រដ្ឋាភិបាល​បាន​បង្ហាញ​ការ​យក​ចិត្ត​ទុក​ដាក់​ខ្ពស់​សង្គ្រោះ​វិស័យ​កសិកម្ម​ តាម​រយៈ​ការ​ចុះ​ចែក​ពូជ​ស្រូវ​ដល់​ដៃ​កសិករ​ រួម​នឹង​សកម្មភាព​មួយ​ចំនួន​ដែល​គេ​មិន​សូវ​ឃើញ​កើត​មាន​ពី​មុន​មក។ ​ថ្មីៗ​នេះ​ទៀត​រដ្ឋមន្ត្រី​ថ្មី​នៃ​ក្រសួង​កសិកម្ម​បាន​ចេញ​សេចក្ដី​សម្រេច​បង្កើត​ក្រុម​ការងារ​ផលិតកម្ម​គ្រាប់​ពូជ​ស្រូវ​ ហើយ​លោក​រដ្ឋមន្រ្តី​ ឌិត ទីណា ​ចុះ​បាន​ពិនិត្យ​ដេប៉ូ​លក់​ជី​ ថ្នាំ​ កសិកម្ម​  ស្វែង​រក​យន្តការ​ដោះស្រាយ​ឲ្យ​តម្លៃ​ជី​សមរម្យ​ដើម្បី​កសិករ​អាច​ទទួល​យក​បាន។​ រីឯ​មន្ត្រី​ផ្សេង​ទៀត​របស់​ក្រសួង​ចុះ​ទៅ​ខេត្ត​គោល​ដៅ​ស្វែង​យល់​ពី​ថ្លៃ​ដើម​នៃ​ការ​ផលិត​ និង​ផ្ដល់​អនុសាសន៍​ដើម្បី​កាត់​បន្ថយ​ការ​ចំណាយ។​ ទន្ទឹម​នឹង​នេះ ​កសិករ​មួយ​ចំនួន​រស់​នៅ​ភូមិ​ស្វាយអាត់លើ​ ក្នុង​ខេត្ត​កណ្ដាល​ឯណេះ ​ក៏​ប្រាថ្នា​ចង់​ឃើញ​វត្ត​មន្ត្រី​ចុះ​ដល់​ដី​ស្រែ​ពួក​គេ​ដែរ។​ តែ​ទោះ​ជា​មិន​បាន​ចុះ​ក៏​មិន​ថ្វី​គេ​គ្រាន់​សំណូមពរ​ឲ្យ​រដ្ឋ​ជួយ​អន្តរាគមន៍​រក្សា​តម្លៃ​ស្រូវ​កុំ​ឲ្យ​ឈ្មួញ​ចូល​មក​បន្ទាប​តម្លៃ​តាម​តែ​ចិត្ត។​