- Tað er fantastiskt at skriva. Tað er gevandi, og tað er ein máti at nærkast lívsins spurningum.

Soleiðis sigur Lív Maria Róadóttir Jæger, sum fekk virðisløn M.A. Jacobsens fyri yrkingasavnið "Eg skrivi á vátt pappír".

Tað er omman, sum gevur bókini lív. Og bókin er ein intens uppliving, sum bæði ger teg rørdan og fær teg at smílast.

Formurin og innihaldið er nýskapandi, men tað tekur útgangsstøði í nærsambondum, sum ger, at flest øll munnu kenna seg aftur.

Hoyr alla samrøðuna við Lív her.

Í dag, 9. oktober, vildi John Lennon verið 80 ár, um hann var á lívi. Vit minnast John Lennon saman við Sámali Ravnsfjall og Rana Nolsøe, sum eisini framføra Lennon-sangir beinleiðis í útvarpsstovuni.

Virðislønir M.A. Jacobsens vóru latnar í gjár. Lív Róadóttir Jæger, sum vann virðislønina fyri fagurbókmentir, vitjar.

Hoyrið sendingina her

- Eg eri sjálvsagt hørm um støðuna, men eg má royna at halda fokus á tær uppgávurnar, eg havi.

Soleiðis sigur Jenny Petersen, stjóri á Tjóðpalli Føroya, sum óviljað er vorðin høvuðsleikarin í leiklistastríðnum, sum hevur tikið seg upp.

Ein leiklistafylking er stovnað, har 22 leiklistafólk hava tikið seg saman um eitt mál: At fáa setanina av stjóranum á Tjóðpallinum at ganga umaftur og fáa verandi stjóran frá.

Jenny Petersen varð í februar sett til stjóra fyri fjórðu ferð upp í slag, og tað hevur fingið partar av leiklistafólkunum í Føroyum at siga stopp.

Í sambandi við tað stríð, sum hevur tikið seg upp um Tjóðpallin, sigur Jenis av Rana, landsstýrismaður í mentamálum, at hann hevur fult álit á avgerðini hjá júst fráfarna Leiklistaráðnum, sum setti Jenny Petersen í áramálssett stjórastarv fyri fjórðu ferð í februar.

Hoyrið samrøðuna her

Nón viðgjørdi stríðið um Tjóðpallin í dag. Øll sendingin kann hoyrast á kvf.fo/non

Leiklistaøkið er í kreppu, og eitt nýtt listastríð prutlar undir lokinum, nú ein nýggj Leiklistafylking vil hava stjóran á Tjóðpallinum frá.

Búi Egason Dam, sum umboðar nýggja fylkingina, og Birna Heinesen, limur í Leiklistaráðnum, sum hevur sett stjóran í starv fyri fjórðu ferð, skifta orð um tað, sum líkist einari kreppustøðu.

Jenny Petersen, sum hevur verið í stjóri í fimtan ár, og nú er nú sett fyri fimm ár afturat, er óviljað vorðin miðdepil í stríðnum. Vit fáa orðið á Jenny.

Vit fara ein biltúr við nýggja formanninum í felagnum Føroya Ellisakfør, Oliver Andreasen, sum sjálvur eigur ein silvurgráan Rolls Royce frá 1970 og ein Chrysler Imperial frá 1959 .

Hoyrið innslagið her

ES: Í innslagnum verður sagt, at gamli Bedford lastbilurin er elsta koyrandi akfar í brunninum, men tá kannað varð nærri, vísti tað seg at ein Ford A persónbilur frá 1930, sum koyrir, eisini heldur til har. So hesin er tann elsti. Elsta koyrandi ellisakfar í øllum landinum er ein Ford T persónbilur á Vatnsoyrum, sum er frá 1927.

Londini í útnorði hava tað í felag, at tey hava hoyrt undir danska ríkið. Í dag verða gomul hierarki endurskipað og roynt verður at seta jøvn samstørv í verk. Tað er høvuðsniðurstøðan í bókaverki um tað nýggja útnorður. Vit tosa við Maluna Marnersdóttir, professara, og Berg Rønne Moberg, lektara, sum hava hvør sínar stóru leiklutir í sambandi við útgávuna.

Retorikkur eftir Aristoteles er nýggjasta týðingin hjá 86 ára gamla Eilifi Samuelsen, sum seinastu 16 árini hevur umsett 16 bøkur. Vit fara á gátt heima hjá Eilifi.

- Eg blívi meiri eggjaður, so hvørt eg komi longri fram í hesum; tað er so nógv, eg kundi hugsað mær at farið í holt við at týtt.

86 ára gamli Eilif Samuelsen hevur týtt 16 bøkur seinastu 16 árini. Og tað eru ikki hissini bøkur, hann hevur umsett við telduna undir væðingini í heimi sínum. Hann arbeiðir hvønn dag, bæði fyrrapart og seinnapart. Sjálvur kallar hann tað ikki arbeiði, tí hann ger tað av berum áhuga.

Hoyr samrøðuna við Eilif Samuelsen um nýggjastu bókina Retorikkur, sum upprunaliga er skrivað góð 300 ár fyri Kristi føðing, og nú er latin í føroyskan málbúna.

Sexisma og sexuellur ágangur eru javnan uppi og venda. Men hvat er hvat?

Hvussu umfatandi sexisma er, og hvat sexisma er, sýnist ikki greitt. Hvør er munurin á gerandissexismu, strukturellari sexismu og beinleiðis ágangi ella harðskapi? Og kunnu vit yvirhøvur tosa um eina sexistiska mentan? Hvat leggja vit í okkara børn sum foreldur og samfelag? Og síðst, men ikki minst, hvussu sleppa vit av við sexismu, um tað yvirhøvur ber til.

Lív Patursson er kynsfrøðingur og samskipari hjá Javnstøðunevndini, og Bjørt Lind er sálarfrøðingur og sexologur.

- Hann føldi so nógv, og man føldi hann væl, tá hann spældi.

Í vikuni andaðist Hans Carl Hansen, einans 65 ára gamal. Hans Carl Hansen hevur verið ein undangongumaður í rútmiskum tónleiki her heima, og hann hevur verið ein fyrimynd fyri sítt eyðkenda gittarspæl.

Saman við Jørgin Dahl, Óla Poulsen og Leivi Thomsen minnast við Hans Carl Hansen. Vit spyrja, hvussu hann var sum menniskja og gittarspælari, og vit lýsa, hvønn týdning hann hevði fyri rútmisku tónleikasøguna í Føroyum.