នៅក្នុងនាទីជីវិត​ជោគជ័យ​របស់វិទ្យុយើងនៅពេលនេះ សួង សុខភារី សូម​ណែនាំលោកអ្នក​នាងឱ្យ​បានស្គាល់​ពីលោក អ៊ឹង ចំរើន នាយកប្រតិបត្តិសារព័ត៌មានថ្មីៗ។ លោក​ អ៊ឹង ចំរើន គឺជាមនុស្សដំបូងម្នាក់​តំណាងអ្នកសារព័ត៌មានកីឡារបស់កម្ពុជា ដែលត្រូវបានទទួលស្គាល់​ដោយសមាគម​បាល់ទាត់បារាំង (France Football) និងសហព័ន្ធបាល់ទាត់ពិភពលោក (FIFA)។ ទាំងនេះ ក៏ដោយ​សារតែលោក​មានក្តីស្រលាញ់​ចំពោះការសរសេរចែករំលែក ហើយ​ក៏​តាំងចិត្ត​តស៊ូដើរតាមអ្វីដែលលោក​ចង់​ធ្វើ ទោះបីជាធ្លាប់រងនូវការ​ចំអកចំអន់ថា ធ្វើជាអ្នក​សារព័ត៌មានកីឡា ជាអ្នក​កាសែតតូចតាច អត្ថបទបានតែនៅទំព័រក្រោយ​ក៏ដោយ។ តែឆ្លងកាត់​បទពិសោធន៍ជាអ្នក​សារព័ត៌មាន​សរសេរលើរឿងជាច្រើន លោកចំរើន ចាត់ទុកថា អ្នក​ចេះសរសេរព័ត៌មានកីឡា ជាអ្នក​មានភាពប៉ិនប្រសប់​ក្នុងការរៀបរាប់៕