លោក ជក់ សុភា​ ដែលជាគ្រូ​បង្រៀន​នៃសាលារៀន​ជំនាន់ថ្មី​វិទ្យា​ល័យ​ព្រែកលាប​បាន​រក្សាតំណែង​ជាម្ចាស់ជ័យ​លាភីលេខ១​ បកស្រាយ​អក្សរសិល្បិ៍ ​នៅក្នុង​ទិវាជាតិ​អំណាន​លើកទី៧​ ដែល​ក្រសួងអប់រំ​បានរៀបចំ​កាលពីចុង​សប្ដាហ៍​កន្លងទៅ។​   នៅក្នុង​ទិវាអំណាន​ក្នុងឆ្នាំ​នេះលោក​ ជក់ សុភា ​បាន​បក​ស្រាយលើប្រធាន​បទ​«តួនាទី​អក្សរសិល្បិ៍ពុទ្ធ​និយម​ក្រោយ​សម័យអង្គរ»​។​ ជាសាស្ត្រាចារ្យ​ផ្នែកអក្សរ​សាស្ត្រខ្មែរ​ស្រាប់​លោក​ ជក់ សុភា ​អះអាងថា​ កាល​ដែល​លោកលើក​យក​ប្រធានបទ​តួនាទី​អក្សរសិល្បិ៍​ពុទ្ធនិយម​ក្រោយសម័យ​អង្គរ​មក​បកស្រាយ​ព្រោះឆ្លុះ​បញ្ចាំង​ពីសីលធម៌​ គុណធម៌​ ចរិយាធម៌​ របស់​មនុស្ស​ក្នុង​បច្ចុប្បន្ន​ធៀប​នឹងមនុស្ស​កាលពី​សម័យមុន។​