Kvikmyndahátíðin Stockfish Film Festival & Industry Days verður haldin í fjórða sinn dagana 1. til 11. mars 2018 í Bíó Paradís. Þarna er um að ræða kvikmynda- og ráðstefnuhátíð fagfólks í kvikmyndabransanum og er haldin í samvinnu við Bíó Paradís og öll fagfélög í kvikmyndagreinum á Íslandi. Við rýndum aðeins í dagskrá hátíðarinnar og heyrðum einnig af mömmu - og pabbabíói með þeim Ásu Baldursdóttur dagskrár - og kynningarstjóra, og Hrönn Sveinsdóttur framkvæmdastjóra Bíó Paradís.

Ekki er komið nægilega á móts við foreldra ungra barna hér á landi, segir Valtýr Stefánsson, barnalæknir á Barnaspítala Hringsins. Foreldrar séu oft mjög þreyttir á álaginu sem fylgir veikindum barnanna fyrstu árin. Bergljót Baldursdóttir ræddi við Valtý um álag á foreldra á Heilsuvaktinni í dag.

Á dögunum var stofnaður hópur á facebook sem ber heitið Stelpó í Grundó. Þar er vettvangur fyrir kvenkyns Grundfirðinga til að hópa sig saman til hvers kyns dægrastyttingar og leik í skammdeginu. Markmiðið er að auðvelda konum að sameinast í skemmtilegum athöfnum „Nú þegar er búið að stofna prjónahóp og brennóhóp“ segir Elsa Fanney Grétarsdóttir sem stofnaði hópinn. Við hringdum vestur og heyrðum meira um þetta skemmtilega framtak í þættinum.

Umsjón í dag Hrafnhildur Halldórsdóttir og Gunnar Hansson

Tveir nemar í matvælafræði í Háskóla íslands hafa síðustu ár unnið að þróun vörulínu úr loftpoppuðu byggi og hefja sölu á því í Hámu á Háskólatorgi á næstunni. Þetta flokkast undir nýsköpun í vistvænni matvælaframleiðslu. Við ræddum við þær Brögu Stefaný Mileris og Hildi Guðrúnu Baldursdóttur í þættinum í dag.

Við héldum áfram umfjöllun okkar um réttindi Intersex fólks á Íslandi. En orðið intersex nær yfir þá einstaklinga sem fæðast með ódæmigerð líffræðileg kyneinkenni. Í síðustu viku fjölluðum við um ráðstefnu sem haldin var um mannréttindi intersex fólks, þar sem komu fram þrír erlendir sérfræðingar í þessu málum. Í dag komu til okkar þær Svandís Svavarsdóttir, heilbrigðisráðherra og Hanna Katrín Friðriksson, sem situr á þingi fyrir Viðreisn, og við spurðum þær út í stöðu löggjafans í málefnum intersex fólks.

Lengi þótti nauðsynlegt að senda borgarbörn í sveit. Þau áttu að kynnast sveitastörfunum, læra að vinna og losna úr borginni með tilheyrandi sjoppumenningu. Rannsókn hefur staðið yfir í nokkur ár á sveitardvöl íslenskra barna og Kristín Einarsdóttir, okkar kona á Ströndum, hitti einn rannsakandann Esther Ösp Valdimarsdóttur. Félagar úr leikfélagi Hólmavíkur lásu hluta úr viðtölum sem tekin voru í tengslum við rannsóknina.

Umsjón í dag Hrafnhildur Halldórsdóttir og Gunnar Hansson

Tilvera, samtök um ófrjósemi, stendur fyrir vitundarvakningu um ófrjósemi dagana 26. febrúar - 3. mars sem nefnist 1 af 6 en áætlað er að einn af hverjum sex glími við ófrjósemi. Markmið vitundarvakningarinnar er að vekja athygli á ófrjósemi og þeim sorgum og sigrum sem fólk gengur í gegnum þegar það þarf að nýta sér aðstoð tækninnar til að eignast barn og nauðsyn þess að allir hafi jafnan aðgang að meðferðum og þurfi ekki frá að hverfa vegna kostnaðar. Þau Ásta Sól Kristjánsdóttir, varaformaður Tilveru og Björn Gunnar Rafnsson, meðstjórnandi í samtökunum komu í þáttinn.

Fyrirtækið Skógarafurðir í Fljótsdal fjárfesti fyrir skemmstu í fyrsta sérsmíðaða timburflutningabíl landsins, ásamt vínekrudráttarvél. Timburframleiðsla hefur ekki verið ein af þeim atvinnugreinum sem Ísland hefur verið þekktast fyrir. Við hringdum austur í Bjarka Jónsson, framkvæmdastjória Skógarafurða og forvitnuðumst um timburframleiðsluna.

Svo var það lesandi vikunnar, í þetta sinn var það Björn Brynjólfur Björnsson kvikmyndagerðamaður. Við heyrðum hvaða bækur eru á náttborðinu hans, hvað hann hefur verið að lesa og hvaða bækur og höfundar hafi haft áhrif á hann í gegnum tíðina.

Umsjón í dag Lísa Pálsdóttir og Gunnar Hansson

Föstudagsgestur Mannlega þáttarins í þetta sinn var svokallaður þúsundþjalasmiður. Hún er danshöfundur, dansari, söngvari, einkaþjálfari, hefur skrifað matreiðslubækur, haldið matreiðslunámskeið og verið viðburðarstjóri. En einmitt sem slíkur, sem sagt viðburðarstjóri, er hún að flytja inn stórsýningu frá Bandaríkjunum þar sem Michael Jackson verður heiðraður og sýnd verður í Hörpu í haust. Það var um nóg að tala við Yesmine Olsson, föstudagsgest Mannlega þáttarins í dag.

Og eins og aðra föstudaga var Sigurlaug Margrét Jónasdóttir, besti vinur bragðlaukanna, með sitt vikulega matarspjall í þættinum, nema hvað að í þetta sinn var hún í stað Guðrúnar Gunnars allan þáttinn. Í dag talaði hún um mat í málverkinu Kvöldmáltíð í Emmaus eftir endurreisnarmálarann Caravaggio og svo sagði hún líka frá kokkinum Bartolomeo Scappi, sem eldaði ofan í sex páfa og líklegast Michelangelo á meðan hann málaði sistínsku kapelluna í Róm.

Umsjón í dag Sigurlaug Margrét Jónasdóttir og Gunnar Hansson

Suður kóreska tæknirisann Samsung þarf líklegast ekki að kynna fyrir hlustendum. Undir því merki er framleiddur slíkur fjöldi af tæknivörum að það myndi líklegast taka nokkra daga að telja upp. Á hverju ári gefur Samsung út ný snjalltæki undir heitinu Galaxy og á hverju ári er gerð ný útgáfa af sama hringitóninum sem hefur fylgt slíkum tækjum sem flestir ættu að þekkja í einhverri mynd því milljónir nota þessi tæki um heim allan. Í ár fékk Samsung til liðs við sig íslenska tónlistarmanninn Pétur Jónsson til þess að gera nýjustu útgáfuna af hringitóninum. Pétur var gestur Mannlega þáttarins í dag.

Markmið þeirra Hraundísar Guðmundsdóttur og Ragnars Sverrissonar með að sækja um fjármagn til einstaklinga í gegnum Karolina fund er að kynna og kenna fólki í Kenya að búa til ilmkjarnaolíur sem þau geta síðan notað sér til lækninga og einnig til sölu. Stuðla að sjálfbærni og nýtingu auðlinda til atvinnusköpunar í Kenýa. Ragnar sagði Lísu Páls nánar frá þessu í þættinum í dag.

Í tilefni afmælis söngvaskáldsins Svavars Knúts Kristinssonar, verður blásið til tónleika honum til heiðurs í Tjarnarbíó á laugardagskvöldið, þar sem einvala lið íslenskra söngvara mun syngja lög söngvaskáldsins með sínu nefi. Svavar Knútur kom í hljóðverið með ukulele og við spjölluðum við hann um lífið og listina og hann söng lagið sitt Ölduslóð í beinni útsendingu.

Umsjón í dag Hrafnhildur Halldórsdóttir, Gunnar Hansson og Lísa Pálsdóttir

Íbúar Hafnarfjarðar geta frá og með 1. mars nk. sett allt plast saman í lokuðum plastpoka beint í gráu sorptunnuna.  Plastpokarnir verða flokkaðir sérstaklega frá öðru rusli og þeim komið til endurvinnslu. Markmiðið er að draga úr urðun plasts og nýta betur hráefni í plastinu.  Rósa Guðbjartsdóttir formaður bæjarráðs og fulltrúi Hafnarfjarðar í stjórn Sorpu kom í þáttinn og sagði frá þessu verkefni. 

 

Við fengum póstkort frá París í dag frá Magnúsi R. Einarssyni. Í þessu póstkorti sagði hann okkur frá Nutella uppþotunum svokölluðu sem urðu fyrir tæpum mánuði og hinni miklu umræðu sem spannst í frönskum fjölmiðlum í kjölfarið. 

 

Stundum er talað um að tónlist og söngur sé gott skemmtiefni sem hefur ofan af fyrir börnum. En að hvaða leyti getur söngur stutt við uppeldi og þroska barna?  Helga Rut Guðmundsdóttir hefur rannsakað tónlistarnám, tónlistarskynjun og tónlistarþroska barna.  Í þessum rannsóknum hefur verið sýnt fram á mun meiri færni barna í söng á unga aldrei en áður var talið mögulegt og þá skiptir miklu máli hvaða mæliaðferðir eru notaðar.  Helga kom í þáttinn í dag.

Umsjón í dag Hrafnhildur Halldórsdóttir og Gunnar Hansson

Norðlingaskóli fékk Minningarverðlaun Arthurs Morthens á öskudaginn í síðustu viku og í rökstuðningi dómnefndar segir m.a.  Norðlingaskóli býður alla nemendur velkomna og fagnar fjölbreytileikanum.  Starfið einkennist af samvinnu, vellíðan, gleði, öguðu frjálsræði, lýðræði o.s.frv.  Sif Vígþórsdóttir skólastjóri Norðlingaskóla var gestur Mannlega þáttarins í dag. 

 

Kristín Einarsdóttir, okkar kona á Ströndum, hitti Jón Jónsson þjóðfræðing og heyrði af rannsóknum hans á sögum af förumönnum - hér og þar á landinu á fyrri öldum.  

 

Út að borða fyrir börnin, fjáröflunarátak Barnaheilla og veitingastaða hófst í síðustu viku. Alls styðja 35 veitingastaðir átakið á 100 stöðum víða um land með því að láta hluta af verði valinna rétta renna til verkefna sem snúa að vernd barna gegn ofbeldi. Átakið fer nú fram í áttunda sinn og stendur yfir í einn mánuð, eða frá 15. febrúar til 15. mars. Við fengum þau Ernu Reynisdóttur, framkvæmdastjóra Barnaheilla - Save the Children og Jóhannes Ásbjörnsson veitingamann til okkar í þáttinn. 

Umsjón í dag Hrafnhildur Halldórsdóttir og Gunnar Hanss

Málþing á vegum Intersex Íslands, Samtakanna '78, Íslandsdeildar Amnesty International og Mannréttindaskrifstofu Íslands var haldið í háskólabyggingunni Öskju á laugardaginn undir yfirskriftinni Mannréttindi intersex fólks: Ný nálgun til framtíðar. Þar töluðu þrír erlendir sérfræðingar í málefnum intersex fólks, sem hafa reynslu af þessum málefnum víða í Evrópu. Til að koma í veg fyrir misskilning þá er ekki verið að tala um kynvitund þegar rætt er um intersex fólk, hér er um að ræða börn sem fæðast með ódæmigerð kyneinkeinni og gangast mörg hver undir stórar skurðaðgerðir fljótlega eftir fæðingu, sem geta oft haft miklar afleiðingar i för með sér. Erfitt er að fá upplýsingar um fjölda aðgerða, ástæður þeirra o.s.frv. Þær Kitty Anderson, formaður Intersex Íslands og María Helga Guðmundsdóttir, formaður Samtakanna '78 sögðu okkur frá því sem þar kom fram, m.a. hvað erlendu fyrirlesararnir höfðu fram að færa.

Í nýlegri könnun Umhverfisstofnunar kom í ljós að 32% aðspurðra þekktu hættumerki á neytendavörum en um 45% töldu að úreldar, eldri merkingar væru þær réttu. Þá kom í ljós að konur fara frekar en karlar eftir leiðbeiningum um notkun á vörum sem bera hættumerkingar og eru ólíklegri til að kaupa slíkar vörur. Björn Gunnlaugsson teymisstjóri hjá Umhverfirsstofnun kom í þáttinn og fræddi hlustendur hættumerkin.

Lesandi vikunnar var í þetta sinn Ragna Sigurðardóttir fráfarandi formaður stúdentaráðs. Hún sagði okkur frá stúdentapólítíkinni og baráttumálum stúdentaráðs og svo sagði hún frá því hvaða bækur er á náttborðinu hjá henni, sem voru mest megnis ljóðabækur og svo sagði hún frá því hvað hún hefur lesið í gegnum tíðina sem hefur haft áhrif á hana, m.a. Halldór Laxness og Simone de Beauvoir.

Umsjón í dag Lísa Pálsdóttir og Gunnar Hansson

Föstudagsgestur Mannlega þáttarins í þetta sinn var Sigrún Valbergsdóttir leikstjóri, höfundur og varaforseti Ferðafélags Íslands. Hún frumsýnir fjölskyldugamanleikritið Glæpir og góðverk hjá Leikfélagi Selfoss í kvöld, en leikfélagið heldur einmitt upp á sextugsafmæli sitt um þessar mundir. Við ræddum við hana um lífið, listina og fjallaferðir í þættinum í dag.

Sigurlaug Margrét Jónasdóttir, besti vinur bragðlaukanna kom til okkar í dag eins og flesta föstudaga. Í dag fræddi hún okkur um gómsætan mat í Flórens og komu við sögu skáldið Dante og Lórenz mikli og uppáhalds réttir þeirra.

Umsjón í dag Guðrún Gunnarsdóttir og Gunnar Hansson

Íslendingasögur eru kunnar fyrir hlutlægan frásagnarhátt þar sem tilfinningum söguhetjanna virðist lítill gaumur gefinn. Undir niðri eru þó tilfinningar og þegar betur er að gáð eru sumar Íslendingasagnanna síst minna þrungnar tilfinningum en riddarasögur frá meginlandinu. Í dag kl. 16.30 heldur Sif Ríkharðsdóttir, prófessor í almennri bókmenntafræði við Háskóla Íslands, fyrirlestur hjá Miðaldastofu Háskóla Íslands um tilfinningar í íslenskum miðaldabókmenntum. Lísa Pálsdóttir ræddi við hana í þættinum í dag.

Við höldum áfram að leita að áhugaverðu efni úr safni Útvarpsins í góðu samstarfi við Safnadeildina okkar og í dag heyrðum við brot úr þættinum "Mikil kostakýr-Huppa frá Kluftum " sem var á dagskrá 3. nóvember 1976. Í þættinum ræddi Agnar Guðnason við Sigríði Árnadóttur frá Kluftum og Helga Haraldsson, Hrafnkelsstöðum, um kýrina Huppu sem átti sér merka sögu og merka afkomendur.

Tugir erlendra og innlendra dansara eru væntanlegir til Flúða á fyrstu íslensku Lindy hop vetrardanshátíðina. Á hátíðinni, verður meðal annars boðið upp á sóló-jazz og Lindy hop kennslu fyrir byrjendur og lengra komna undir leiðsögn þriggja af fremstu sveifludönsurum heims. Þá munu tvær af frambærilegustu sveifluhljómsveitum landsinsleika fyrir dansi öll kvöld hátíðarinnar. Sigurður Helgi Oddsson kom í þáttinn og sagði okkur frá hátíðinni og Lindy hop.

Umsjón í dag Guðrún Gunnarsdóttir, Lísa Pálsdóttir og Gunnar Hansson