ស្រប​ពេល​ដែល​ការ​រីករាល​ដាល​នៃ​ជំងឺ​កូវីដ១៩​មិន​ទាន់​ផុត​រលត់​បាត់​ទាំង​ស្រុង​នៅ​ឡើយ​ គេ​សង្កេត​ឃើញ​ថា​ កន្លែង​សាធារណៈ​ខ្លះ​ដូចជា​នៅ​កោះពេជ្រ​ និង​សួន​មុខ​សណ្ឋាគារ​ និង​កាស៊ីណូ​ណាហ្គាវើល​ជា​ដើម​ មាន​ការ​រៀបចំ​តុបតែង​សម្រាប់​បុណ្យ​ណូអែល​ឬ​គ្រីស្មាស​នា​ថ្ងៃ​ទី​២៥​ ខែ​ធ្នូ​ និង​ ឆ្លង​ឆ្នាំ​សាកល​ តែ​មិន​គគ្រឹក​គគ្រេង​ដូច​កាល​ពី​ឆ្នាំ​មុនៗ​ឡើយ​។ នៅ​សួន​មុខ​សណ្ឋាគារ​ និង​កាស៊ីណូ​ណាហ្គាវើល​មាត់​ទន្លេ​ គឺ​ត្រូវ​បាន​រៀបចំ​តុបតែង​ជា​ពិសេស​ ដោយ​មាន​ភ្លើង​ចម្រុះ​ពណ៌​យ៉ាង​ស្រស់ស្អាត​។ការ​តុបតែង​ប្លែកៗ​ជាមួយ​ភ្លើង​ពណ៌​ចម្រុះ​នេះ​ បាន​ទាក់ទាញ​ចិត្ត​អ្នក​ភ្នំពេញ​មួយ​ចំនួន​នាំ​កូន​នាំ​ចៅ​ទៅ​ទស្សនា​ និង​ថត​រូប​លេង​កម្សាន្ត​នៅ​ពេល​រាត្រី​។ ប៉ុន្តែ​ក្នុង​ពេល​ថ្ងៃ​ខ្លះ​ក៏​មាន​អ្នក​ទៅ​លេង​កម្សាន្ត​និង​ថត​រូប​ផង​ដែរ​។​