២២​វិច្ឆិកា​ឆ្នាំ​២០១០​ដល់​២២​វិច្ឆិកា​ឆ្នាំ​២០២០ គឺជា​ខួប​១០​ឆ្នាំ​គត់​នៃ​ហេតុការណ៍​រត់​ជាន់​គ្នា​ស្លាប់​នៅ​លើ​ស្ពាន​ពេជ្រ​នៃ​ទីក្រុងរណប​កោះ​ពេជ្រ។ ហេតុការណ៍​នៅ​រាត្រីថ្ងៃ​ចុងក្រោយ​នៃ​ពិធី​បុណ្យ​អុំទូក​ឆ្នាំ​នោះ បាន​សម្លាប់​មនុស្ស​៣៦៥នាក់ និងរបួស៥៥៥នាក់។ ជន​រង​គ្រោះ​ជា​បុរស​ម្នាក់​ដែល​ត្រូវ​បាន​ទាញ​ចេញ​ពី​គំនរ​មនុស្ស​បាន​រៀបរាប់​ប្រាប់​អ្នក​យក​ព័ត៌មាន​វិទ្យុ​បារាំងអន្តរជាតិ​ដោយ​ក្ដី​តក់​ស្លុត​ថា គេ​នៅ​មាន​ជីវិត​មក​ដល់​សព្វ​ថ្ងៃ​នេះ គឺ​បាន​គុណ​បុណ្យ​ទឹក​ដោះម្ដាយ​ថ្លៃ ជួយ​សង្គ្រោះ​កូន​ថ្លៃពីកណ្ដាប់​ដៃ​យមរាជ​នៅ​វិនាទី​ចុង​ក្រោយ។