Koɗo men hannde

Senegaal e ɗii lebbi sakkitiiɗi ɗoo kokayiin ɗuuɗuɗo nanngaama e maaje ndii leydi. Hakkunde lewru 11ɓuru e 12ɓuru "marine" Senegaal nanngii ko ɓaadii toonuuji 6 kokayiin. Ɗun no yaha miliyonji teemeɗɗe ero. Holko saabii oo doroogu no nanngee ɗoo ? Ko honto o wonanoo e naɓeede? Mbele kokayiin wattaama ñaameede e leyɗe hirnaange Afrik? Ngam jaabagol ɗee lamnde koɗo men hannde ko Muhammadu KAAN golloowo e fedde "Global Initiative" wiɗtotoonde kala ko faatii e doroogu. Himo e faandu haala Ibrahiima Timmbi Bah.

Gine : E nder lowre wi'eteende "avenirguinee.org", Damu Kamara ardiiɗo fedde Kuruwa Ruus e nder saare Sigiri Gine, hollii wonnde  yimɓe 483 maayii caggal nde leydi ulfitii e maɓɓe e nder oogirde kaŋŋe wonɗe Sigiri. Huunde hollunde wonnde ɗee oggirde leydi ndin aldaa e kiwal. Koɗo men hande ko Aamadu Bah, horeejo dental  "Action Mines Guinée" himo sifoo ko woni sabu ngol maaygol ɓee asooɓe kaŋŋe e nder ɗee gaayɗe.

Najeriya, hooreeɓe leydi ndii dartinii jaɓugol diplomji walla seedanteeji Benen e Togo . Ɗum ko caggal nde tefoore jaayndeyankeejo holli wonnde diploomji fenaandeeji hino moƴƴinee e nder ɗee leyɗe ɗiɗi naadee Najeriya. Oo jaayndeyankeejo waɗuɗo ndee tefoore waawii heɓude diploom iniwersiteerjo e nder lebbi ɗiɗi. Ngam yewtugol e ndee toɓɓere koɗo men hannde ko Porofeseer Alfa Aamadu Bano BARI, toowa-ganndaljo jaagorɗo jannde e needi Gine kiɗɗo. E bi’ol makko diploomji fenaandeeji no moƴƴinee e nder leyɗe ɗuuɗuɗe. Ngam dartingol ɗum, hooreeɓe Afrik hino haani ɓamude dabareeji newinayɗi anndugol kala neɗɗo heɓuɗo diploom. Himo jaaboo lamnde Ibrahiima Timmbi Bah

Deesewal KAN foɗɗoto Koddiwaar e ndee aseweere aroore. Hikka kadi ko diɗɗe 24 foolotirta e ngal deesewal coftal ɓalli ɓurngal mawnude e nder Afrik. Ko Koddiwaar e Gine-Bisawo udditata ngal kawrital e ndee aseweere. Mbele Senegaal, kippu jogiiɗo ngal deesewal waawan heddoraade e maggal, yeeso diɗɗe Marok, Aljeriya e Najeryia, yaakoraaɗe e ngol laawol? Ko Yoro Manngara, hertorɗo fuku-koyngal woni koɗo men hannde. Himo holla yi’annde makko e faandu haala Ibrahiima Timmbi Bah.

Senegaal e Moritani siifii kawral faatiingal e awo. Ngal kawral hino yaanani awooɓe Senegal 500wo nanngugol leƴƴi e nder maayo Mortitani. Ngal, ko nanondiral laataniingal welataare awooɓe Senegal. Sabu gila Nuwaakshot haɗi ɓe nanngo leƴƴi e nder maayo Moritani, awooɓe Senegal ɗuuɗuɓe alaa golle, woɓɓe wurin naatii e ɗalle ɗe ɗoftaaki sariya. Ko ɗum si faandaare ngal kawral ko wallugol ɓe ɓe heɓa golle newinayɗe heɓo liƴƴi e luummoji Senegaal. Ko Jeen FAAY hooreejo yiilirde toppitiinde awo Senegaal woni koɗo men hannde. Himo jaaboo lamnde Ibrahima Timmbi Bah.

Hannde neɗanke faamii wonnde, ɓamtaare waawaa laataade e hoore leydi ndin, si tawii o waylaani noone no o wuuriri e dow mayri. Ngam yo o waawu foolude mbayliigu weeyo, caɗeele taariindi, nguleendi e kokke, ko maa o wayla noone ngurdam makko. Awa ko wiide tan wonnde neɗɗanke no humii e hunndaari mum sabu ko e mayri o ittata ko o wuura.Tedduɓe on bi'aama bismilla mon e Kiwal Taarindi. E oo ɗoo taskaram men yewtay ko faati e tuuɗe woɓɓe wi’a ɗum kurujuru teskaaɗum e jeereeji ɓurɗi mawnude e yoga e laamorɗe e goɗɗe e nder Afrik . Wano Nuwaakshoot, Bamako, Konakiri walla Dakar. Ɗum no addande jamaa on tiiɗallaaji, tuunina taarindi men. Ɗuuɗuɓe e dillayɓe on fannu hollii mettu maɓɓe, kono kadi ɓe holli pehe haanaaɗe ƴetteede ngam haɓude ɗee tuuɗe. Ngam yewtude e dow ndee toɓɓere en bismoto Sonna Kalabiri Helene arɗiiɗo fedde nde wonaa laamuyankoore waylaynde tuuɗe wi'eteende " Amavac", Madaani Si gooto e ardiiɓe fedde sennddikaaɓerenndinde gollooɓe e on fannu ɗon. Kono ko adii ɗum en heɗoto jantoore nultondiraaɗo men to Nuwaakshot. Ka joofingol en jaɓɓoto Kadi JALLO gollanoowo hoore mum jeyaaɗo Gine ginenaajo.

Gine, jonte tati caggal cumu marirde kuɓɓam Konakri, golle ɗuuɗuɗe dartike e nder ndii leydi. Ɗum woni, ko waɗɗeteeɗi, ngeygu, demal, awo walla ngaynaaka, golle ɗe ginenaaɓe ɓurɓe ɗuuɗude waɗata. Oo alhaali hino maapini hooreeɓe Gine. Gila nguu cumu waɗi, jaagorɓe buy yahii e leyɗe kawtalje Gine ngam ɗaɓɓugol ballal no karbiran naatira e nder leydi ndii. Kono ɗoo yo ngal ballal laato, caɗeele faggudu mawnii, coggeeli ñaameteeji no ɓeydaade. Ngam taskagol ndee satteende, Ibrahiima Timmbi Bah no jaɓɓii Mammadu Faalilu Jallo, fagguduyanke. Heɗoɗen ɓe.

Gine, rewɓe 205 doolaama e ndee hitaande yawtunde. Ndee limoore no uytii si en eɓɓindiriinde e ɓee sonnaaɓe 266 doolaaɓe e ndee hitaande 2022. Ko OPROGEM, salndu Gine hiwayndu (reenayndu) hakkeeji rewɓe, sukaaɓe e finaa-tawaaji, yaltini oo ndee limoore. Kono, e bi’ol, Rama Asmaa'u Balde, jeyaaɗo e  teekodal jiwɓe ñemtinteeɓe Gine), fedde sukaaɓe rewɓe Gine, rewɓe doolaaɓe ɗuuɗuɓe tawaaka e nder ndee limoore. Sabu woɓɓe ɓee, hulay walla hersay wollitaade si ɓe doolaama. Ko Rama Asmaa'u Balde woni koɗo men hannde. Himo jaaboo lamnde Ibrahiima Timmbi Bah.

Mali, hooreejo laamu faddewu nguu noddii e kaaldal hakkunde malinaaɓe. Kaaldal waɗayngal e nder leydi. Kono pelle murtuɓe CSP fattiiɓe Aljeriya jaɓaali nduu noddaandu. Hiɗen anndi waɗii jonte jokkondiral hakkunde Mali e Aljeriya hino ŋakki, ko Aljer woowi jaɓɓaade jeewte hakkunde malinaaɓe. Mbele ngal kaaldal ngal Kolonel Assimi Goyta noddii waɗan batte si hawrii murtuɓe CSP tawaaka? Ko Mammadu Omar LI hertorɗo kabaaruuji faatiiɗi e diiwal. Heɗoɗen mo e faandu haala Ibrahiima Timmbi Bah.

Ko Succès Masra woni hooreejo jaagorɓe Caad gila e altine faltiiɗo. Oo lunndiyankeejo ɓurɗo haɓude laamu Mahamaét Idriis Debi jaɓii ardaade jaagorɓe fewnooɓe suɓngooji yaltinayɗi leydi Caad e laamu faddewu. Hanki Succès Masra suɓike jaagorve  28 e koolaave kuuval laamu 12. Kono jaagorɓe heyɓe ɗuuɗaali e oo guwerneman makko. Mbele suɓegol Succès Masra hooreejo jaagorɓe no ŋalɗini walla no juhi ? Ko holɗum ɗum battinta e alhaali dawro makko ? Koɗo men hannde ko Hashim Buubakari, wiɗtotooɗo e baŋŋe dawro. Himo jaaboo lamnde Ibrahiima Timmbi Bah.