Við fengum góðvini Mannlega þáttarins í páskaspjall í dag, þá Albert Eiríksson og Bergþór Pálsson. Við ræddum við þá um páskavenjur, páskamatinn og forvitnuðumst um danshæfileika Bergþórs.

Söngleikurinn Jesus Christ Superstar eftir Andrew Lloyd Webber og Tim Rice verður sett á svið í sjöunda sinn í Eldborgarsal Hörpu á Skírdag. Einvalalið söngvara og tónlistarfólks taka þátt í sýningunni. Þau Ólafur Egilsson og Ragnheiður Gröndal komu í spjall í dag.

Mikið er um rangar upplýsingar um heilbrigðismál og heilsutengda starfsemi hér á landi. Hópur sérfræðinga reynir að sporna við þessu og hefur stofnað sérstaka vefsíðu upplýst.org þar sem fólk getur leitað upplýsinga um órökstuddar fullyrðingar og ósannreynda heilsustarfsemi. Einn af þeim sem leggur síðunni lið er Björn Geir Leifsson læknir sem hefur látið sig gervifræði, gervilækningar varða. Hann var á heilsuvaktinni hjá Bergljótu Baldursdóttur í dag.

Umsjón í dag, Sigurlaug Margrét Jónasdóttir og Gunnar Hansson

MANNLEGI ÞÁTTURINN ÞRIÐJUDAGINN 27.MARS. - KYNNING Á EFNI

Umsjón í dag, Guðrún Gunnarsdóttir og Gunnar Hansson

Brauðtertur hafa svo sannarlega komist aftur í tísku, þ.e.a.s. ef þær duttu nokkurn tíma úr tísku en sennilega hafa þær gengið í gegnum hæðir og lægðir eins og svo margt matarkyns. Er hægt að gera góðar vegan brauðtertur og hvað er notað í þær? Júlía Sif Liljudóttir frá Veganistum leiðir okkur í allan sannleik um það hér á eftir.

Á dögunum var danssýning í grunnskólanum á Hólmavik, Kristín okkar Einarsdóttir hitti danskennarann Jón Pétur sem farið hefur um landið og kennt grunnskólabörnum dans í áratugi.

Þær Ingibjörg Þórðardóttir og Lilja Guðný Jóhannesdóttir, íslenskukennarar í Fjarðarbyggð, skrifuðu grein í Austurfrétt þar sem þær benda á að grundvallarforsenda fyrir nemendur af erlendum uppruna til að læra íslensku sé sterkur grunnur í eigin móðurmáli. Þrátt fyrir það fá nemendur með annað móðurmál en íslensku almennt ekki kennslu í sínu móðurmáli. Við hringjum austur og forvitnumst um þetta í þættinum í dag.

Léttum á umferðinni var heitið á málþingi um samgöngur í Reykjavík sem haldið var fyrir helgi, þar var fyrirbærið Zipcar kynnt sem vakti áhuga okkar. Hvað er Zipcar og hvernig virkar það? Árni Sigurjónsson kom í þáttinn og sagði frá.

Við höfum verið að rifja upp áhugavert efni úr safni útvarpsins í þættinum undanfarið, sem hefur vakið talsverða athygli. Við héldum því áfram í dag og heyrum brot úr þættinum Staldrað við á Eyrarbakka, þætti tvö af þremur, sem Jónas Jónasson hafði umsjón með árið 1975. Í þættinum ræddi Jónas við ýmsa íbúa staðarins, embættismenn sem og venjulega íbúa, og hér heyrum við spjall hans við Þuríði Þórmundardóttur húsfrú, um líf ungrar konu, tómstundir, efnahag, uppeldi, barnaheimili o.fl.

Lesandi vikunnar í þetta sinn var Halldór Bragason, blúsgítarleikari. Blúshátíð í Reykjavík var sett á laugardaginn með blússkrúðgöngu niður Skólavörðustíginn og þrennir stórtónleikar verða á Hilton Nordica þessa vikuna. Halldór sagði frá hvaða bækur eru á náttborðinu hjá honum, hvað hann hefur verið að lesa og hvaða bækur eða höfundar hafa haft áhrif á hann í gegnum tíðina.

Umsjón í dag, Lísa Pálsdóttir og Gunnar Hansson

Föstudagsgestur Mannlega þáttarins í þetta sinn er garpur svo ekki sé meira sagt, Vilborg Arna Gissurardóttir. Hún hefur klifið tindana sjö, hæstu tinda hverrar heimsálfu, hún hefur gengið á Suðurpólinn, haldið fyrirlestra og námskeið og nú síðast stofnaði hún ferðaskrifstofuna Tindar, þar sem hún skipuleggur fjallaferðir fyrir fólk innanlands og utan.

Sigurlaug Margrét Jónasdóttir, eða besti vinur bragðlaukanna, var með sitt vikulega matarspjall í þættinum í dag. Í þetta sinn fjallaði hún um nokkrar uppskriftir úr eldhúsi Heilags Frans frá Assisi.

Umsjón í dag, Guðrún Gunnarsdóttir og Gunnar Hansson

Eitt af því sem fram hefur komið í Mottumars er rannsókn sem sýnir tilfinningalega einangrun karlmanna. Þannig er einn af hverjum 5 karlmönnum yfir 50 ára aldri tilfinningalega einangraður og yfirgnæfandi meirihluti hinna sem hafa einhvern að deila með erfiðum tilfinningum, gera það aðeins með maka sínum. Þau Halla Þorvaldsdóttir, framkvæmdastjóri Krabbameinsfélagsins, og Guðmundur Pálsson, hönnuður svokallaðs Karlaklefa komu í þáttinn og sögðu frekar frá þessu.

Alþjóðlegi hamingjudagurinn var í fyrradag. Dagurinn var fyrst haldinn að frumkvæði Sameinuðu þjóðanna árið 2013 með það að markmiði að vekja athygli á hamingju og vellíðan sem mikilvægu markmiði fyrir einstaklinga og stjórnvöld um heim allan. Lísa Páls brá sér á Háskólatorgið í gær og spurði hvort fólk væri hamingjusamt, þeir fyrstu voru enskumælandi námsmenn.

Það er ekki víst að margir þekki nafn Elfars Smára Sverrissonar, en hann var engu að síður í teymi sem fékk óskarsverðlaun fyrir tölvubrellur í kvikmyndinni Blade Runner 2049. Hann er ekki enn orðinn þrítugur en hefur unnið við fjölda stórmynda eftir að hann lauk námi í Svíþjóð. Hann býr í Montreal í dag þar sem hann stundar vinnu sína, við slógum á þráðinn til Elfars Smára í þættinum.

Umsjón í dag, Guðrún Gunnarsdóttir og Gunnar Hansson

Hvernig verða ríki til? Það er spurning sem Orri Vésteinsson, prófessor í fornleifafræði við Háskóla Íslands, leitast við að svara á morgun í fyrirlestri hjá Miðaldastofu Háskóla Íslands. Hvenær verður ríki ríki? Og af hverju varð Ísland ekki formlegur hluti af Noregsríki fyrr en um 1260? Orri var gestur Mannlega þáttarins í dag.

Alþjóðleg Barnakvikmyndahátíð í Reykjavík verður haldin í Bíó Paradís í fimmta sinn 5. apríl - 15. apríl 2018. Hátíðin hefur fest sig í sessi sem árlegur menningarviðburður barna og unglinga og hefur brotið blað í kvikmyndamenningu fyrir þennan aldurshóp. Verndari hátíðarinnar er Vigdís Finnbogadóttir. Ása Baldursdóttir kynningarstjóri Bíó Paradís kom í þáttinn.

Við fengum póstkort frá París í dag frá Magnúsi R. Einarssyni. Í þetta sinn sagði hann okkur frá nokkrum áföllum sem stolt frakka vegna matarmenningar þeirra hefur beðið að undanförnu. Það hefur verið upplýst að Frakkar borða æ meira af skyndibita eins og hamborgurum og pizzum. Frönsk vín hafa verið fölsuð og besti Camembert osturinn er framleiddur í Kanada. Einnig sagði Magnús frá betlinu sem fer vaxandi á götum Parísarborgar.

Umsjón í dag, Guðrún Gunnarsdóttir og Gunnar Hansson

Þetta gerðist 20.mars 1982 og við vitnum í forsíðufrétt Dagblaðsins og Vísis 22.mars: 25 íslendingar, 22 farþegar og þriggja manna áhöfn Fokker-vélar Flugleiða, TF-FLM, mega telja sig heppna með að vera enn í tölu lifenda eftir miklar raunir á laugardag. Vinstri hreyfill flugvélarinnar splundraðist skömmu eftir flugtak frá ísafjarðarflugvelli er vélin var aðeins í um 150 metra hæð. Eldtungur stóðu aftan úr hreyflinum en flugstjóranum, Gunnari Arthurssyni, tókst að slökkva bálið með því að opna fyrir innbyggðar sprautuflöskur sem úðuðu inn í hreyfilinn. Flugstjórinn hugðist lenda aftur á ísafjarðarflugvelli en hjólin vinstra megin komu ekki niður. Þá voru tveir kostir: Að nauðlenda á ísafirði strax eða freista þess að fljúga alla leið til Keflavíkur. Þau Gunnar og Guðrún Gunnarsdóttir, flugfreyja, komu í Mannlega þáttinn og rifjuðu upp þessa miklu lífsreynslu.

Ásbjörn Magnússon byggði og rekur gistiheimilið Malarhorn á Drangsnesi, það væri kannski ekki í frásögur færandi nema fyrir það að hann og konan hans Valgerður Magnúsdóttir hófust handa við þetta verkefni á þeim aldri þegar margir eru farnir að hafa hægar um sig. Kristín Einarsdóttir, okkar kona á Ströndum hitti Ásbjörn og ræddi við hann.

Umsjón í dag, Guðrún Gunnarsdóttir og Gunnar Hansson

MANNLEGI ÞÁTTURINN -MÁNUDAGINN 19.MARS. - KYNNING Á EFNI

Umsjón í dag, Guðrún Gunnarsdóttir og Lísa Pálsdóttir

Á morgun verður efnt til Bjarnarmessu í Veröld, húsi Vigdísar Finnbogadóttur . Bjarnarmessa er minningarþing Sagnfræðistofnunar Háskóla Íslands, Sagnfræðingafélags Íslands og Sögufélags sem haldið er í tilefni þess að 100 ár eru liðin frá fæðingu Björns Þorsteinssonar sagnfræðings. Björn var brautryðjandi í nútímasagnfræði á Íslandi og um langt skeið einn fremsti fræðimaður á sínu sviði. Hann setti Íslandssöguna í alþjóðlegt samhengi og opnaði henni nýjar víddir. Björn var alla ævi kennari og óþreytandi að miðla þekkingu sinni til nemenda og almennings . Heyrum meira af Bjarna hér á eftir. Anna (Anna Agnarsdóttir kemur frá Sagnfræðistofnun Háskóla Íslands)

Við lítum við hjá Blindrafélaginu I Hamrahlíð og forvitnumst um hvað er í boði fyrir sjóndapra og blinda í Hjálpartækjabúðinni þar . Við ræðum við þau Láru Kristínu Lárusdóttur og Baldur Snæ Sigurðsson

Og lesandi vikunnar er Sigurborg Daðadóttir yfirdýralæknir

Föstudagsgesturinn í þetta sinn var Kolbrún Halldórsdóttir. Hún hefur setið á Alþingi, verið ráðherra, leikið og leikstýrt í leikhúsum, verið dagskrárgerðarmaður í sjónvarpi og útvarpi, hún var forseti Bandalags íslenskra listamanna og margt fleira. Nýlega var hún ráðin verkefnisstjóri fyrir forsætisráðuneytið í tengslum við hátíðahöld 1. desember 2018 vegna 100 ára fullveldis Íslands.

Sigurlaug Margrét Jónasdóttir, besti vinur bragðlaukanna, var í þættinum með sitt vikulega matarspjall. Í dag talaði hún um bollur úr fiskinum frá því í gær, ómótstæðilega uppskrift úr afgöngum frá Ítalíu og magahreinsun að rómverskum sið.

Lögfræðingurinn Þóra Jónsdóttir lét gamlan draum rætast fyrir síðustu jól þegar hún gaf út sitt fyrsta lag. Þóra, sem er 43 ára gömul, hefur frá barnsaldri tengst tónlist með ýmsum hætti. Hún lærði á píanó sem unglingur, söng í hljómsveitum og sótti söngnám í tónlistarskóla FÍH. Þegar hún stofnaði fjölskyldu milli tvítugs og þrítugs vék tónlistin til hliðar. Hún sagði frá í þættinum í dag hvernig hún „kom útúr skápnum" og lét tónlistardrauminn rætast.

Umsjón í dag, Guðrún Gunnarsdóttir og Gunnar Hansson

„Heilahreysti á efri árum: Að taka því sem að höndum ber eða spyrna við fótum?“ er nafnið á fyrirlestri sem María K. Jónsdóttir, dósent við sálfræðisvið HR heldur í dag í tilefni Heilaviku HR. Í þessum fyrirlestri fjallar María um hvernig við getum best stuðlað að eigin heilahreysti ævina á enda, dregið úr líkum á því að fá heilabilun og þar með aukið lífsgæði okkar á efri árum. María kom í þáttinn í dag.

Við fengum í heimsókn þau Valgeir Þór Jakobsson og Aldísi Rós Hrólfsdóttur nemendur á tómstunda- og félagsmálafræðibraut í HÍ en þau ákváðu að halda að halda Húllumhæ fyrir eldri borgara kl.16 í dag í Stangarhyl. Þau eru hluti af hópi sem er í áfanga sem kallast viðburðar- og verkefnastjórnun. Hópurinn ákvað að standa fyrir þessum viðburði með það að markmiði að draga úr félgaslegri einangrun eldri borgara.

Allt frá vöggu til dauða auglýsir Góði hirðirinn gjarnan. Líkkista kom í einum gámnum í vikunni, hún seldist fljótt, og okkur þótti þetta forvitnilegt, Lísa Páls brá sér í heimsókn og spurðist fyrir um undarlega hluti sem koma í verslunina.

Umsjón í dag, Guðrún Gunnarsdóttir og Gunnar Hansson