ក្នុង​នាទីជីវិត​ជោគជ័យ​របស់វិទ្យុ​បារាំង​​អន្តរជាតិ​នាពេលនេះ ​អោ ស្រីពេជ្រ ​សុំណែនាំ​លោកអ្នកមកស្គាល់​យុវត្តី​​ឆ្នើមធ្វើការងារ​​លើកកម្ពស់​​​​ផ្នែក​សន្តិសុខ​ស្បៀងនិង​​អាហារូបត្ថម្ភ​។ ​កញ្ញា​ ឈុន បូរមី ​បច្ចុប្បន្នជា​​អ្នកដឹកនាំ​ក្រុមយុវជន​ជើងឯក​អាហារូបត្ថម្ភ​របស់អង្គការ​ Helen Keller International Cambodia ​និង ទើបត្រូវបាន​ជ្រើសតាំង​ជាតំណាងយុវជន​ប្រចាំតំបន់អាស៊ី​ នៅក្នុងក្រុម​គណះកម្មាធិការ​ដឹកនាំ​បណ្តាញ​អង្គការសង្គមស៊ីវិល​ដើម្បីអាហារូបត្ថម្ភ​សកល ​ដែលត្រូវបានហៅកាត់ថា​ (ស៊ុន ស៊ីអេស អិន)​ SUN CSN។​ យុវត្តី​វ័យ​ ២៣ឆ្នាំរូប​នេះ ​បាននិយាយថា នាង​ចាប់​ស្រលាញ់ផ្នែក​នេះ​ គឺដោយសារឃើញថា​ការយល់ដឹងផ្នែក​សន្តិសុខស្បៀង​និងអាហារូបត្ថម្ភ​នៅកម្ពុជា​នៅមានកម្រិត ខណៈ​យុវជន​ជាច្រើន​កំពុងទទួល​របបអាហារ​មិនត្រឹមត្រូវ​និងគ្មាន​ផា​សុកភាព។