ក្រោយពេលវិលត្រឡប់មកពីទីជម្រកសុវត្ថិភាពមួយក្នុងខេត្តបន្ទាយមានជ័យ នៅក្រោយជម្លោះព្រំដែនកម្ពុជា-ថៃ អ្នកស្រី ចាន់ សុភាព កំពុងរស់នៅជាមួយកូនៗ តូចធំចំនួន ៦នាក់ នៅក្នុងផ្ទះខ្ទមតូចមួយ ដំបូលលិចទឹក ស្ថិតនៅឯជាយដែន ក្នុងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ ប៉ុន្តែ ទោះការប្រយុទ្ធគ្នាតាមព្រំដែនរវាងកម្ពុជា-ថៃ ត្រូវបានបិទបញ្ចប់ដោយបទឈប់បាញ់ កាលពីថ្ងៃទី២៨ ខែកក្កដា ឆ្នាំ២០២៥ អ្នកស្រី ចាន់ សុភាព រហូតមកដល់បច្ចុប្បន្ននេះ ហាក់នៅតែពុំទាន់មានដំណឹងណាមួយពីស្វាមី ជាកងទ័ពជួរមុខនៅឯសមរភូមិមុខនៅឡើយ។ និយាយទាំងការសម្រក់ទឹកភ្នែក អ្នកស្រីចាន់ សុភាព នៅតែទន្ទឹងរង់ចាំដំណឹងស្វាមីរបស់ខ្លួន និងសង្ឃឹមផងដែរថាសង្គ្រាមកម្ពុជា-ថៃ នឹងបិទបញ្ចប់ទៅ ទាំងស្រុងនៅក្នុងពេលឆាប់ៗខាងមុខនេះ។