’ee e faransiire kongere laataaki e ndee yontere faltiinde. Ko e nder maggu, hooreejo ndee walde politik suɓetenoo. Ko suudu ñaawirdu Abijan firti nguu mbatu caggal wullitannde hooreeɓe PDCI ɗiɗo, saliiɓe ndee jonnde laatoo. E yi’aango Abdurahmaan BARI hertorɗo dawro ko hare ngam henndagol hooreyaaku ndee fedde saabii ngal lurral hakkunde ardiiɓe PDCI. Ko kanko woni koɗo men hannde. Himo jaaboo lamnde Ibrahiima Timmbi Bah.

Ko "Stéphanie Bluetooth" maaginoowo walla kirɗinoowo ɓii Konngo Brazza fooli hikka e ndii mbuuñaari « prix Rfi talent du rire ». Mbarjaari RFI waawuɓe kirɗinde. Ko oo kirɗinoowo mo Niijeer, noddirteeɗo Mamaan sinci ndi ngam wallugol sukaaɓe jalnooɓe Afrik Haali-faransiire. E nder taskaram men koɗo men hannde, en yewtan fii satteende dillooɓe e maaginaaku e ɗee leyɗe men, ɗe caɗeele politik e kisal ɗuuɗi e mum e oo ɗoo wakati. Koɗo men on, ko Rigel Gandhi kirɗinoowo ginenaajo tawaaɗo e yimɓe 10 foolotirɓe e ndii mbuuñaari « prix Rfi talent du rire ». E bi’ol makko, e oo saaha mo tawata, fitinaaji  e kuliyankaaku, ɓitteende dawro e ɗalle ɗe rewaa sariya  no jaalii e leyɗe Afrik, maaginaaku no addana sukaaɓe ɓee tama'u e yaakaare. Himo jaaboo lamnde Ibrahiima Timmbi Bah.