La passiun per chant e musica sa tira sco in fil cotschen tras la vita da la chantadura, cumponista e dirigenta da Ramosch cun ragischs en la Germania.

Grazia a l’amur è Nina Mayer vegnida avant passa 20 onns en Engiadina Bassa, nua che la dunna da 42 onns abita cun ses um e lur duas figlias a Ramosch. Oriundamain è la chantadura, cumponista e dirigenta da plirs chors da Garmisch-Partenkirchen. Aifer be in onn haja ella emprendì rumantsch, quai era grazia a sias duas figlias. «Per l’integraziun en ina regiun èsi impurtantischem da savair la lingua. Pir lura emprend’ins d’enconuscher la cultura e la glieud.» La passiun per il chant e la musica saja gia adina stada fitg gronda, malgrà che Nina Mayer deriva d’ina chasa da medis.

Diriger plirs chors dad uffants e creschids ed instruir plirs instruments e chant per la scola da musica è il mintgadi da la pedagoga e la dettia er adina puspè satisfacziun. Surtut la lavur cun uffants, da mussar a chantar, la dettia adina puspè la conferma d’esser sa decidida per la dretga direcziun en sia vita professiunala. Sper il plaschair e la passiun per sia famiglia e la musica enconuscha Nina Mayer dentant er muments main suleglivs en sia vita cun fasas da depressiun. «Jau sai co che quai è dad esser sur in lung temp en sumbriva.» Impurtant saja da discurrer avertamain davart il tema e betg tabuisar el. Ultra da quai ha Nina Mayer emprendì da tadlar fitg bain sin ses corp e ses basegns.