ថ្ងៃព្រហស្បតិ៍នេះ ​រដ្ឋបាល​ខេត្តកំពង់ចាម​បានបង្ហាញឱ្យដឹង​ពីចំនួន​អ្នកឆ្លង​ជំងឺកូវីដ១៩​ថ្មីកាលពីម្សិលមិញ​ដែលមាន​ចំនួនដល់​ទៅ៥២នាក់​។ ​ចំនួននេះ ​គឺជាកំណត់ត្រា​ឆ្លងច្រើនបំផុត​ប្រចាំថ្ងៃនៅ​ក្នុងខេត្តមួយនេះ​។​ លោក​អ៊ុន ចាន់ដា ​អភិ​បាល​ខេត្តកំពង់ចាម​ បានលើកឡើងថា​ ចំនួនឆ្លងថ្មី​ច្រើនបែបនេះ ​កើតឡើង​នៅក្នុងរោងចក្រ​ចំនួន៣ ​គឺ២រោងចក្រ​នៅក្នុងស្រុកព្រៃឈរ​ និង១រោងចក្រ​ទៀតនៅក្នុងស្រុក​កំពង់សៀម​។​ លោកអភិបាល​ខេត្តបានបញ្ជាក់ថា ​រោងចក្រទាំង៣​នេះត្រូវបានសម្រេចឱ្យ​ផ្អាកដំណើរការ​ផ្នែកខ្លះៗ ​ដើម្បី​ទប់ស្កាត់​ការឆ្លងរាលដាល​ជំងឺកូវីដ១៩​។​ បើតាមលោក​អ៊ុន ចាន់ដា ​ទោះបីមានករណី​ឆ្លងថ្មី​ច្រើនក៏ដោយ ​ប៉ុន្តែអាជ្ញាធរ​ខេត្តកំពង់ចាម​បានចាត់វិធានការ​បន្ទាន់​ផ្សេងៗ​ទាន់ពេលវេលា​ ហើយមកដល់ពេលនេះ​ស្ថានភាព​ឆ្លងរាលដាល​ជំងឺកូវីដ១៩​នៅអាចគ្រប់គ្រង​បាននៅឡើយ​។