Við skoðuðum ráðgjöf sem byggir á meðvirknimódeli Piu Mellody í þættinum í dag. Pia skoðaði hárfi fjölskyldunnar á uppvöxt okkar og þroskaferli. Í hennar aðferð er unnið út frá því að meðvirkni verði til í æsku og þróist í uppvextinum vegna óheilbrigðra fjölskyldumynstra. Gyða Dröfn Tryggvadóttir er félagsfræðingur með meistaragráðu í stjórnun heilbrigðisþjónustu og lýðheilsu (EMPH) frá Háskólanum í Reykjavík. Hún vinnur með meðvirkni, orsakir og afleiðingar, birtingarmynd í daglegu lífi, s.s. litla sjálfsmynd, erfiðleika með að setja sjálfum sér og öðrum heilbrigð mörk, erfiðleika í samböndum og samskiptum o.fl. Gyða kom í þáttinn í dag.

Það er liðin hálf öld frá studentauppreisninni í París og nú er aftur byrjað að slást á götum borgarinnar eins og sagt var frá í póstkorti frá París í dag. Magnús R. Einarsson, sagði okkur frá rysjóttu vori og köldum vistarverum, hundahaldi og hjátrú Parísarbúa, litríku mannlífi í Montparnasse hverfinu og svo frá óeriðunum sem urðu við fyrsta maí hátíðarhöldin í gær.

Mikil hugarfarsbreyting á hefur orðið hvað varðar meðferð sorps, enda eigum við bara eina jörð og þurfum auðvitað að gæta hennar og vernda. Kristín Einarsdóttir hitti Einar Indriðason framkvæmdastjóra Sorpsamlags Strandasýslu og

þau ræddu sorphirðu og flokkun á Ströndum.

Umsjónsarmenn í dag: Guðrún Gunnarsdóttir og Gunnar Hansson

Lára Jónasdóttir býr og starfar á vegum Sameinuðu þjóðanna í Jerúsalem. Björg Magnúsdóttir dagskrárgerðarkona hér á RUV hitti Láru og spjallaði við hana um daglegt líf í borginni. Þar er flækjustigið töluvert eins og við heyrum meira af hér rétt á eftir, þó allir geti sameinast um góðan hummus, sem er víst nóg af.

Á morgun verður opnuð í Safnahúsinu á Húsavík ljósmyndasýningin "Að fanga þig og tímann". Þetta er sýning á ljósmyndum tveggja kvenna, Sigríðar Ingvarsdóttur og Ragnheiðar Bjarnadóttur.Safn Sigríðar, sem var atvinnuljósmyndari og rak ljósmyndastofu á Húsavík frá 1915 til 1942, er nánast eingöngu mannamyndasafn. Það er því ólíkt myndasafni Ragnheiðar sem samanstendur af myndum úr daglegu lífi og þorri myndanna tekin á fyrr hluta 20 aldar. Þessar ljósmyndir eru merkar heimildir um fyrri tíma og mannlíf í Þingeyjarsýslum. Sigurlaug Dagsdóttir sýningarstjóri kom í þáttinn í dag.

Lesandi vikunnar var í þetta sinn Karl Ágúst Úlfsson leikari, höfundur og leikstjóri og nýkjörinn formðaður Rithöfundasambandsins.

Umsjón í dag, Guðrún Gunnarsdóttir og Lísa Pálsdóttir

Föstudagsgesturinn í þetta sinn var Þorgrímur Þráinsson rithöfundur. Hann á langan knattspyrnuferil að baki aðallega með Val og lék með íslenska landsliðinu og er reyndar tengdur því enn. Þorgrímur var kosin formaður Vals árið 2016. Þorgrímur er metsölurithöfundur og samkvæmt okkar upplýsingum lána íslensk bókasöfn bók eftir hann á 5 mín fresti. Hann hefur haldið fyrirlestra í skólum og hjá félagasamtökum um land alltog fleira og fleira..og við þurfum varla að nefna hans gamla starf sem tóbaksvarnarfullrúi. Að lokum sagði hann okkur frá bók sem hann hefur skrifað um leyndarmál velgengni íslenska landsliðsins sem kemur út eftir tvær vikur.

Sigurlaug Margrét Jónasdóttir, besti vinur bragðlaukanna var hjá okkur með sitt vikulega matarspjall í þættinum. Í dag sagði hún frá misgóðum pastasósum og versta pastarétti í heiminum.

Umsjón í dag, Guðrún Gunnarsdóttir og Gunnar Hansson

Hvernig metum við hið ómetanlega? Hið góða í lífinu. Guðbrandsstofnun í samstarfi við guðfræði- og trúarbragðafræðideild Háskóla Íslands, heilbrigðis- og hug- og félagsvísindasvið Háskólans á Akureyri, Félagsráðgjafafélag Íslands og Félag íslenskra leikara standa saman að sérstakri ráðstefnu á Hólum í lok mánaðarins. Við ræðum við séra Sólveigu Láru Guðmundsdóttur hér á eftir.

Það er hefð fyrir því að Leikfélag Sólheima frumsýni leikverk á sumardaginn fyrsta. Í ár var frumsýnt nýtt íslenskt barnaleikrit, Úlfar ævintýranna. Í því eru sett saman fjögur þekkt ævintýri, Rauðhetta, Grísirnir þrír, Sætabrauðsdrengurinn og Úlfur Úlfur. Rúmur helmingur íbúa og starfsmana Sólheima koma á einhvern hátt að sýningunni. Við heyrðum meira af þessari sýningu þegar Hallbjörn V. Rúnarsson, sem samdi tónlistina í sýningunni og Guðmundur Lúðvík Þorvaldsson leikstjóri komu í þáttinn.

Við höfum verið að flytja gömul viðtöl úr safni útvarpsins í þættinum undanfarið. Mjög áhugavert efni sem gefur okkur innsýn inn í lífið á Íslandi á síðustu, og jafnvel þarsíðustu öld. Í dag heyrðum viðtal við Sigurjón Stefánsson skipstjóra, sem lengi var skipstjóri á Ingólfi Arnarsyni úr þættinum Við Sjóinn frá 1977 í umsjón Ingólfs Stefánssonar. Sigurjón var landsþekktur fyrir happasæla skipstjórn. Hann man tímana tvenna og upplifði miklar breytingar í sjómennsku frá því hann byrjaði ungur til sjós.

Umsjón í dag, Guðrún Gunnarsdóttir og Gunnar Hansson

Við skoðuðum hjólreiðar í Reykjavík í þættinum í dag. Undanfarin ár hefur verið gríðarlega mikil aukning í að fólk ferðist um borgina á hjólum og hjólastígar komnir víða. Sumir fagna aukningunni á meðan öðrum finnst nóg um. Við fengum þau Björgu Helgadóttur og Kristinn Jón Eysteinsson, verkefnastjóra í samgöngu- og borgarhönnun hjá Umhverfis- og skipulagssviði Reykjavíkur til okkar í dag. Þau sögðu meðal annars frá hjólreiðaáætlun Reykjavíkurborgar til ársins 2020 og tilraunaverkefni með rafhjól.

Leikhópurinn Óríon, frumsýnir leikritið Leigumorðið, sem fjallar um ungt fólk sem leigir saman, en það fjallar líka um kynhneigð, BDSM og málefni hinsegin fólks. Bryndís Björk Kristmundsdóttir, leikstjóri sýningarinnar, sagði okkur meira frá sýningunni og leikhópnum.

Vaxandi fjöldi lífeyrisþega leitar sér nú tannlækninga í Evrópu. Lög sem leyfa slíkt tóku gildi 2016 og síðan þá hefur þeim fjölgað á hverju ári sem fara til útlanda til lækninga. Grímur Axelsson, alþjóðahagfræðingur er umboðsmaður tannlæknastofu í Búdapest. Bergljót Baldursdóttir ræddi við hann á Heilsuvaktinni í dag.

Umsjón í dag, Guðrún Gunnarsdóttir og Gunnar Hansson

Fyrir tíu árum var fyrst haldið húmorþing á Hólmavík þar sem fræðimenn, grínistar og áhugafólk um húmor og hlátur koma saman og ræða málin. Fimmta þingið var haldið fyrir stuttu og þar talaði t.d. Eiríkur Valdimarsson þjóðfræðingur um hið skemmtilega efni, kynlíf í gamla bændasamfélaginu. Kristín Einarsdóttir, okkar kona á Ströndum, hitti Eirík og fékk hann til að ræða t.d. um kynlíf forfeðra okkar.

Í lok ágúst munu 20 íslenskir flugbjörgunarsveitarliðar fara í göngu milli tveggja helstu bæjanna á Svalbarða, sem er um 50 km leið. Á Svalbarða eru þúsundir ísbjarna og þáttakendur munu þurfa að skiptast á að standa svokallaða ísbjarnarvaktir. Arnar Ingi Gunnarsson mun leiða hópinn, hann var í símanum í þættinum í dag.

Við forvitnuðumst um ráðstefnu sem haldin var í gær um Lýðháskóla. Þar var rýnt í niðurstöður rannsókna sem sýna veruleg áhrif lýðháskóla til minnkunar brottfalls og aukningar í framhaldsmenntun meðal brottfallsnemenda á Norðurlöndunum. Rætt var um stöðu lýðháskóla á Íslandi, mögulegt hlutverk þeirra og þau áhrif sem lýðháskólar gætu haft í íslensku menntakerfi. Auður Inga Þorsteinsdóttir framkvæmdastjóri UMFÍ kom í þáttinn.

Umsjón í dag, Guðrún Gunnarsdóttir og Gunnar Hansson

Samhjálp á 45 ára afmæli þessa dagana, en starfið byrjað smátt í sniðum í bílskúr á Sogaveginum. Í dag, 45 árum síðar, hefur umfang Samhjálpar margfaldast. Áfengis- og vímuefnameðferð er rekin í Hlaðgerðarkoti í Mosfellsdal, þar sem 30 skjólstæðingar eru hverju sinni í langtímameðferð og einnig rekur Samhjálp fjögur áfanga- og stuðningsheimili og kaffistofu sem gefur 200 máltíðir á dag alla daga ársins. Rósa Gunnlaugsdóttir frá Samhjálp var gestur þáttarins í dag.

5 ára afmælishátíð Konubókastofu verður haldin nk. sunnudag í Rauða Húsinu á Eyrarbakka. Konubókastofa er fræðslu- og varðveislusafn tileinkað íslenskum kvenrithöfundum og verkum þeirra. Það verður fjölbreytt dagskrá og handhafar Fjöruverðlauna og Íslensku Bókmenntaverðlauna 2018 munu koma og fjalla um verk sín. Anna Jónsdóttir, stofnandi konubókastofunnar kom í þáttinn í dag.

Svo var það lesandi vikunnar, í þetta sinn var það Elísabet Brekkan, hún sagði okkur frá þeim bókum sem hún er að lesa þessa dagana og aðeins af bresku konungsfjölskyldunni.

Umsjón í dag, Lísa Pálsdóttir og Gunnar Hansson

Föstudagsgestur Mannlega þáttarins í þetta sinn var Þórunn Sigurðardóttir. Hún hefur unnið sem leikari, leikstjóri, handritshöfundur, stjórnandi Listahátíðar og margt fleira. Við kynntumst henni betur, hvaðan hún kemur, hvar hún gekk menntaveginn, en hún lauk til dæmis háskólaprófi í kennslufræði sjötug að aldri.

Sögur - verðlaunahátíð barnanna verður í beinni útsendingu á RÚV frá Eldborgarsal Hörpu næsta sunnudag. Hátíðin hófst í haust þegar KrakkaRÚV óskaði eftir innsendum sögum frá krökkum á aldrinum 6-12 ára. Sigyn Blöndal kom í þáttinn og sagði okkur meira frá þessari verðlaunahátíð.

Sigurlaug Margrét Jónasdóttir, besti vinur bragðlaukanna, var með sitt matarspjall í þættinum í dag. Í þetta sinn talaði hún um Claude Monet, málverkin hans, en ekki síst um mataruppskriftir tengdar honum sem hafa verið gefnar út í fjölda bóka, enda var hann annálaður sælkeri og fagurkeri.

Umsjón í dag, Guðrún Gunnarsdóttir og Gunnar Hansson

Við elskum alla er heiti á dagskrá sem fer í gang 21.apríl á Hótel Grímsborgum, með þeim Gunnari Þórðarsyni og Magnúsi Kjartanssyni. Tónlist þeirra beggja hefur fylgt þjóðinni gegnum tíðina og þeir félagar ætla að segja frá sögu laganna og atburðum úr ferlinum. Þeir Magnús og Gunnar komu í þáttinn í dag.

Við fengum póstkort frá París í dag. Í þessu póstkorti sagði Magnús R. Einarsson okkur frá pólitíkinni og verkfalli sem fer harðnandi, stúdentamótmælum sem minna á uppreisn stúdenta fyrir nákvæmlega hálfri öld. Það var líka sagt frá nýrri Ikea verslun sem á að opna í miðborg Parísar á næsta ári og svo frá vasaþjófnaði sem er nánast stundaður sem listgrein og er vaxandi vandamál í borg ljósanna.

Á alþjóðlegri ráðstefnu um sjúkraþjálfun á geðheilbrigðissviði sem haldin var í Reykjavík 10.-12. Apríl voru 200 sjúkraþjálfarar, auk nokkra lækna og sálfræðinga, frá 26 löndum. Þar af voru 45 sjúkraþjálfarar frá Íslandi. Monette Indahl,sérfræðingur í sjúkraþjálfun á sviði geðkvilla, hélt fyrirlestur á ráðstefnunni. Hún vinnur á bráðamóttökunni á Blakstad Sykehus sem er stærsti geðspítali Noregs. Þar hefur hún rannsakað líkamlegt jafnvægi meðal ungra sjúklinga og borið saman við heilbrigð ungmenni. Monette var í þættinum í dag.

Umsjón í dag, Guðrún Gunnarsdóttir og Gunnar Hansson

Málþing um transfólk, heilbrigði og réttlæti var haldið síðastliðinn föstudaginn í tilefni þess að Samtökin 78 fagna í ár 40 ára afmæli sínu en málþingið var haldið í samstarfi við RIKK. Svandís Anna Sigurðardóttir, kynjafræðingur, sem hélt erindi um upplifun transfólks af transtengdri heilbrigðisþjónustu á Íslandi, var gestur þáttarins í dag.

Kristín Einarsdóttir, okkar kona á Ströndum, fór í heimsókn í Grunnskólann á Hólmavík og hitti skólastjórann Hrafnhildi Guðbjörnsdóttur og nemendur sem sögðu frá margvíslegum verkefnum sem þau fást við í skólanum.

Umsjón í dag, Guðrún Gunnarsdóttir og Gunnar Hansson