La dunna e mamma da 32 onns è turnada questa stad cun sia famiglia da Rio de Janeiro, nua ch'ella ha vivì ils ultims 6 onns.

Empè dad in segiurn da trais mais sco previs il settember 2016, è la favella Rocinha - ina da las pli paupras da la citad da Rio de Janeiro - daventada in lieu da patria per l'Engiadinaisa Manuela Schläpfer.

En Brasilia ha la dunna da 32 onns emprendì ad enconuscher in mund cumplettamain different da la Svizra bainstanta. Manuela Schläpfer ha lavurà en ina canorta en la favella per 80-100 francs al mais.

Il desideri da vulair gidar

Durant il temp en Brasilia ha ella er emprendì ad enconuscher ses um da la vita. Ultra da quai ha l'Engiadinaisa er realisà in project per gidar e sustegnair famiglias che vivan en la povertad. «Manu – Helping Favela Rocinha» sa numna il project ch'i dat dapi il 2017 e che sustegna tras donaziuns entant 200 famiglias en la favella.

Durant il temp da pandemia saja la situaziun per la populaziun anc sa pegiurada, suttastritga la mamma da trais uffants.

Sper «Gangs», armas e violenza è la fom il pli grond problem en la favella Rocinha

Dapi questa stad viva Manuela Schläpfer cun sia famiglia a Wetzikon. Là ha ella chattà ina plazza da lavur en ina canorta cun in pensum da 60%. Ses um fa actualmain lavurs temporaras.

Ch'els èn turnads en Svizra saja adina stada sia finamira, numnadamain ch'ils uffants pon ir a scola en Svizra. Il sa disar vi dal «sistem svizzer» dovria anc ses temp, ha declerà l'Engiadinaisa che numna «ris cun favas» anc adina sco tratg preferì da la famiglia.