Koɗo men hannde

COP 28 joofii hankin to Dubaay. Ngal kawral taariikayankowal hollungal ɗee leyɗe jogiiɗe oogirɗe dartinan seeɗa-seeɗa gollitirgol “Energies Fossiles” ɗun woni uyki sunneteeki, wano, Gaaz, Petrole e Kemmbu. Faandaare nden ko dartinngol bone Karboon ɗoo e hitaande 2050. Hay so tawii ngal kawral wonanii weltaare yimɓe ɗuuɗuɓe e nder nduu adunaaru, woodii yimɓe jeyaaɓe sosyete siwil holluɓe wonnde hingal ŋakki. E ɓen, no tawaa Ijjatu Suwaare, daraniiɗo kiwal taariindi, tawaaɗo e ndee jonnde kop28 waɗunde Dubaay. Himo jaaboo lamnde Ibrahiima Timmbi Bah.

Ko rewɓe Kamerunaaɓe ɗiɗo henndii hikka mbuuñaari noddiraandi e Faransiire "Prix Jeunes Talents L'Oréal-Unesco Pour les Femmes et la Science". Ɗum ko mbuuñaari jonneteendi rewɓe waɗuɓe wiɗto e dow gannde. Ɓee, ko Hajiijatu  Ɗayru e  Fanta Yadang wiɗtotooɓe ko faati e cellal. Ɓe waɗii golle mawɗe e hoore nawnaaje Kardiyo-vaskileer e Alzheimer. Ɗee gollemaɓɓe wallan ñawndugol ɗee nawnaaje. Ko Fanta Yadang woni koɗo men hannde. Himo jaaboo lamnde Ibrahiima Timmbi Bah.

CEDEAO ustii muuseendi konnguɗi e hoore konunkooɓe ciwliiɓe laamu Niijeer. Ndee fedde leyɗe hirnaange Afrik jaɓii yewtidude e ɓee ardiiɓe CNSP. CEDEAO imminan hooreeɓe leyɗe Togo, Benen e Sarlon faade Ñamey e ɗee balɗe arooje. Kono, Hooreeɓe leyɗe hirnaage Afrik nantinii wonnde ɗee lette walla yagginanɗe fawaaɗe e hoore Niijeer waawetaake itteede so Mohammed Bazum accitaaka kanko e yimɓe makko. Holko ko saabii yo CEDEAO artir caggal ? Mbele ɓee hooreeɓe leyɗe imminaaɓe Niijeer no jogii fartanŋe heɓugol poorgu ? Ko Dr Abdu Bah, hertorɗo dawro woni koɗo men hannde. Himo jaaboo lamnde Ibrahiima Timmbi Bah

Ko Usmaan Gaawal Jallo ƴettoowo konngol guwerneman Gine woni koɗo men hannde. O yewtii ko faati e tonngannde meejaaje renndo goɗɗe ɗum ko Facebook, X e WhatsApp, wonndude e dartingol porogramuuji (njuɓɓudiiji) teleeji e rajooji goɗɗi e nder "Bouquet Canal+", sosiyete saakitooɓe mejaaje. E bi’ol oo ƴettoowo konngol e innde guwerneman, ko saabii ɓamugol ɗee pellite ko fii tabinngol Jam e deenaagu e nder Gine. Himo jaaboo lamnde Ibrahiima Timmbi Bah.

Ko ɗum saabi yo oo hooreejo leydi fusu mbatu mawngu (parleman) Gine-Bisawo. O hollii wonnde o joɗɗinan guwerneman keso e balɗe ngarooje ɗee. Domingos Simões Pereira lunndiiɗo laamu, arɗiiɗo, PAIGC wonunoo hooreejo oo parleman fusaaɗo jaɓɓiɗen. Ko fedde politik makko fooluno e suɓngooji sarɗiyankooɓe faltiiɗi. Ko kanko woni koɗo men. Himo yeddi ɗee tuume Umaru Siisoko Mbaalo. Ko Laurent Correau waɗi yewtere ndee. Ibrahiima Timmbi Bah e Abdullaay Jallo, firi ɗii konnguɗi.

Kawral hakkunde Umaro Siisoko Mbaalo e Domingos Simões Pereira, lunndiiɗo laamu makko oo, ko lebbi jeego waɗi. Ko fedde politik PAIGC nde Domingos Simões Pereira ardii fooluno e suɓngooji sarɗiyankooɓe faltiiɗi. Ɗum saabi yo ndee walde dawro suɓo hooreejo jaagorɓe. Kono kawral hakkunde ɓee dawroyankooɓe ɗiɗo : Umaro Sissoco Embaló e Domingos Simões Pereira ɓooyaali. Kono ko hare hakkunde konu toppiingu deenaagu hooreejo leydi oo e konunkooɓe nondirteeɓe "garde nationale" semmbini ngal lurral saabiingal yo hooreejo leydi ndii fusugol mbatu ngenndiiwu nguu. Fusannde nde wonaa bettere, e bi’ol Dr Mammadu Muktaar Jallo hertorɗo dawro. Ko kanko woni koɗo men hannde. Heɗoɗen mo e faandu haala Ibrahiima Timmbi Bah.

E ndee alkamisaare ñannde 07 lewru 12ɓuru 2023, ko Sonna Dukure Asmaa'u BAH, senndikaajo ardiiɗo fedde daraniinde hakkeeji rewɓe gollooɓe e nder cuuɗi e otelji Gine, "SYNEM Guinée", jaɓɓotoɗen e taskaram Koɗo Men Hannde #KMH. Ibrahiima Timmbi Bah yewtidan e makko ko faatii e hakkeeji rewɓe gollooɓe e nder ɗii otelji. Hiɗon anndi timmii  balɗe, Dental Adunaaru "ONU" no waɗude jeewte ngam tabintinngol hakkeeji rewɓe. Heɗoɗen mo.

Burkina Faso e Niijeer, leyɗe ɗiɗi ngonnɗe e juuɗe konunkooɓe nantinii e aset ñannde 2 lewru nduu lewru wonnde ɓe njaltii e nder ndii njuɓɓudi G5 Sahel e calɗi mum, tentinii e konu nguu ɓe ndendunoo. E bi'ol ardiiɓe Fandaare maɓɓe e ngal pellital ardiiɓe ɓe ko heɓde jeytaare maɓɓe. Dr Mammadu SOW, hertroɗo sariya winndere, mawɗo wiɗtooɓe to suudu halfinaandu hakkeeji neɗɗanke e jam e nder Moritani hollitii wonnde njuɓɓundi ndii  timminaani fandaare mayre e kadi caggal yaltugol ɗee leyɗe tati ndii njuɓɓudi nattii woodeede. O yewtiidi e Muusa Umaar BARI.

Gine, gila ñannde 24 lewru 11ɓuru, seŋagol e internet no satti, wanngagol ngol yaawaa. Hay gooto waawaa seŋaade e mejaaje renndo wani ko Facebook, WhatsApp, walla X so wonaa gollirooɓe VPN. Pelle daraniiɗe ko hakkeeji neɗɗanke hollii wonnde ko guwerneman on woni caggal ndee oo alhaali. Kono Usman Gaawal Jallo, Jaagorɗo ƴettoowo konngol guwerneman Gine, hollii wonnde internet « tawaaka e hakkeeji neɗɗanke », o ɓeydi  wonnde wonaa kamɓe taƴi ɗee mejaaje renndo. Konnguɗi aaninɗi Abdullaay Saajo Jallo, tawaaɗo e mojobere ABLOGUI daraniinde gollirooɓe internet. Himo jaaboo lamnde Ibrahiima Timmbi Bah.

Moritani Rewɓe ɗuuɗuɓe waɗii seppo e aset faltiinde e nder laamorgo Nuwaak. Faandaare nden ko ƴamugol yo eɓɓoore sariya noddiraande Karama laatine Sariya. Ndee eɓɓoore nde guwerneman leydi ndii ɓami, ko reenirde hakkeeji rewɓe, dartina fitinaaji wonaaɗi e waɗeede e hoore maɓɓe. Kono, ardiiɓe diina woɓɓe jaaɓaali ndee eɓɓoore, sabu e bi’ol maɓɓe hinde lunndi diina. Pelle rewɓe Moritani jaɓaali ɗun. Ko Siniya Haydara woni koɗo men hannde. Ko kanko woni hooreejo fedde rewɓe daraniiɓe hakkeeji neɗɗanke e nder Moritani, no wi’ee Fedde rewɓe ne'ooɓe ko faati teddingol hakkeeji neɗɗo e nder Moritani. Himo jaaboo lamnde Ibrahiima Timmbi Bah.