Et ass nach ëmmer August a nawell leeft iwwerhaapt näischt. Dofir gëtt et haut en erfrëschende Cocktail aus e bëssen 80er, Maccaroni am Dëppen, enger gudder Prise Koks, e puer Ohrwürmer, geféierlechem nostalgeschen Iessen an enger Grëtz Trash-TV. Enjoy chilled!

Den August ass dëst Joer zwar héichsummerlech, mee nach méi ereignislos wéi soss. Dir braucht Beschäftegung? Say no more! Mir hu Brochlandungen am Fernsee an an der Zeitung fir iech, de neisten Dior-Parfum, eist Lieblingsalpaka, e Kaddo vum Beyoncé, Psychoterror a Realitéitsverloscht. Also alles wéi ëmmer. #crèmtiechan #dotärMaskun #maachtengPaus

Endlech aus der Datz eraus: PAUS. feiert seng 30(st Episod)!!! Dofir hu mir eis eng national TV-Koryphäe invitéiert, déi hire Besuch ab der éischter Minutt bereit huet. Mir schwätzen iwwer Hollänner, Schëllerpolster an Immobilien. Stréckt iech un fir e Galopp duerch d’Film- a Fernsehlandschaft mat Autosaccidenter, Verwirrungen em d’“Sunlicht“-Affär a ville knusprege Geschichten.

Don't call it a comeback! D'Yolanda an d'Miss Costa Rica si frou, endlech erëm do ze sinn a liewenswichteg Froen ze klären: Wéi eng T-Shirten huet de Keeleclub Nidderfeelen? Si Swarovski-Figuren en Zeechen vu Selbsthass? Wéi geet et dem Brad Pitt? Enner aanerem geet et och em houfreg léiend Zwillingen a komplett onemotional Kriibsen, plus Krawallbürsten a Leit, déi ze extra fir all Stärenzeeche sinn. Äert Dageshoroskop seet: Et ass Zäit, e Gang eroofzeschalten! Leet är Kristallen op d'Fënsterbänk a maacht eng PAUS. mat eis.

Eng Episod voller Special Effects (alias technesche Probleemer a buerende Noperen) a Mammen vun allen Zorten. Eng vun hinnen kritt esouguer de „Gëllene Nerv“ vun eis iwwerreecht. Och nach dobäi sinn d’ Liewensretter vun Esch, d’ Mammegeräisch par excellence an eng Portioun Onwëssen zu „Game of Thrones“. PLUS: Weieng TV-Mamm déi legendäerst Frisur huet a mat wéi enger de Yannick sech besonnesch verbonne fillt.

#27 #BLM by Jill & Yannick

An dëser Episod gi just déi wichteg Froe gestallt: Gëtt et zu Ibiza e Studenterabatt? Wéi oft kann d’Jill „domm Kou“ an enger Sendung soen? Wat sinn dem Yannick seng lescht Wierder um Sterbebett? Ass Thon eigentlech Poulet? An enger spezieller Episod fir déi vun der Coronakriis gebeutelt Primaner 2020 gëtt et zwar KENG sexy Strandstories, dofir awer Lloret-Geschichten, de „Faust“ an 10 Sekonnen a Gossip aus dem wuel speziellste Schouljoer (oder och zwee)

Mir si rëm back together (wann och just virtuell)! Dës Kéier gëtt doriwwer debattéiert, wat iwwerhaapt eng Urban Legend ass an ënner anerem iwwer den Utopolis, Läichen a Männer aus der Atert geschwat. Dobäi gëtt et nach déng Kolleegen, déi soss ni Schäiss erzielen, Penibeles vum Tennis an dem Yannick säi Verwandtschaftsverhältnis zu engem däitsche Rocker.

An Zäiten ewéi dësen verdreiwen sech d'Leit nach méi ewéi soss d'Zäit mat Challenges an ähnlëche Geschichten. Mir opferen eis op a probéieren der e puer fir iech aus. Enner anerem këmmere mir eis nach em essentiell Themen ewéi Polizisten op TikTok a Lieblingsmemes. PLUS: latäinamerikanesch Feierdeeg, traumatesch Besich beim Schouldokter a firwat de Yannick onbedéngt beim Marie Antoinette sengem Doud hätt wéilten dobäi sinn.

Haut schwelge mir an Erënnerungen un déi gutt al YouTube-Zäiten a këmmeren eis em essentiell Froen wéi "Ass Tik Tok de neie YouTube?", "Ween der Däiwel ass d'Kombucha-Girl?" a natierlech "Ass Boomerang Tik Tok?"

Mir hunn YouTube-Quarantän-Tipps mat schlampeger Animatioun, chauvinistesche Rapper a Beauty-Gurus mat iwwerrannte Mammen – PLUS d'Netflix-Must-Views fir iech an är ganz Mischpoke.

Ausserdeem gëtt nach gekläert, firwat mir den Harry an den Derrick aus der Podcastszeen sinn a firwat "Cool Feet" besser ass ewéi "Casa de Papel".