បន្ទាប់​ពី​វ៉ាក់សាំង​Sinopharm​របស់​ចិន​ដឹក​មក​ដល់​ប្រទេស​កម្ពុជា​កាល​ពី​ម្សិលមិញ​រួច​មក​ នៅ​ថ្ងៃ​នេះ​ពលរដ្ឋ​មួយ​ចំនួន​ដែល​អ្នក​យក​ព័ត៌មាន​វិទ្យុ​បារាំង​អន្តរជាតិ​RFI​ បាន​ជួប​សម្ភាស​បង្ហាញ​ការ​ភ្ញាក់​ផ្អើល​និង​អះអាង​ពី​ការ​ត្រៀម​ខ្លួន​ទទួល​យក​វ៉ាក់សាំង​នេះ​។ ផ្ទុយ​ពី​អ្នក​ត្រៀម​ខ្លួន​ អ្នក​ខ្លះ​លើក​ឡើង​ថា​ ពួកគេ​មិន​មាន​ហេតុផល​អ្វី​ដែល​ត្រូវ​ទៅ​ចាក់​វ៉ា់ក់សាំង​បង្ការ​កូវីដ១៩​ តាម​ការ​អំពាវនាវ​របស់​ក្រសួង​ឡើយ​។ ចំណែក​អ្នក​ដែល​មាន​ជំងឺ​ប្រចាំ​កាយ​ដូចជា​ ថ្លើម​ របេង​ សួត​ ជា​ដើម​ ក៏​ប្រកែក​មិន​ទទួល​វ៉ាក់សាំង​កូវីដ១៩​ នេះ​ដែរ​។ ប៉ុន្តែ​យ៉ាង​ណា​ក៏​ដោយ​សម្រាប់​អ្នក​ដែល​ពេញ​ចិត្ត​ទទួល​ចាក់​វ៉ាក់សាំង​ស្នើ​ឲ្យ​ភាគី​ពាក់ព័ន្ធ​បង្ក​លក្ខណៈ​ងាយ​ស្រួល​ដើម្បី​ទទួល​វ៉ាក់សាំង​ដូចជា​ការ​ចុះ​ស្រង់​ឈ្មោះ​នៅ​មូលដ្ឋាន​កំពុង​រស់​នៅ​ ប្រសើរ​ជាង​តម្រូវ​ឲ្យ​អនុវត្ត​ការ​ចុះ​ឈ្មោះ​តាម​អនឡាញ​ដែល​មាន​ភាព​ស្មុគស្មាញ​សម្រាប់​ពលរដ្ឋ​ធម្មតា​។