"Die kerk is nou op n ander plek." Dit is die woorde wat die NG Kerk se moderator, ds. Nelis Janse van Rensburg, gebruik het om sy verslaentheid uit te spreek oor verlede week se besluit van die algemene sinode om enige huwelik tussen Gay-lidmate te fnuik. Net verlede jaar het dieselfde sinode beslis dat NG predikante burgerlike verbintenisse tussen Gay-egpare mag voltrek. Te midde van ten minste een dreigende hofsaak en aanklagtes van liefdeloosheid, praat ons vandag met die NG Kerk se voormalige moderator, prof. Nelus Niemandt, en ds. Johan Ernst wat ook die sinodesitting bygewoon het.

Die ikoniese trekklavierspeler en komponis, Nico Carstens, is gisteraand in die ouderdom van 90 oorlede. Hy het meer as 2,000 musiekstukke gekomponeer, waarvan die bekendste die treffer, Zambezi, was. Een van sy vier kinders, Klem Carstens, het aan Dianke Nel gesê Nico, of Oubaas soos hy hom noem, het 'n vol lewe gehad.

Die Nasionale Vervolgingsgesag wou nie berigte bevestig dat die aanklagte van bedrog teen die Minister van Finansies, Pravin Gordhan, teruggetrek gaan word nie. Gordhan en twee voormalige senioramptenare van die inkomstediens, Oupa Magashule en Ivan Pillay, moet Woensdag in die landdroshof in Pretoria verskyn. Verskeie organisasies en kommentators sê egter die aanklagte het min om die lyf en behoort teruggetrek te word. 'n Burgerregte-organisasie wat onlangs gestig is, Save SA, het besluit om Woensdag by die hof te gaan betoog. 'n Woordvoerder vir die organisasie, Anso Thom, het aan Hendrik Martin gesê hulle gaan voort met die betoging al word die aanklagte teruggetrek.

Die afgetrede adjunkregterpresident van Suid-Afrika, Dikgang Moseneke, sê studente kan 'n verandering by die stembus afdwing as hulle ontevrede is met die huidige stand van sake. Hy was die hoofspreker by Unisa se jaarlikse Stigterslesing in Pretoria. Hy sê die geweld wat met die #FeesMustFall-beweging gepaard gaan, kan die regmatige eis vir algehele toegang tot hoër onderwys, onderworpe aan redelike kwalifikasies, in die wiele ry.

Die konstitusionele hof se hoofregter, Mogoeng Mogoeng, het tydens die O.R. Tambo-gedenklesing in Johannesburg nie doekies omgedraai oor brandende kwessies wat Suid-Afrikaners direk raak nie. Hy het passievol gepraat oor die noodsaaklikheid om 'n ekonomiese afgradering te voorkom.

Die Britse Museum in Londen hou tans 'n kunsuitstalling oor Suid-Afrika se geskiedenis met die titel SOUTH AFRICA: ART OF A NATION. In die uitstalling vertel 'n uiteenlopende reeks kunswerke die storie van Suid-Afrika se geskiedenis tot sover terug as 100,000 jaar. Dianke Nel het meer oor die uitstalling gaan uitvind...

Nuwe navorsing beklemtoon honde se fyn aanvoeling vir die kommunikasieseine van mense. Hulle het ook die vermoë om hulle eienaars en ander se gesigsuitdrukings en woorde te verstaan en interpretreer. 'n Artikel in die vakjoernaal, Current Directions in Psyhological Science, wys dat dat honde kan onderskei tussen mense se emosionele uitdrukkings. Izak du Plessis praat hieroor met ons wetenskapkorrespondent George Claassen.

"Baanbrekerswerk" en "Enig van sy soort". So beskryf wetenskaplikes 'n projek wat tans aan die gang is om 'n volledige reeks boeke oor motte van Suid-Afrika te skryf. Ondanks die feit dat daar duisende mot-spesies is, en talle wat nog ontdek kan word, bestaan daar nie so 'n boek nie. Hanri Wondergem was by die sewende jaarlikse Oppenheimer De Beers-groep Navorsingskonferensie in Johannebsurg waar sy die leier van die projek raakgeloop het.

Is koringprodukte sleg vir jou? 'n Nuwe studie se resultate wat in Wene bekend gemaak is, verbind die eerste keer talle siektetoestande met 'n proteïne wat in koring voorkom. Anita Visser praat hieroor met ons wetenskapkorrespondent George Claassen.

Die Amerikaanse waghond wat kwaksalwery dophou, Quackwatch, wys die vinger na Amazon. Die aanlynverkoper-webwerf verkoop volgens Quackwatch duisende hoogs gevaarlike produkte. Anita Visser praat hieroor met ons wetenskap-korrespondent George Claassen.