ទោះ​បី​ជា​ធ្លាប់​រង​ការ​ប្រើ​ហិង្សា​ស្ទើរ​តែ​បាត់​បង់​ជីវិត​កាល​ពី​ដើម​ឆ្នាំ​២០១៤ ​ធ្លាប់​រង​ការ​គំរាម​កំហែង ​និង​ជួបភាព​អយុត្តិ​ធម៌​ជា​ច្រើន​លើក​ច្រើន​សារ​ តែ ​លោក​ វន់ ពៅ ​ប្រធាន​សមាគម​ប្រជា​ធិប​តេយ្យ​ឯក​រាជ្យ​នៃ​សេដ្ឋកិច្ច​ក្រៅ​ប្រព័ន្ធ​ នៅ​តែ​ប្តេជ្ញា​ចិត្ត​ក្រាញ​ននៀល​ជា​មួយ​ការ​ងារ​សង្គម​ដោយ​ឥត​ងាក​រេ​។​ នោះ​ក៏ព្រោះ​តែ​លោក​ធ្លាប់​បាន​ហែល​ឆ្លង​កាត់​ខ្សែ​ជីវិត​ជា​ក្មេង​កំព្រា​ឳពុក​តាំង​ពីអាយុ​១​ខួប​ និង​កំព្រា​ម្តាយ​តាំង​ពី​អាយុ​៨​ឆ្នាំ ​ដោយ​សារ​របប​ខ្មែរ​ក្រហម​។ ​មក​ដល់​ពេល​នេះ​ លោក​ វន់​ ពៅ អះ​អាង​ថា ​លោក​នៅ​បន្ត​ការ​ងារ​សង្គម​បន្ត​ទៀត​ ទោះ​ជា​ប្រាក់​ឧបត្ថម្ភ​បាន​ត្រឹម​តែ​បង់​ថ្លៃ​ផ្ទះ​ជួល​ និង​អាហារ​៣​ពេល ក្នុង​មួយ​ថ្ងៃ​។