​ថ្ងៃទី១៥​តុលាឆ្នាំ​២០១២​ដល់១៥តុលាឆ្នាំ​២០២១​ គឺជាខួប៩ឆ្នាំ​នៃការសោយ​ទិវង្គត​របស់ព្រះ​បរមរតនកោដ្ឋ ​នរោត្តម​ សីហនុ​។ ​លោក ឯល ប៊ុណ្ណា ជា​តន្ត្រីករ​ជើងចាស់​លើកឡើងថា​ ៩ឆ្នាំមកនេះ​លោកមិនដែល​ភ្លេចអនុស្សាវរីយ៍ ​ដែលធ្លាប់សាង​រួមគ្នា​ជាមួយព្រះ​បរមរតនកោដ្ឋ​ ក្នុងគ្រា​សម្រួលតន្ត្រី​និងតែងនិពន្ធ​ទំនុកច្រៀងនោះទេ​។ លោក​ ឯល ប៊ុណ្ណា ​បង្ហាញ​អារម្មណ៍​កាន់តែនឹក​ពន្លឹក​ទ្រង់ជាពន់ពេក​នៅពេល​ឮបទចម្រៀង​«លាហើយកម្ពុជា»សូសៀង​ផ្ទាល់របស់​ព្រះអង្គ ​ខណៈដែលរូបលោក​ជាអ្នកសម្រួល​តន្ត្រីម្នាក់ផង​។ ​ព្រោះតែ​ភាពប៉ិនប្រសព្វ​នៃសិល្ប កវី​ ឯល ប៊ុណ្ណា​ ចាត់ទុកព្រះ​បរមរតន​កោដ្ឋជា«បិតាសិល្បៈជាតិ»​។