នៅ​ក្នុង​នាទីជីវិត​ជោគជ័យ​របស់​វិទ្យុ​បារាំង​អន្តរជាតិ​ RFI នៅពេលនេះ ហេង សុខនី សូមណែនាំ​លោក​អ្នកស្តាប់មក​ស្គាល់លោក​លី ពិសិដ្ឋ ​ជាស្ថាបនិកខ្មែរ-បារាំង​ ច្នៃគ្រឿង​អលង្ការ​ ដែលមានឈ្មោះថា​សួននៃក្តីប្រាថ្នា ​(Garden of desire)​នៅក្នុងទឹកដីអង្គរ​ ខេត្តសៀមរាប​។ ​លោក លី ពិសិដ្ឋ​បានថ្លែងថា ​ការឌីហ្សាញ​គ្រឿងអលង្ការ​ដែលបង្កប់ពី​គុណតម្លៃ​របស់អ្នកប្រើប្រាស់​ និងរំលឹក​ពីរឿងរ៉ាវនានា​ ដែលពាក់ព័ន្ធ​នឹងជីវិត​ពួកគេ ​គឺចាំបាច់ណាស់​ត្រូវមាន​គំនិត​ច្នៃប្រឌិត​ខ្ពស់ចេញពី​ការស្រឡាញ់ ​ដោយមិនធ្វើតាម​គេ ឬចម្លង​ពីគេឡើយ។​ សម្រាប់លោក​ លី ពិសិដ្ឋ​គ្មានឡើយពាក្យថា​លំបាក​ គឺមានតែ​ការខិតខំ​តស៊ូ​ឆ្លងឱ្យផុតនូវ​ការលំបាកទាំងនោះ ​ទម្រាំនឹងទទួលបាន​ការទទួលស្គាល់​ស្នាដៃ​ពីទីផ្សារជាតិ​ និងអន្តរជាតិ​ ជាពិសេស​អ្នកដែលមានចិត្ត​ស្រឡាញ់​ចូលចិត្ត​ផ្នែកសិល្បៈ​ឌីហ្សាញ​ ស្ថាបត្យកម្ម​ តន្ត្រី ​និងធម្មជាតិ​៕