ចាប់​តាំង​ពី​ឡើង​កាន់​តំណែង​ជា​នាយក​សាលា​បឋម​សិក្សា​វត្តបូព៌ ខេត្ត​សៀមរាប ក្នុង​ឆ្នាំ​១៩៩៣ លោក ពឹង គិមឆេន បាន​ប្រែ​ក្លាយ​សាលា​នៅ​ភាគ​ពាយ័ព្យ​នោះ​ទៅ​ជា​សាលា​គំរូ​ប្រចាំ​ប្រទេស​កម្ពុជា ច្រើន​ឆ្នាំ​ជាប់​ៗ​គ្នា​។ អតីត​នាយក​សាលា​រូប​នេះ ទទួល​បាន​ការ​កោត​សរសើរ​និង​លើក​ទឹក​ចិត្ត​ខ្ពស់​ពី​គ្រប់​មជ្ឈដ្ឋាន​។ ដោយ​មើល​ឃើញ​ពី​សមត្ថភាព​ខ្ពស់ និង​មាន​ស្នាដៃ​ល្អ​ក្នុង​ការ​លើក​កម្ពស់​វិស័យ​អប់រំ លោក​ត្រូវ​បាន​តែង​តាំង​ជា​ទី​ប្រឹក្សា​ក្រសួង​អប់រំ យុវជន និង​កីឡា នៅ​ឆ្នាំ​២០២១​នេះ​។ បើ​ទោះ​ជា​លោក ពឹង គិមឆេន ​បាន​ចូល​និវត្តន៍​ជា​នាយក​សាលា​ក្តី តែ​លោក​បញ្ជាក់​ថា លោក​នឹង​ប្រើ​ប្រាស់​ពេល​វេលា​ចុង​ក្រោយ​របស់​លោក បន្ត​ជ្រោង​វិស័យ​អប់រំ​នៅ​កម្ពុជា តាម​រយៈ​តួនាទី​ជា​ទី​ប្រឹក្សា​ក្រសួង​អប់រំ​។