នៅក្នុងនាទី​ជីវិតជោគជ័យ​របស់​វិទ្យុបារាំង​អន្តរជាតិ ​RFI ​នៅពេលនេះ ​ហេង សុខនី​ សូមណែនាំ​លោក​អ្នក ​ឱ្យ​ស្គាល់ លោក​បិន សុជាតិ​ នាយក​គ្រប់គ្រង​ប្រចាំប្រទេស​នៃ ​e-Health MyCLNQ ​ដែលជា​សេវាកម្ម​បច្ចេកវិទ្យា​សុខាភិបាល​ថែទាំ​សុខភាព​លើទូរស័ព្ទដៃ​ដំបូងគេ​នៅកម្ពុជា​។​ លោក​បិន សុជាតិ​ថ្លែងថា​ e-Health MyCLNQ​ ​នឹងមានក្រុម​វេជ្ជបណ្ឌិត​ជំនាញ ​ផ្តល់សេវា​ព្យាបាល​ចល័ត​នៅតាម​ផ្ទះពលរដ្ឋ​ ដើម្បី​ជួយដោះស្រាយ​ដល់អ្នក​ដែលរវល់​ខ្លាំងមិនអាចមក​ជួបពេទ្យ​បាន​ ឬមនុស្ស​ចាស់ជរា​ ដែលត្រូវការ​គ្រូពេទ្យ​មើលថែ​ជាប្រចាំតែគ្មាន​អ្នកជូន​មកមន្ទីរពេទ្យ​ និងម្ចាស់អាជីវកម្ម​ដែលមិនអាច​បិទទ្វារ​តូបព្រោះចំណូល​ប្រចាំថ្ងៃ​ជាដើម​។​ លើសពីនេះ ​ស្របនឹង​ការឆ្លងរាតត្បាត​ជំងឺកូវីដ១៩ ​សេវានេះ​នឹងអាចជួយ​កាត់បន្ថយ​ហានិភ័យ​ឆ្លងកូវីដ​១៩ ​ខណៈអ្នកជំងឺ​កកស្ទះ​ដោយការ​រង់ចាំ ​ការព្យាបាល​នៅតាមមន្ទីរពេទ្យ​នានាផងដែរ​។