ប្រែពីបុគ្គលិកទៅជាថៅកែមិនមែនជារឿងជាចៃដន្យទេ តែជាការត្រាយឧបសគ្គទើបលោក សុន ភ័ក្ត្រា បើកបានហាងម៉ាស្សាមួយកន្លែងនៅភ្នំពេញ និងផ្ដល់ការងារដល់ជនមានពិការភាពផ្សេងទៀតជិត១០នាក់​។ បកក្រោយបន្តិចលោក សុន ភ័ក្ត្រា ប្រាប់ថា មុនក្លាយជាម្ចាស់ហាងម៉ាស្សា លោកធ្លាប់ត្រូវបានគេប្រើបាលូ កាយសំរាម បោកខោអាវ ទោះភ្នែកមើលមិនឃើញក៏ដោយ។ លោកប្រាប់ថា មិនតូចចិត្តឡើយ ស៊ូលំបាកគ្រានោះតែមានជំនាញនិងចំណេះពេលនេះ។ ដើម្បីឲ្យសង្គមផ្ដល់តម្លៃដល់ជនមានពិការភាព លោកបានចុះផ្លូវជួបជនមានពិការភាពច្រៀងតាមផ្លូវ និងដើរសុំគេ ឲ្យមករៀនជំនាញមួយច្បាស់លាស់ដែរតែគេប្រកែក។​