Randulinas, vatgas, glimajas, chavals e paslers – quai èn tut animals che vegnan menziunads en chanzuns da «Noss Chors».Inqual enconuscha franc «la canzun dil bau» u la chanzun dal «salep e la furmicla». Ma er auters animals vegnan dechantads da noss chors. Las tgirallas, las vatgas, en pliras chanzuns era ils paslers. Perquai datti oz in'emissiun nua ch'ils animals dattan il titel a las chanzuns.

Las notgs vegnan pli e pli curtas. Blers sa legran dals dis pli lungs e suleglivs. Ma era la notg è insatge bel e perquai dechantan Noss chors oz questa part dal di.Noss chors demussan oz ch'era la notg stgira ha sias bellas varts. Cun chanzuns sco «La sera» dal chor masdà Ardez u «Ei tucca da notg» dal Chor viril da Domat ubain «Alla notg» dal quartet dubel da Pigniu ed insaquantas autras chanzuns dechantan els la bellezza nocturna.

Quest'emna festivescha Gion Giusep Derungs ses 85avel anniversari. En l'emissiun da «Noss chors» vulain nus tadlar insaquantas cumposiziuns dad el.Il cumponist, dirigent e chantadur Gion Giusep Derungs è naschì ils 15 d'avrigl 1932. Gia baud ha el cumenzà da chantar en divers chors. Ses temp sco chantadur en la Ligia Grischa è stà - sco el di sez - in'onur per el. Segir ha quai era gidà el pli tard durant ses temp da studi en il conservatori a Basilea. Oz pudain nus tadlar insaquantas ovras ord ses vast repertori da cumposiziuns.

Durant l'avrigl poi dar dal tut. Plievgia, sulegl u schizunt anc ina giada naiv. «Noss Chors» han per mintga eventualitad la dretga chanzun.'L'avrigl fa tge ch'el vul' è ina veglia locuziun per quest mais. In'emna èsi anc chaud e bel e tuttenina vegni brut e fraid e dat tranteren schizunt anc naiv. Uschè variant èn dentant era las chanzuns da «Noss Chors». Uschia chantan els dal sulegl, dal vent ma era dal stemprà e la plievgia.Redacziun: Gion Dominic Pohle

En questa seria avain nus gia visità blers lieus e tadlà bleras differentas vuschs. Uras dad ir sur ils cunfins e guardar, u meglier ditg tadlar tge ch'i dat là.En la seria da Nossas valladas, Noss Chors avain nus visità las valladas dal Grischun. Ma chors rumantschs datti en l'entira Svizra. E betg d'emblidar èn nossas collegas en l'Italia che chantan per ladin. «Noss Chors» maina oz sin in viadi musical en ed enturn la Svizra.Redacziun: Gion Dominic Pohle

Ils dis vegnan pli lungs, las temperaturas èn pli autas ed i flurescha dapertut, gea la primavaira è qua.In temp da ventira per blers. In temp da colurs, flurs e da la natira che sa dasda. Durant las spassegiadas audan ins las bellas melodias dals utschels, ed oz quellas da «Noss Chors». Imnis a la primavaira ed a las flurs.

Pli e pli blers chors svaneschan. In svilup tragic. «Noss chors» laschan reviver insaquantas vuschs ch'ins n'auda betg pli.Ils chors han difficultads da tegnair lur commembers u da gudagnar novs. La consequenza è che blers chors èn sfurzads da sa schliar. In trist svilup. «Noss chors» preschenta chanzuns da chors ch'i na dat betg pli e lascha reviver insaquantas versiuns da chanzuns bunamain emblidadas. Erwin Ardüser è sa fatschentà intensivamain cun questa tematica cun scriver ina cronica per il district da chant Surselva. El raquinta da questa lavur.

Temp da curaisma è il temp da far gigina e cunzunt il temp per far uraziun per sa preparar per Pasca.En «Noss chors» tadlain nus oz uraziuns e chanzuns sacralas. Texts e melodias contemplativas per quest temp da gigina e preparaziun. Chantà da differents chors da baselgia u era dad auters. Nizzegiai quest'ura per pussar, meditar e per emblidar ils quitads.

Il temp da las Guggas, dals confettis e costumads: Tschaiver. Era ils chors pon far festa e chantar da cumpagnia.Basilea, Lucerna ubain Cuira: Il proxim temp è tschaiver dapertut. Uschia era qua en l'emissiun da «Noss chors». Ils chors chantan chanzuns da cumpagnia e festiveschan uschia la Tschintgavla stagiun.

Mintga val ha ses chors che represchentan la patria. «Noss Chors» preschenta en questa seria ils chors da las differentas valladas. En la sisavla part visitain nus la Lumnezia.Mintga chor s'identifitgescha cun sia vallada, sia patria. E mintga vallada porscha in dachasa a differents chors. En questa seria sa metta «Noss Chors» sin viadi atras las vals da noss chantun e fa visita ad els. Oz visitain nus la Lumnezia. Quella s'extenda davent il portal da Porclas enfin la Greina al cunfin dil Tessin. Era qua èn insaquants chors sa chasads.