ឃ្លាតឆ្ងាយ​ពីស្រុកកំណើត ជារឿងមួយ។ ការមករស់នៅ និង​រៀន តែម្នាក់ឯង ក្នុង​បន្ទប់ ដោយសារ​តែ​វិធានការ​បិទទីក្រុង ក្នុង​កាលៈទេសៈ​កូវីដ​ទៀតដូច្នេះ រឹតតែ​ធ្វើ​ឲ្យ​និស្សិតខ្មែរ មួយចំនួន កាន់តែ​ស្រណោះខ្លួន។ នៅប្រទេស​បារាំង វិធានការ​បិទ​ប្រទេស បានធ្វើ​ឲ្យ​និស្សិត​ខ្មែរ​ជាច្រើន រៀនសូត្រ មិនបាន​គ្រប់​ពេញលក្ខណៈ។ ពួកគេ​មួយចំនួន​ ខកខាន​មិន​បាន​ចុះធ្វើ​កម្មសិក្សា ដោយសារតែ​ក្រុមហ៊ុន មន្ទីរពិសោធន៍​ត្រូវ​បិទទ្វារ ដោយសារ​វិធានការ​បិទប្រទេស​របស់​រដ្ឋាភិបាល​បារាំង។ នៅក្នុង​បទយកការណ៍ នៅថ្ងៃ​សុក្រនេះ ឈាង បុប្ផា បាន​សម្ភាសន៍​និស្សិតខ្មែរ ២រូប ដែល​រៀន​ផ្នែកច្បាប់ នៅ ទីក្រុង​លីយ៉ុង ​និស្សិត​វិស្វករ​ម្នាក់ ហើយ​និង​ប្រធាន​សមាគមអតីតនិស្សិត និង​និស្សិតកម្ពុជា​នៅ សាលា​ជាន់ខ្ពស់ បារាំង ហ្រ្កង់ អេកូល។