ន័យធៀប​គេ​លែង​សូវ​ឮ​នៅ​ក្នុង​បទ​ចម្រៀង​ខ្មែរ​នា​សម័យ​បច្ចុប្បន្ន។ បច្ចុប្បន្ន​បទ​ចម្រៀង​ភាគច្រើន​រំលេច​ដោយន័យ​ត្រង់។  នេះ​ជា​ការ​ចាប់​អារម្មណ៍​របស់​លោក ហេ ជុនសិក  តន្រ្តីករ​ផ្នែក​វីយូឡុង​និង​ជា​អ្នក​ជំនិត​របស់​អធិរាជ​សំឡេង​មាស លោកស៊ីន ស៊ីសាមុត។ នៅ​ក្នុង​វ័យ​៨១​ឆ្នាំ អតីត​តន្រ្តីករ​ផ្នែក​វីយូឡុង​រូប​នេះ​លើក​ឡើង​ថា  រវាងន័យ​ធៀប​និង​ន័យ​ត្រង់  ន័យ​ធៀប​ផ្ដល់​ជា​គំនិត​ ការរិះ​គិត និង​ការអប់រំ​ដល់​អ្នក​ស្ដាប់​ច្រើន​ជាង​ន័យ​ត្រង់។ ដោយ​សារ​ន័យ​ធៀប​មាន​លក្ខណៈ​ពិសេស​បែប​នេះ​ហើយ ទើប​ធ្វើ​ឲ្យ​ចម្រៀង​ជំនាន់​មុន​នៅ​តែ​មាន​អ្នកស្ដាប់​និង​ស្ដាប់មិន​ចេះ​ជិន​ណាយ។