សារ ក្នុង​ន័យ វាយប្រហារ និង​ប្រកូកប្រកាស ​ឲ្យ​គេ​វាយធ្វើបាប​ជនជាតិ​អាស៊ី នៅ​ប្រទេស​បារាំង បាន​លេចមុខសាជាថ្មី នៅលើ​បណ្តាញសង្គម។ គណៈកម្មការ​ដើម្បី​សន្តិសុខ​ទាំងអស់គ្នា ដែល​ប្រមូល​ផ្តុំ​សមាគម​តំណាង​ជនជាតិ​ជាង​៤០​នៅ​ប្រទេស​បារាំង​បាន​ទាញ​សញ្ញា​អាសន្ន​ពីគ្រោះថ្នាក់ និង​ករណីវាយធ្វើ​បាប​ហិង្សា ទៅលើ​ជនជាតិបារាំង ដើមកំណើត​អាស៊ី ដែល​មាន​ចំនួន​កើនឡើង គួរ​ឲ្យ​កត់សំគាល់ នៅ​ទីក្រុង ប៉ារីស និង​នៅតំបន់​ជុំវិញ។ គណៈកម្មការ តំណាង​ជនជាតិ​អាស៊ី​បាន​អំពាវនាវ​ដែរថា ប្រសិន​បើគេ​ឃើញមាន សារ​សរសេរ​ញុះញង់ ឲ្យ​ស្អប់ ឲ្យ​វាយប្រហារ​ធ្វើ​បាប​ប្រជាជន​អាស៊ី ដោយសារ​ការរើសអើង​ពូជសាសន៍ គេ​អាច​ចូល​ទៅ​ក្នុង​វិបសៃតិ៍ ឈ្មោះ Pharos ដើម្បី​ជូនដំណឹង ឬ​បរិហា​សកម្មភាព​រើសអើង​ប្រកាន់​ពូជសាសន៍ ប្រឆាំងជនជាតិ​អាស៊ី។