Oz è il di da son Valentin. «Noss chors» intunescha quest di cun chanzuns che van a cor.Il di dals amants è arrivà. Temp dad ir ad ina buna tschaina cun il partenari, temp per fluras, tschigulatta e cors. Ma oravant tut temp da prender peda in per l'auter ed engraziar per tut il bun che l'amant fa per ins. «Noss chors» han per quest temp exact las dretgas chanzuns.

Annetta, Gion Paul, Mengina e Tumasch – quellas persunas han insatge communabel. Ad ellas è ina chanzun vegnida deditgada.Sa chapescha survegn ina persuna savens ina chanzun ord motivs d'amur, dentant betg mo. Questa saira pudais tadlar chanzuns da tut ils geners, il sulet communabel ch'ellas han: ina persuna dat il titel ad ellas.Redacziun: Flavio Tuor

Trais onns suenter il disc cumpact cun musica da Tumasch Dolf segua ussa la musica dal figl, Benedetg Dolf. Sin il nov DC cun il titel «Schläft ein Lied – in allen Dingen» interpretescha l'ensemble vocal inCantanti ovras main enconuschentas dal cumponist da la Val Schons.36 chanzuns sa chattan sin il nov DC. Las bleras èn vegnidas registradas per la prima giada. Il dirigent da «inCantanti», Christian Klucker, s'occupa gia dapi sia lavur da maturitad cun Benedetg Dolf. Perquai enconuscha el fitg bain sias ovras ed emprova da derasar questa litteratura. Tar mintga concert da inCantanti sa chatta almain ina chanzun dals Dolfs. Oz pudais tadlar ina selecziun dal nov disc, ultra da quai vegn il dirigent Christian Klucker a pled. Redacziun: Flurin Clalüna

Mintga val ha ses chors che represchentan la patria. «Noss Chors» preschenta en questa seria ils chors da las differentas valladas. En la tschintgavla part visitain nus l'Engiadina Bassa.Mintga chor s'identifitgescha cun sia vallada, sia patria. E mintga vallada porscha in dachasa a differents chors. En questa seria sa metta «Noss Chors» sin viadi atras las vals da noss chantun e fa visita ad els. Oz visitain nus l'Engiadina Bassa. Quella s'extenda da Zernez enfin Martina. Era qua èn insaquants chors sa chasads.Redacziun: Gion Dominic Pohle

Chanzuns da chors vegnan savens era giavischadas en las gratulaziuns ni tar il concert sin giavisch. Uss a l'entschatta da l'onn fa «Noss chors» in Best of da las chanzuns giavischadas.La sera sper il lag? Il pur suveran? Mia mumma? Ni tut in'autra chanzun? Tge chanzun è vegnida giavischada il pli savens l'onn 2016?«Noss chors» preschenta oz ils top 16 dals chors da las gratulaziuns e dal concert sin giavisch.

Encunter la fradaglia dal schaner datti plirs meds. La pli empernaivla chalira, lezza vegn da dadens. Perquai chantan «Noss Chors» oz chanzuns d'amur per stgaudar uschia voss cors.Ils rumantschs scrivan e chantan gugent sur da l'amur. Uschia posseda nossa cultura da chor era in vast repertori cun talas chanzuns. Oz pudais tadlar ina schelta ord quest.Il cumenzament da l'ura tutga al chor maschadà da Rabius. Els preschentan insaquantas chanzuns da lur disc nov. Quel han els registrà entschatta december al concert da beneficenza per la renovaziun da la baselgia da Rabius. Redacziun: Gion Dominic Pohle

Il schaner è arrivà, l'onn nov cumenza e perquai derasan «Noss Chors» oz atmosfera d'enviern.Enfin ussa ha la naiv mancà quest enviern. Uschia na vegnan ins era betg propi en atmosfera d'enviern. Anzi, cun la mancanza da naiv ed entras ils dis curts sa derasa plitost in'atmosfera trista e melancolica. Perquai derasan «Noss Chors» oz cun chanzuns d'enviern l'endretga luna tar la stagiun alva e mainan vus per in mument en in mund plain naiv.

Mintga val ha ses chors che represchentan la patria. «Noss Chors» preschenta en questa seria ils chors da las differentas valladas. En la quarta part visitain nus la Foppa.Mintga chor s'identifitgescha cun sia vallada, sia patria. E mintga vallada porscha in dachasa a differents chors. En questa seria sa metta «Noss Chors» sin viadi atras las vals da noss chantun e fa visita ad els. Oz visitain nus la Foppa. Quella s'extenda en la regiun enturn Glion. Era qua èn insaquants chors sa chasads.

El è stà in grond da la chanzun rumantscha: Duri Sialm. Avant 55 onns è el mort. Sias melodias e chanzuns vivan dentant vinavant. Oz sa regordan «Noss Chors» dal cumponist, dirigent ed artist vi da l'orgla ed il clavazin.Il fanadur 1891 è naschì a Segnas l'um ch'ins ha pli tard numnà l'um cun la fatscha plain optimissem. Tar nus è Duri Sialm vegnì popular sco cumponist. Dentant èn era ses talentn sco pianist ed organist stads incontestads. Gia cun 11 onns ha el sunà ses emprim concert sin clavazin. «Noss Chors» chantan oz famusas ovras sco «La ventira» e «Tera neira». Ed era ils tocs instrumentals dad oz èn cumponids da Sialm.

Ord ils pleds inoltrads fa ina classa rumantscha il text ed il cumponist Flavio Bundi è responsabel per la part musicala. In chor ad hoc preschenta lura LA CHANZUN DALS PLEDS. Accumpagnada vegn questa emissiun speziala da chanzuns cun il tema pleds e dad ulteriurs chors ad hoc.Per la premiera da la chanzun dals pleds ha RTR tschertgà chantadurs e chantaduras rumantschas. Ensemen cun il cumponist e dirigent Flavio Bundi treneschan els questa saira tranter las 18.00 e las 20.00 uras La CHANZUN DALS PLEDS. L'emprova ha lieu en il studio da televisiun da RTR. A partir da las 19.00 vegn l'emprova emessa live en l'emissiun 'Noss chors' e medemamain en in livestream sin www.rtr.ch.La primaudiziun da la chanzun è alura d'udir curt avant las 20.00.Redacziun: Gion Dominic Pohle