Monitor

Die dood verlede week van die rugbylegende, Salie Fredericks, het opnuut 'n debat ontketen oor of swart sportlegendes uit die apartheidsera genoeg erkenning geniet. Heindrich Wyngaard berig.

Die Openbare Beskermer, Busisiwe Mkhwebane, het erken dat sy verkeerd was om die parlement te beveel om die grondwet te verander. Sy sê verder dit was verkeerd van haar om 'n verandering in die reserwebank se mandaat te beveel. Mkwhebane gaan nie die reserwebank se aansoek teenstaan dat haar verslag ongedaan gemaak moet word nie. Tog berig Marlinee Fouche dat Mkhwebane steeds volhou dat haar verslag geldig is.

Die nasionale verbruikerskommissie se ondersoek na wanpraktyke in die tyddeelbedryf begin vandag in Kaapstad. Die kommissie hoop dat die openbare verhoor aanleiding sal gee tot een wet wat die bedryf kan reguleer. Een van die groot tekortkominge van die huidige wetgewing is dat verbruikers geen seggenskap het in die vakansieskemas nie. Talle verbruikers voel hulle is vasgevang in 'n tronk waaruit hulle nie kan ontsnap nie. Die tyddeel eienaar, Soera Lotter, sê dat hulle dit nie eers regkry om hul tyddeel verniet weg te gee nie.

Eskom se gebrek aan deursigtigheid is Vrydag gekritiseer tydens openbare verhore wat deur die Nasionale Energie-reguleerder gelei is. Die direkteur van Energie by OUTA, Ted Blom, sê Eskom kon nie syfers gee oor hoeveel steenkool en water hulle gebruik by die verskeie kragopwekkingsfasiliteite nie.

Die !Khomani-kulturele landskap se insluiting by Suid-Afrika se nege wêrelderfenisgebiede, is volgens inwoners nog net die begin. Die woordvoerder vir die gebied se inheemse tale en ook die huidige leier se raadgewer, Ruben Festus, sê die proses om ingesluit te word was nie maklik nie.

Baleka Mbete het haarself beskikbaar gestel vir die posisie van die ANC-president. Mbete was ook voorheen Suid-Afrika se adjunkpresident en sekretaris-generaal van die ANC vroueliga. Maar 'n politieke ontleder verbonde aan die Universiteit van die Witwatersrand, Professor Susan Booysen, het aan Jean Esterhuizen gesê Mbete se kans om die top posisie te beklee is baie skraal.

Die speaker van die parlement, Baleka Mbete, het haar steun toegesê aan die reserwebank se hofaansoek rakende die bevindinge van die openbare beskermer se CIEX verslag. Advokaat Busisiwe Mhkwebane het in haar verslag gevind dat die mandaat van die reserwebank verander moet word van 'n instansies wat inflasie teiken, na 'n instansie wat ekonomiese groei bevorder. Die hoofekonoom van economist.co.za, Mike Schussler, sê die markte behoort positief te reageer op die speaker se besluit.

Die !Khomani-kulturele landskap in die Kalahari Gemsbok Nasionale Park, is deur die VN aangewys as 'n wêrelderfenisgebied. Die gebied van meer as negehonderd duisend hektaar is deel van die Dawid Kruiper Distrik-munisipaliteit en sluit die hele park in. Suid-Afrika het nou nege wêrelderfenisgebiede. 'n Professor in geskiedenis aan die Noordwes Universiteit, en die direkteur van Archa-Etnos Argeoloë, dr. Anton van Vollenhoven, het aan Marlinee Fouche gesê die gebied geniet nou internasionale status.

Die Britse openbare skakelgroep Bell Pottinger het 'n senior vennoot afgedank en drie ander werknemers geskors na beskuldigings dat die groep 'n veldtog ondersteun het wat rasseverdeling in Suid-Afrika aangeblaas het. Dit hou verband met hulle hantering van die mynmaatskappy Oakbay se rekening. Oakbay behoort aan die Gupta-familie. Bell Pottinger het ook 'n internasionale regsfirma, Herbert Smith Freehills, aangestel om die Oakbay-rekening te ondersoek. Hendrik Martin het meer besonderhede.

Die volgende bydrae bevat enkele vloekwoorde, en kan sensitiewe of jong luisteraars ontstel. Die gelykheidshof het vroeer die week beslis dat die kunswerk bekend as "f**k white people" as 'n uitdrukking van kuns beoordeel moet word, eerder as haatspraak. Jack Miller, die leier van die politieke party, die Cape Party, het die kunstenaar, Dean Hutton, vir haatspraak hof toe geneem. Die uitspraak het 'n uiteenlopende reaksie ontlok. Metzi van der Merwe doen verslag.......